د بریتانیا د بهرنیو چارو وزیرې ایوت کوپر په ټلیفوني خبرو کې له خپل ایراني سیال عباس عراقچي غوښتي چې د ایران حکومت دې پر معترضانو روان تاوتریخوالی سمدستي پای ته ورسوي.
کوپر د ایران د معترضانو پر ضد ځپنه او تاوتریخوالی وحشتناک بللی او ټینګار یې کړی چې تهران باید د خلکو اساسي حقونه او ازادۍ تضمین کړي او د بریتانیا د وګړو امنیت خوندي وساتي.
د امریکا د مرستیال ولسمشر جيډي ونس ویاند، د والسټریټ ژورنال هغه راپور غیر دقیق بللی چې پکې ویل شوي و، ونس هڅه کوي ولسمشر ډونالډ ټرمپ قانع کړي چې پر ایران له احتمالي برید مخکې یو ځل بیا ډیپلوماسي وازمويي.
د رویټرز خبري اژانس د راپور له مخې، د ونس د اړیکو مدیر ویلیام مارتین ویلي: «مرستیال ولسمشر او د بهرنیو چارو وزیر مارکو روبیو ولسمشر ته بېلابېل انتخابونه وړاندې کوي، چې له ډیپلوماتیکو لارو نیولې تر پوځي اقدام پورې شامل دي، او دا کار له هر ډول تعصب پرته ترسره کېږي.»
والسټریټ ژورنال د امریکايي چارواکو له قوله راپور ورکړی و، چې د ټرمپ د حکومت یو شمېر لوړپوړي سلاکاران، د مرستیال ولسمشر جيډي ونس په مشرۍ، له ولسمشر غواړي چې پر ایران له هر ډول پوځي اقدام مخکې، د ډیپلوماسۍ لاره وازمويي.
د بشري حقونو فعالې او د نوبل د سولې جایزې ګټونکې ملاله یوسفزۍ په ټولنیزه رسنۍ «ایکس» کې په یوه پیغام کې ویلي، چې د ایران خلک له کلونو راهیسې د سختو خطرونو په منلو سره د ځپنې پر ضد غږ پورته کوي، خو د هغوی غږ له لسیزو راهیسې چوپ ساتل شوی دی.
ملالې زیاته کړې: «دوی غواړي چې غږ یې واورېدل شي او دا حق ولري چې خپل سیاسي راتلونکی پخپله وټاکي. دا راتلونکی باید د ایران د خلکو له لوري جوړ شي او د ایراني ښځو او نجونو د مشرتابه رول پکې شامل وي، نه د بهرنیو ځواکونو او نه هم د ځپونکو حکومتونو.»
هغې ټینګار کړی چې د ازادۍ او انساني کرامت د غوښتنې په لاره کې د ایران د خلکو، ښځو او نجونو تر څنګ ولاړه ده.
په نوي ډیلي کې د طالبانو حکومت د سفارت سرپرست مفتي نور احمد نور د هند د بهرنیو چارو وزارت د افغانستان، ایران او پاکستان د څانګې له عمومي مسئول آنند پرکاش سره لیدنه کړې ده.
په هند کې د طالبانو حکومت د سفارت لهخوا خپرې شوې خبرپاڼې له مخې، په دې ناسته کې د دواړو لورو ترمنځ پر سیاسي او اقتصادي اړیکو، د سوداګرۍ د پراختیا، د ویزو د اسانتیاوو، او په هند کې د مېشتو افغان سوداګرو، محصلینو او نورو افغان اتباعو پر ستونزو بحث شوی.
خبرپاڼه زیاتوي چې دواړو خواوو د افغانستان او هند ترمنځ د اړیکو پر ټینګښت، د دوهاړخیزو همکاریو پر پراخولو او د دوامدار تعامل پر اړتیا ټینګار کړی دی.
د Insider Monkey (۲۰۲۳) د راپور له مخې، د نړۍ د هغو هېوادونو نوې درجهبندي خپره شوې چې پکې د جنسي اړیکو کچه لوړه بلل شوې ده.
په دې لېست کې هسپانیا لومړی، ایټالیا دوهم او سویس درېیم ځای لري.
راپور ښيي چې بریتانیا په دې درجهبندۍ کې ۱۳م مقام خپل کړی، په داسې حال کې چې هندوستان د لېست په پای کې، یعنې ۲۰م ځای کې راغلی دی.
دا درجهبندي د بېلابېلو ټولنیزو سروېګانو او څېړنیزو معلوماتو پر بنسټ جوړه شوې او د هېوادونو ترمنځ د ژوند د سبک توپیرونه څرګندوي.
