د افغانستان جلاوطنې فوټبال ښځینه لوبډلې چې د Afghan Women United په نوم یادیږي، د فیفا نړیوالو سیالیو کې د رسمي ګډون ترلاسه کولو وروسته نن د جون په څلورمه د کوک ټاپوګانو ښځینه لوبډلې پر وړاندې دوستانه لوبه وکړه.

افغان لوبډلې دغه لوبه د نیوزیلنډ په اوکلنډ ښار کې په وروستۍ شېبه کې د یو پر صفر په توپیر وبایلله.

په همدې حال کې دواړه لوبډلې به دویمه دوستانه لوبه په اوکلنډ کې را روانه اوونۍ د جون په اتمه ترسره کړي.

دا په داسې حال کې ده چې په افغانستان کې د طالبانو حکومت له بیا واکمنېدو وروسته د افغانستان فوټبال ښځینه لوبډلې ټولې لوبغاړې بېلابېلو هېوادونو ته ووتې او شاوخوا له پنځو کالو راهیسې یې د فیفا نړیوالو سیالیو کې د افغانستان په استازیتوب د ګډون حق ترلاسه کولو لپاره عدالت غوښتنه وکړه.

بلاخره د فیفا نړیوال فدراسیون د روان زېږدیز کال په اپرېل میاشت کې د افغانستان فوټبال ښځینه لوبډلې ته په نړیوالو سیالیو کې د ګډون رسمي اجازه ورکړه.

له دې وروسته یاده لوبډله د فوټبال دوه اړخیزو نړیوالو لوبو او په نړیوالو ټورنمټونو کې برخه اخیستلی شي.

د پاکستان د بهرنیو چارو وزارت ویاند طاهر اندرابي د هغو راپورونو ادعاوې رد کړې چې ګواکې د پاکستان د بهرنیو چارو وزیر له امریکایي چارواکو سره د ایران د اټومي پروګرام په اړه استخباراتي معلومات شریک کړي دي.

اندرابي د خپلې اوونیزې خبري غونډې پر مهال وویل: «پاکستان هغه راپورونه ردوي چې وایي د بهرنیو چارو وزیر د ایران په اړه له امریکا سره استخباراتي معلومات شریک کړي دي. دا ډول ادعاوې بې‌بنسټه او له اټکلونو ډکې دي.»

هغه همداراز وویل چې پاکستان د افغانستان اړوند موضوعات د اروپايي ټولنې د بهرني سیاست له مشرې کاجا کالاس سره هم مطرح کړي دي، او د ده په وینا اروپايي ټولنه د پاکستان دریځ درک کوي.

د پاکستان د بهرنیو چارو وزارت ویاند زیاته کړه چې د پاکستان د دفاع حق هم د اروپايي ټولنې له استازو سره په ګډه خبري ناسته کې د بحث یوه مهمه برخه وه.

د پاکستان د بهرنیو چارو وزارت ویاند طاهر اندرابي د روسیې او افغانستان ترمنځ د پوځي او تخنیکي همکارۍ د احتمالي تړون په اړه له څرګندې تبصرې کولو ډډه کړې ده.

اندرابي د خپلې اوونیزې خبري غونډې پر مهال وویل چې د موضوع جزئیات لا هم تر څېړنې لاندې دي او په اوسني پړاو کې به د دې تړون په اړه هر ډول تبصره له وخته مخکې وي.

نوموړي زیاته کړه: «موږ د موضوع جزئیات ارزوو او تر هغه وخته چې بشپړ معلومات ترلاسه نه شي، تبصره کول مناسب نه دي.»

د پاکستان د بهرنیو چارو وزارت دغه دریځ په داسې حال کې څرګند شوی چې څو ورځې وړاندې د روسیې او افغانستان ترمنځ د پوځي او تخنیکي همکاریو تړونونه لاسلیک شوي.

د طالبانو حکومت د ازموینو ادارې مرستیال رحیم الله حقاني ویلي چې د ۱۴۰۵ کال کانکور ازموینې لپاره ټولټال ۱۲۰ زره د دولسم ټولګي فارغانو نوم‌لیکنه کړې ده، او دغه ازموینه به په څلورو پړاوونو کې ترسره شي.

