د خیبر پښتونخوا ایالت په ټانک ولسوالۍ کې د امنیتي ځواکونو پر یوې پوستې د وسلهوالو له لوري د کواډکوپټر ډرون په وسیله برید شوی دی.
د پولیسو په وینا، برید د سهار وختي ترسره شوی او ډرون دوه هاوان مرمۍ غورځولې دي.
په پېښه کې یو سرتېری ټپي شوی و، خو وروسته یې د ټپونو له امله ساه ورکړه.
چارواکي وایي چې د برید کوونکو د پېژندنې او نیولو لپاره پلټنې روانې دي.
د طالبانو حکومت د امربالمعروف او نهې عن المنکر وزارت ویلي چې د دوی محتسبانو په تېره یوه اونۍ کې د هېواد په بېلابېلو ولایتونو کې ۱۶ کسان د کوډګرۍ په تور نیولي دي.
د خبرپاڼې له مخې، یاد کسان په پروان، بامیان، کندهار، بدخشان، جوزجان، غور او سرپل ولایتونو کې نیول شوي او عدلي او قضایي ارګانونو ته سپارل شوي دي.
وزارت همداراز ویلي چې په همدې موده کې یې د ښځو د حقونو اړوند ۹۶ قضیې حل کړې او له سوداګرو سره یې د بیو د کنټرول او د احتکار د مخنیوي په تړاو ۲۱۲ اصلاحي ناستې ترسره کړې دي.
د بلوڅو د ازادۍ غوښتونکي تحریک مشر حربیار مري په تازه څرګندونو کې د پاکستان له لوري پر افغان ملکیانو هوايي او ډرون بریدونه په کلکه غندلي او دا یې د نړیوالو قوانینو ښکاره سرغړونه بللې ده.
هغه ویلي چې د نړیوالې ټولنې چوپتیا اسلاماباد ته دا زمینه برابروي چې د افغانستان د خاورې بشپړتیا او د خلکو حقونه تر پښو لاندې کړي.
مري همداراز د ډیورنډ کرښې موضوع ته په اشارې ویلي چې که د تاریخ په اوږدو کې نړیوالې ټولنې بېتفاوتي نه وای کړې، سیمه به له اوسني وضعیت سره نه مخ کېده.
حربیار مري د پاکستان پر هغې تګلارې نیوکه وکړه چې ګواکې غواړي افغانستان د خپل «پنځم ایالت» په توګه معرفي کړي او د کابل پر ملي حاکمیت برلاسی ومومي.
نوموړي ټینګار کړی چې افغانان او بلوڅان باید د خپلو حقونو او سیمو د دفاع لپاره یو موټی دریځ خپل کړي.
د هند لومړي وزیر نریندرا مودي، چې اسرائیل ته په رسمي سفر تللی، د دغه هېواد په پارلمان کې د وینا پر مهال ویلي چې د نوي ډیلي او تلابیب ترمنځ ستراتیژیکې اړیکې باید لا پیاوړې او پراخې شي.
مودي ټینګار کړی چې هند له اسرائیل سره خپلې تاریخي او امنیتي همکارۍ ارزښتناکې ګڼي او غواړي دغه اړیکې د اقتصاد، ټکنالوژۍ، دفاع او کرنې په برخو کې نورې هم ژورې کړي.
هغه زیاته کړې چې هېواد یې په پوره ژمنتیا، اوس او په راتلونکي کې، د اسرائیل ترڅنګ ولاړ دی.
دغه څرګندونې داسې مهال کېږي چې اسرائیل په غزه کې د روانو پوځي عملیاتو له امله له سختو نړیوالو نیوکو او سیاسي فشارونو سره مخ دی.
د ایران ولسمشر مسعود پزشکیان د اټومي پروګرام په اړه د امریکا سره د خبرو درېیم پړاو ته په اشارې ویلي چې هېواد یې د ښې پایلې چانس ویني.
ټاکل شوې د امریکا استازی سټیو وېټکاف او جېرډ کوشنر د پنجشنبې په ورځ په ژنیو کې د ایراني پلاوي له مشر عباس عراقچي سره وګوري.
دواړو هېوادونو د روانې میاشتې په پیل کې د اوږدمهال لانجمن اټومي پروګرام په اړه خبرې بیا پيل کړې دي.
امریکا او اسرائیل باور لري چې ایران د اټومي وسلې جوړولو هڅه کوي، خو تهران ټینګار کوي چې پروګرام یې سولهییز دی.
د خیبر پښتونخوا ایالت په بنو ولسوالۍ کې د دوو وروڼو مړي د بنو هوايي ډګر پر سړک موندل شوي دي.
وژل شوي کسان امجد او حضرتالله پېژندل شوي چې دواړه د پولیسو سرتېري وو.
راپورونه وایي چې درې وروڼه، چې ټول دولتي کارکوونکي وو، د لسو تر دولسو وسلوالو کسانو له لوري د ماښام د لمانځه پر مهال د سوکري حسن خېل په سیمه کې، چې د کنټونمنټ پولیس سټېشن تر حوزې لاندې راځي، تښتول شوي وو.
د معلوماتو له مخې، یو ورور د کمېشنر په دفتر کې کار کاوه او دوه نور د پولیسو اړوند کارکوونکي وو.
د پېښې په اړه لا هم د امنیتي چارواکو له لوري نور جزئیات نه دي خپاره شوي.
