د ایټالیا لومړۍ وزیرې جورجيا ملوني په دغه هېواد کې د درېیو افغانانو او یو پاکستاني د ژوندي سوځولو د پېښې په اړه ژوره خواشیني څرګنده کړې او دا یې وحشتناک جنایت بللی دی.
ملوني په خپلې اېکسپاڼې لیکلي چې دې پېښې سخت ټکان ورکړی او ټینګار یې کړی چې د پېښې ټول جزئیات او اړخونه باید په بشپړه توګه وڅېړل شي، څو حقیقت روښانه او مسؤل کسان عدالت ته وسپارل شي.
نوموړې زیاته کړې چې د داسې تاوتریخوالي او بېرحمۍ لپاره هېڅ توجیه نشته او د قانون پلي کوونکي بنسټونه باید د عاملینو د محاکمې لپاره لازم اقدامات وکړي.
د ایټالیا لومړۍ وزیرې د قربانیانو له کورنیو سره هم خپله خواخوږي څرګنده کړې او د هغوی د درد په دې سخت وخت کې یې د ملاتړ ډاډ ورکړی دی.