هغه نن (پنجشنبه) په کابل کې د کانکور ازموینې د درېیم پړاو د پرانیستې مراسمو پر مهال وویل چې د ازموینې لومړی پړاو په ۱۵ ولایتونو او دویم پړاو په ۱۸ ولایتونو کې ترسره شوی دی.

نوموړي زیاته کړه چې د کانکور بهیر د ټاکل شوي مهالوېش له مخې روان دی او پاتې پړاوونه به هم په منظم ډول ترسره شي، څو ټولو نوماندانو ته د لوړو زده‌کړو مؤسسو ته د داخلېدو فرصت برابر شي.

د بریتانیا ورځپاڼې فايننشل ټايمز په یوه تحلیلي راپور کې لیکلي چې د امریکا د ولسمشر ډونالډ ټرمپ او د اسرائیل د لومړي وزیر بنیامین نتنیاهو ترمنځ وروستۍ ترینګلتیا د ۱۹۸۲ کال د بېروت د جګړې پر مهال د امریکا او اسرائیل د مشرانو تر منځ رامنځته شوي اختلافات یادوي.

د راپور له مخې، د لبنان په جنوب او د بېروت په څنډو کې د اسرائیلو پوځي عملیاتو د واشنګټن او تل‌ابیب ترمنځ سیاسي اختلافات زیات کړي دي.

ویل کېږي، ټرمپ د یوې تلیفوني اړیکې پر مهال پر نتنياهو سختې نیوکې کړې او خبرداری یې ورکړی چې د پوځي بریدونو دوام کولی شي د اسرائیل نړیوال دریځ او روانې ډیپلوماټیکې هڅې زیانمنې کړي.

فايننشل ټايمز لیکي چې دغه وضعیت د ۱۹۸۲ کال هغه پېښو ته ورته دی، کله چې د امریکا ولسمشر رونالډ ریګن د لبنان د جګړې پر مهال د اسرائیل له هغه وخت لومړي وزیر مناخیم بېګن څخه د بېروت د بمبارۍ د درولو غوښتنه کړې وه.

راپور زیاتوي چې که څه هم د سیمې سیاسي شرایط د تېرو لسیزو په پرتله بدل شوي؛ خو د لبنان په اړه د اسرائیل پوځي تګلاره او د امریکا اندېښنې لا هم د پخوانیو تجربو انعکاس ښيي.

د افغانستان کرېکټ بورډ د سریلنکا په کوربتوب د روانې جون میاشتې له نهمې نېټې پیلېدونکو درې اړخیزو یو ورځنیو سیالیو لپاره د افغان ابدالیانو ۱۵ کسیزه لوبډله اعلان کړې ده.

په دې سیالیو کې به افغان ابدالیان د سریلنکا الف او هند الف لوبډلو پر وړاندې لوبې ترسره کړي.

د اعلان شوي نوملړ له مخې، لوبډله د عمران میر په لوبډلمشرۍ میدان ته ښکته کېږي.

په لوبډله کې حسن عیس‌خیل، خالد تڼي‌وال، اعجاز احمدزی، بهیر شاه، فیصل خان، فرمان صافي، شمس‌الرحمن، نورالرحمن، اسحاق رحیمي، خلیل ګربز، ظاهر پکتین، فریدون داودزی، محمد ابراهیم او عبدالله احمدزی هم شامل دي.

د پاکستان د اپوزیسیون مخکښ سياستوال محمود خان اڅکزی وايي، په افغانستان کې د هر ډول نوې پوځي مداخلې پایلې به یوازې د دغه هېواد تر پولو محدودې نه وي، بلکې د ټولې سیمې پر امنیت او ثبات به ژور اغېز وکړي.

نوموړي د بلوچستان سترې محکمې په ودانۍ کې وکیلانو ته د وینا پر مهال ویلي، افغانستان د اسیا د امنیت او ثبات مهم محور دی او د دغه هېواد بې‌ثباتي د سیمې نورو هېوادونو ته هم ستونزې زېږولای شي.

هغه د علامه اقبال د مشهورې وینا په یادولو سره وویل چې که اسیا یو بدن وي؛ نو افغانستان یې زړه دی؛ د زړه ناارامي د ټول بدن پر وضعیت اغېز کوي.