د ماشومانو د ژغورنې نړیوال سازمان ویلي چې د کونړ له زلزلې څه باندې شپږ میاشتې تېرې شوې، خو لا هم د زرګونو زلزله ځپلو کورونه او ښوونځي نه دي رغول شوي.
د یاد سازمان په وینا، شاوخوا ۲۵ زره ماشومان اوس هم په خیمو کې ژوند کوي او زدهکړې ترسره کوي.
ویل کېږي چې په ځینو سیمو کې واورو خیمې نړولي او په نورو ځایونو کې د تودوخې لپاره د لرګیو سوځولو له امله د اور لګېدو جدي خطر موجود دی.
سازمان زیاته کړې چې زلزلې په کونړ کې له ۶۰۰ څخه زیات ټولګي زیانمن یا بشپړ وران کړي دي.
د دې وضعیت له امله شاوخوا ۱۷ زره زدهکوونکي اړ دي چې په لنډمهالو او نامناسبو ټولګیو کې خپلې زدهکړې ته دوام ورکړي.
دغه بنسټ له مرستندویو ادارو او مسؤلو لورو غوښتي چې د ښوونیزو مرکزونو د بیارغونې او د ماشومانو د خوندي چاپېریال برابرولو لپاره بېړني ګامونه واخلي.
د امریکا د بهرنیو چارو وزیر، مارکو روبیو ویلي چې د ایران اټومي او توغندیز پروګرامونه د امریکا د ګټو پر ضد جدي ګواښ بلل کېږي.
هغه د چهارشنبې په شپه د واشنګټن په وخت خبریالانو ته ویلي چې د امریکا ولسمشر تل هڅه کوي د خبرو اترو لاره خپله کړي.
نوموړي زیاته کړې: «ټول باید پوه شي چې د ایران حکومت له ډېرې مودې راهیسې د امریکا لپاره یو ډېر جدي ګواښ پاتې شوی دی.»
روبیو ویلي تر ټولو ستر ګواښ د تهران اټومي پروګرام دی او ادعا یې کړې چې ایران د امریکا په بریدونو کې د خپلو تاسیساتو له ویجاړېدو وروسته هڅه کوي ځینې برخې یې بېرته ورغوي.
د هغه په وینا، ایران دا مهال د یورانیمو غني کول نه ترسره کوي، خو هڅه کوي داسې پړاو ته ورسېږي چې وکولای شي دغه فعالیتونه بیا پیل کړي.
هغه همدارنګه د ایران توغندیز پروګرام د امریکا پوځي اډو او د هغې د متحدینو پر ضد مستقیم ګواښ بللی.
روبیو زیاته کړې چې تهران د سمندري تجهیزاتو په لرلو سره د امریکا سمندري تګ راتګ او بحري ځواک ته هم ننګونه پېښوي او داسې وسلې لري چې د امریکایانو پر ضد کارېدلی شي.
د طالبانو حکومت ویاند ذبیح الله مجاهد، د العربیه له انګلیسي څانګې سره په مرکه کې د پاکستان هغه ادعاوې ناسمې وبللې چې ګواکې په افغانستان کې وسلهوالې ډلې حضور لري.
نوموړي ویلي، پاکستان د افغانستان خاوره او هوايي حریم نقض کړی او وروستي هوايي بریدونه یې د نړیوالو اصولو خلاف عمل دی.
مجاهد ټینګار کړی چې د تحریک طالبان پاکستان (TTP) وسلهوال په افغانستان کې حضور نه لري.
هغه اسلاماباد تورن کړی چې د ملکي وګړو په نښه کولو ترڅنګ د داعش-خراسان غړو ته خوندي پناهځایونه برابروي.
مجاهد زیاته کړې، کابل به د پاکستان وروستیو هوايي بریدونو ته پوځي ځواب ورکړي او د هېواد له حاکمیت او خاورې څخه دفاع ته به لومړیتوب ورکړي.
د ایران د بهرنیو چارو وزیر عباس عراقچي له «انډیا ټوډې» سره په مرکه کې د ډونالډ ټرمپ هغه ادعا رد کړې چې ګواکې په ایران کې د اعتراضونو پر مهال ۳۲ زره کسان وژل شوي دي.
عراقچي ویلي، د وژل شویو کسانو نوملړ خپور شوی او د قربانیانو شمېر ۳ زره او ۱۱۷ تنه دی، چې د ده په وینا ډېر خواشینوونکی دی، خو له هغې شمېرې سره سمون نه لري چې ټرمپ یادونه کړې وه.
د ایران د بهرنیو چارو وزیر ټینګار کړب چې مذاکره او دیپلوماسي یوازینۍ لاره ده.
هغه زیاته کړې، تهران چمتو دی د اندېښنو ارزونه وکړي، خو د اټومي ټکنالوژۍ د سولهییزې استفادې له خپل حقه به تېر نه شي.
عراقچي همداراز ویلي، ایران اوږد واټن ویشتونکي توغندي نه پراخوي او د هغوی واټن یې په قصدي ډول له دوه زره کیلومتره کم محدود کړی دی.
د هغه په وینا، «موږ نه غواړو نړیوال ګواښ واوسو. دا توغندي یوازې د ځان د دفاع لپاره لرو او د مخنیوي رول لوبوي.»
نوموړي یو ځل بیا د خبرو اترو پر دوام ټینګار کړی او ویلي چې د شخړو د حل لپاره سیاسي لاره غوره انتخاب دی.