د ګارډین ورځپاڼې راپور ورکړی، چې د امریکا ولسمشر ډونالډ ټرمپ یو ځل بیا د جرمني پر لومړي وزیر فریدرتش مرتس توندې نیوکې کړې او هغه ته یې ویلي چې د خپل هېواد ستونزو ته پام وکړي او په امریکا دې نېوکې نه کوي.

ټرمپ ویلي چې جرمني باید د روسیې او اوکراین جګړې د پای ته رسولو لپاره هڅې زیاتې کړي او د ایران په چارو کې له لاسوهنې ډډه وکړي.

نوموړي همدارنګه اشاره کړې چې ښايي له جرمني، ایټالیا او هسپانیا څخه د امریکايي ځواکونو شمېر کم کړي.

هغه ویلي چې ځینې اروپايي هېوادونو د ایران په جګړه کې له امریکا سره مرسته نه ده کړې.

ګارډین ویلي چې د جرمني چارواکو هڅه کړې چې دا لانجه کمه وښيي او ویلي یې دي چې دا ډول څرګندونې نوې نه دي او مخکې هم شوې دي.

راپور زیاتوي چې د امریکا او جرمني ترمنځ دا لفظي شخړه وروسته له هغې زیاته شوې چې مرتس ویلي وو، امریکا د ایران په موضوع کې کمزورې شوې او روښانه تګلاره نه لري.

فاکس نیوز په یو راپور کې وایي، چې د امریکا د جګړې وزیر پیټ هګسټ او د پوځ لوی درستیز ډن کېن د سنا مجلس ته حاضر شوي او د ایران جګړې، پوځي لګښتونو او د ۲۰۲۷م کال بودجې په اړه تر سختو پوښتنو لاندې راغلي دي.

راپور وايي، د ایران پر ضد روانو عملیاتو کې امریکا تر اوسه شاوخوا ۲۸ میلیارده ډالر لګښت کړی او پنټاګون د راتلونکي کال لپاره ۱.۵ ټریلیون ډالرو بودجه غوښتې ده.

بل لور ته، د امریکا ولسمشر ډونالډ ټرمپ ویلي چې ښايي له ایټالیا او هسپانیا څخه امریکايي ځواکونه وباسي، او دا پرېکړه لا تر غور لاندې ده.

د راپور له مخې، که څه هم د ایران او امریکا ترمنځ اوربند اعلان شوی؛ خو لا هم سیمه کې تاوتریخوالی موجود دی.

بل لورته د اسراییلو دفاع وزیر یسراییل کاتز خبرداری ورکړی چې ښايي ژر بیا پر ایران پوځي بریدونه پیل شي.

فاکس نیوز ویلي، چې د هرمز تنګي کړکېچ د نړۍ د تېلو بازارونه اغېزمن کړي، او د ایران اقتصادي وضعیت هم خراب شوی، چې د دې هېواد د اسعارو ارزښت تر ټولو ټیټې کچې ته رسېدلی دی.

راپور زیاتوي چې امریکا د ایران پر وړاندې اقتصادي او پوځي فشار ته دوام ورکوي، خو په عین حال کې د سولې خبرو ته هم لاره پرانستې ساتي.

د اېن‌بي‌سي نیوز د راپور له مخې، تمه ده چې د امریکا ولسمشر ډونالډ ټرمپ په نږدې ورځو کې د ایران په اړه یوه مهمه پرېکړه وکړي.

راپور وايي، سره له دې چې د ایران او امریکا ترمنځ اوربند لا هم روان دی؛ خو امریکايي چارواکي باور لري چې ایران خپل پوځي فعالیتونه بیا زیات کړي دي.

د معلوماتو له مخې، ایران هڅه کوي توغندي او مهمات له پټو او زیانمنو سیمو څخه وباسي او د ډرونونو او توغندیو ځواک بېرته ورغوي.

راپور کې ویل شوي چې واشنګټن اندېښنه لري چې دا اقدامات ښايي د راتلونکو احتمالي جګړو لپاره چمتووالی وي، تر څو ایران وکولای شي په سیمه کې بیا بریدونه ترسره کړي.

اېن‌بي‌سي نیوز په یو راپور کې وایي، چې د سپینې ماڼۍ یو چارواکي ویلي چې د ډونالډ ټرمپ ادارې چارواکي له کانګرس غړو سره د ایران پر ضد د پوځي عملیاتو د قانوني اجازې په اړه خبرې کوي.

په همدې حال کې، د استازو جرګې مشر مایک جانسن ویلي چې د ایران پر ضد د عملیاتو لپاره د کانګرس رایې ته اړتیا نشته، ځکه د هغه په وینا امریکا د جګړې په حالت کې نه ده.

دا بحثونه په داسې وخت کې کېږي چې د امریکا د جګړې د صلاحیتونو قانون مهلت پای ته نږدې دی او د حکومت او کانګرس ترمنځ پر قانوني صلاحیتونو اختلافات موجود دي.

د ایران د بهرنیو چارو وزیر سید عباس عراقچي د لبنان د پارلمان له مشر سره په ټیلیفوني خبرو کې ویلي چې پر لبنان د اسراییلو د بریدونو درول د ایران او امریکا ترمنځ د اوربند د تفاهم یوه مهمه برخه وه.