اڅکزي د افغانستان په اړه د سیمه‌ییزو هېوادونو ترمنځ د همغږۍ غوښتنه وکړه او وړاندیز یې وکړ چې د ملګرو ملتونو د سرمنشي په مشرۍ دې د افغانستان د ګاونډیو هېوادونو ځانګړې غونډه جوړه شي، څو د افغانستان اړوند مسایل د خبرو او تفاهم له لارې وڅېړل شي.

هغه خبرداری ورکړ چې د افغانستان په اړه د پوځي ائتلافونو او لښکرو د جوړولو هڅې به مطلوبه پایله ورنه کړي.

د نوموړي په وینا، «کېدای شي کابل په لنډ وخت کې ونیول شي، خو له افغانستانه وتل او هلته د اوږدمهاله نفوذ ساتل اسانه کار نه دی.»

اڅکزي د تاریخ بېلګې هم وړاندې کړې او ویې ویل چې پخوا برېتانیا، شوروي اتحاد او امریکا په افغانستان کې پوځي حضور درلود؛ خو هېڅ یوه ونه توانېده چې په دغه هېواد کې خپل نفوذ په اسانه او دوامداره توګه وساتي.

راپورونه وايي، اسرائیلي ځواکونو تېره شپه د غزې تړانګې په بېلابېلو سیمو کې هوايي بریدونه ترسره کړي چې له امله یې لږ تر لږه ۹ فلسطینیان وژل شوي دي.

د راپورونو له مخې، د وژل شویو کسانو په منځ کې څلور ماشومان هم شامل دي.

همداراز په دغو بریدونو کې یو شمېر نور کسان ټپیان شوي او روغتیايي سرچینو د ځینو ټپیانو وضعیت هم د اندېښنې وړ بللی دی.

ویل کېږي چې اسرائیلي الوتکو د غزې په بېلابېلو سیمو کې لږ تر لږه څلور هوايي بریدونه ترسره کړي او د استوګنې ځینې ودانۍ یې په نښه کړې دي.

‏راپورونه وايي، د شمالي کوریا مشر کیم جونګ اون د اټومي موادو د تولید له یوې نوې فابریکې څخه د لیدنې پر مهال د هېواد د اټومي وسلو د پروګرام د لا پراختیا غوښتنه کړې ده.

د شمالي کوریا دولتي رسنیو ویلي، کېم جونګ اون د فابریکې د بېلابېلو برخو له کتنې وروسته مسؤلینو ته سپارښتنه کړې چې د اټومي موادو د تولید بهیر لا پیاوړی کړي او د تولید ظرفیتونه لوړ کړي.

نوموړي ټینګار کړی چې د هېواد د دفاعي ځواک د پیاوړتیا لپاره د اټومي صنعت پراختیا بنسټیز اهمیت لري.

هغه ویلي چې په اوسنیو نړیوالو شرایطو کې شمالي کوریا اړتیا لري خپلې ستراتیژیکې وړتیاوې لا پیاوړې کړي، څو د هر ډول احتمالي ګواښ پر وړاندې د مخنیوي ځواک وساتي.

د ده په وینا، د اټومي موادو تولید او د اړوندو ټکنالوژیو پرمختګ باید په دوامداره توګه تعقیب شي.

د ایټالیا لومړۍ وزیرې جورجيا ملوني په دغه هېواد کې د درېیو افغانانو او یو پاکستاني د ژوندي سوځولو د پېښې په اړه ژوره خواشیني څرګنده کړې او دا یې وحشتناک جنایت بللی دی.

ملوني په خپلې اېکس‌پاڼې لیکلي چې دې پېښې سخت ټکان ورکړی او ټینګار یې کړی چې د پېښې ټول جزئیات او اړخونه باید په بشپړه توګه وڅېړل شي، څو حقیقت روښانه او مسؤل کسان عدالت ته وسپارل شي.

نوموړې زیاته کړې چې د داسې تاوتریخوالي او بې‌رحمۍ لپاره هېڅ توجیه نشته او د قانون پلي کوونکي بنسټونه باید د عاملینو د محاکمې لپاره لازم اقدامات وکړي.

د ایټالیا لومړۍ وزیرې د قربانیانو له کورنیو سره هم خپله خواخوږي څرګنده کړې او د هغوی د درد په دې سخت وخت کې یې د ملاتړ ډاډ ورکړی دی.