د ایران د بهرنیو چارو وزیر عباس عراقچي له الجزیرې سره په مرکه کې ویلي، چې تهران باور نه لري امریکا دې دا مهال د منصفانه او عادلانه مذاکراتو لپاره چمتو وي؛ خو که واشنګټن چمتووالی وښيي، نو ایران به دا موضوع په جدي ډول وڅېړي.
عراقچي د امریکا له استازي ویتکاف سره د احتمالي لیدنې په اړه ویلي، چې ځینې نظریې پر مېز پرتې دي او دا مهال تر ارزونې لاندې دي.
هغه ټینګار کړی چې ایران له ګواښ پرته د اټومي مذاکراتو مېز ته د کېناستو لپاره چمتو دی.
د ده په وینا، له ویتکاف سره یې اړیکې د اعتراضونو تر مخه او وروسته هم روانې پاتې شوې او لا هم دوام لري.
اروپایي پارلمان کې د آلمان استازې هانا نویمان ویلي، چې د ایران ټول سفیران او استازي دې له اروپایي اتحادیې څخه وباسي او په دې یې تاکید کړی چې د ایران له حکومت سره د هېڅ ډول دیپلوماتیکو اړیکو عادي کول باید ونه وشي.
هانا نویمان په خپل ایکس حساب کې لیکلي، چې د هغه حکومتي ځواک سره د ډیپلوماتیکو اړیکو عادي کول ناممکن دي.
هغې دغه راز ویلي چې ایران پر سولهییزو اعتراضونو په وژونکي ډزو غبرګون ښيي او د خپلو خلکو ټولې ارتباطي لارې بندوي؛ نو باید د ایران حکومت سره اړیکې ونه رغول شي.
د ایران د پارلمان مشر محمدباقر قالیباف د امریکا د ولسمشر ډونالډ ټرمپ وروستي خبرداري ته په سختو ټکو غبرګون ښودلی دی.
قالیباف په مستقیمو ټکو وویل:
«موږ ستا لپاره د جګړې ډګر ته چمتو یو. راشه، تر څو ووینې چې ټول امکانات مو په سیمه کې له منځه ځي. راشه، ووینه چې د امریکا پر کښتیو، پوځي اډو او ځواکونو به څه بلا راشي.»
هغه ټرمپ ته په خطاب کې زیاته کړه:
«ای قمارباز ټرمپه! موږ ستا سیال یو. تا د مقاومت سردار شهید کړی، څو په خپل فکر مقاومت له منځه یوسې.»
قالیباف زیاته کړه: «راشه، تر څو د ایران د مدافعانو په اور کې داسې وسوځې چې د ظالمې امریکا لپاره د تاریخ د عبرت درس شې.»
وړاندې ډونالډ ټرمپ ادعا کړې وه چې د ایران لخوا ورته د خبرو وړاندیز شوی و، خو په وینا یې امکان لري له خبرو مخښکې پرې پوځي برید وکړم.
د ایران د مذهبي مشر علي خامنهاي له دفتر سره تړلې یوې خبرپاڼې د امریکا د ولسمشر ډونالډ ټرمپ لهخوا د احتمالي پوځي برید د خبرداریو په غبرګون کې ویلي، چې ایران د «ملي امنیت او خپلو ګټو» د دفاع په برخه کې له هېڅ ډول تعارف او ویرې کار نه اخلي.
په یادې خبرپاڼې کې ویل شوي، چې د ایران لپاره په دې برخه کې دا هېڅ توپیر نه لري چې معترضان په سړکونو کې دي او که د امریکا او اسرائیلو ګټې په نښه کېږي.
د «صدای ایران» په نوم دغه بولټن همداراز خبرداری ورکړی چې که پر ایران پوځي برید وشي، نو دوی به ورته د ۱۲ ورځنۍ جګړې په څېر سخت ځواب ورکړي.
د خیبر پښتونخوا د ټانک ولسوالۍ په ګومل سیمه کې د سړک غاړې په بمي چاودنه کې د ګومل پولیس سټېشن د سټېشن هاوس افسر (SHO) په ګډون لږ تر لږه شپږ پولیس وژل شوي دي.
چارواکي وایي، پېښه هغه مهال رامنځته شوه چې د پولیسو موټر د ګزمې پر مهال د سړک غاړې د ځای پر ځای شوي بم ښکار شو.
د چاودنې له امله موټر په بشپړ ډول له منځه تللی او ټول سپاره پولیس په کې وژل شوي.
ځایي چارواکو ویلي، چې تر پېښې وروسته امنیتي ځواکونو سیمه محاصره کړې او پلټنې یې پیل کړې دي.
تر اوسه د برید مسوولیت کومې ډلې نه دی منلی.