هغه ټینګار کړی چې دا موضوع به په راتلونکو خبرو او سیاسي پروسو کې هم د ایران له خوا مهمه وبلل شي.

عباس عراقچي همدارنګه ویلي چې ایران به د حزب‌الله ملاتړ ته دوام ورکړي.

د افغان سولې لپاره د امریکا پخواني ځانګړي استازي زلمي خلیلزاد د طالبانو له حکومت غوښتي چې د نجونو د زده‌کړو د بندیز په اړه د یونسیف راپور ته واضح او مستند ځواب ورکړي.

هغه په خپل پیغام کې پوښتنه کړې چې ایا د طالبانو حکومت د دې پرېکړې د پایلو څخه خبر دی او دا چې د راتلونکو ستونزو د حل لپاره کوم پلان لري.

بل لور ته، یونسیف ویلي چې که د نجونو پر زده‌کړو بندیز دوام وکړي؛ نو تر ۲۰۳۰ کال پورې به افغانستان له ۲۰ زرو څخه د زیاتو ښوونکو له کمښت سره مخ شي او له ۵ زرو څخه زیاتې ښځینه روغتیايي کارکوونکې به هم کمې وي.

یونسیف ویلي چې همدارنګه به له ۲ میلیونو څخه زیاتې نجونې له زده‌کړو بې برخې شي.

راپور خبرداری ورکړی چې دا وضعیت به د افغانستان پر راتلونکي ټولنه جدي منفي اغېزې ولري.

د افغانستان د ولسي جرګې پخوانۍ غړې فوزیه کوفي په استانبول کې د افغانستان او پاکستان د غیر رسمي استازو د لیدنې په اړه په خپل غبرګون کې لیکلي چې د خلکو او ځینو رسنیو چلند له ښکاره دوه‌ګونتوب سره مخ دی.

نوموړې ویلي، که ځینې کسان له پاکستاني لوري سره وویني، دا کار د سولې، امنیت، ملي ګټو او د افغانستان د ثبات لپاره سپېڅلی بلل کېږي؛ خو که نور ورته ګام واخلي، نو بیا یې پر خیانت، تړاو، استخباراتي پروژې او د ملي ګټو پر ضد عمل تورنوي.

کوفي همداراز نیوکه کړې چې یو شمېر رسنۍ، د ټیک‌ټاک فعالان او هغه کسان چې ځانونه بې‌طرفه څېړونکي بولي، یوازې انتخابي موضوعات راپورته کوي او په قصدي ډول عامه ذهنیت اغېزمنوي.

هغې زیاته کړې چې له همدې کړیو څخه څو ورځې وړاندې هم شور جوړ شوی و، کله چې د کونړ پوهنتون تر برید لاندې راغی، او دا چلند یې د “منافقت” بېلګه بللې ده.

رویټرز راپور ورکړی چې چین نوي تجارتي قوانین اعلان کړي چې د امریکایي شرکتونو لپاره یې اندېښنه رامنځته کړې ده.

د رویټرز په خبره، په دې قوانینو کې چین کولی شي هغه بهرني شرکتونه جریمه کړي چې غواړي له چین څخه خپلې سوداګریزې اړیکې کمې کړي.

رویټرز په خپل راپور کې زیاته کړې چې امریکا غواړي شرکتونه له چین څخه خپله وابستګي راکمه کړي؛ خو دا نوي قوانین د همدې هڅې پر ضد ګڼل کېږي.

د امریکا حکومت تر اوسه په دې اړه کوم رسمي غبرګون نه دی ښودلی.

د ایران نوي مذهبي مشر مجتبی علي خامنه‌یي په یوه پیغام کې ویلي چې ایران غواړي د هرمز تنګي او د فارس خلیج لپاره نوي قوانین او مدیریت جوړ کړي.

هغه ویلي چې دا کار به د سیمې هېوادونو ته امنیت او اقتصادي ګټه ورسوي.

همدارنګه یې ادعا کړې چې امریکا په سیمه کې په خپلو پوځي پلانونو کې ناکامه شوې ده، او ایران به د هرمز تنګي د مدیریت له لارې د سیمې امنیت ښه کړي.

هغه دا هم ویلي چې ایران د خلیج هېوادونو سره ګډ برخلیک لري او غواړي ورسره اړیکې وساتي.

د ایران ولسمشر مسعود پزشکیان ویلي چې په فارس خلیج کې د هر ډول ناامنۍ مسوولیت د امریکا او اسرائیل پر غاړه دی، او ټینګار یې کړی چې د سمندري محاصرې هڅې به ناکامې شي.

نوموړي ویلي: «زموږ دښمنانو د خپل چلند په بدلون سره د سمندري محاصرې او د سوداګریزو لارو د محدودولو ستراتیژي غوره کړې، څو د ایران پر حکومت او خلکو فشار زیات کړي.»

پزشکیان زیاته کړې چې دا ډول اقدامات نه شي کولی خپلې موخې ته ورسېږي او ایران به د خپلو ملي ګټو د ساتنې لپاره لازم ګامونه پورته کړي.