د خیبر پښتونخوا د ټانک ولسوالۍ په ګومل سیمه کې د سړک غاړې په بمي چاودنه کې د ګومل پولیس سټېشن د سټېشن هاوس افسر (SHO) په ګډون لږ تر لږه شپږ پولیس وژل شوي دي.
چارواکي وایي، پېښه هغه مهال رامنځته شوه چې د پولیسو موټر د ګزمې پر مهال د سړک غاړې د ځای پر ځای شوي بم ښکار شو.
د چاودنې له امله موټر په بشپړ ډول له منځه تللی او ټول سپاره پولیس په کې وژل شوي.
ځایي چارواکو ویلي، چې تر پېښې وروسته امنیتي ځواکونو سیمه محاصره کړې او پلټنې یې پیل کړې دي.
تر اوسه د برید مسوولیت کومې ډلې نه دی منلی.
ارمان افغان، حماسه میډیا
په ایران کې زرګونه مظاهرهچیان ورځ تر بلې په زیاتیدونکي شکل د اقتصادي ستونزو او د حکومت ضد غوښتنو په خاطر سړکونو ته د اعتراض په موخه راوځي، چې دا لړۍ ان د درېیمې اوونۍ لپاره هم دوام لري.
لومړنۍ مظاهرې د ژوند د سختوالي او اقتصادي فشارونو په اړه وې، خو اوس د اسلامي جمهوریت د بقا پر ضد د پراخو غوښتنو، د خلکو د صبر پای ته رسیدو نښه بلل کېږي.
د ایران امنیتي ځواکونو زرګونه کسان نیولي او سلګونه یې وژلي دي، همدارنګه د انټرنټ او تلیفون خدمات محدود شوي، څو د اعتراضونو لیدنه او رپوټونه محدود شي.
بل خوا د امریکا ولسمشر ډونالډ ټرمپ د ایران حکومت ته خبرداری ورکړی او د امکان تر حده یې د نظامي مداخلې نښې څرګندې کړي، خو شنونکي وايي چې د ایران قوي امنیتي ځواکونه او د رژیم ټینګ ملاتړ د هر بهرني اقدام اغیز لا هم محدودولای شي.
همدا رنګه د ټیلیګراف د معلوماتو له مخې، امریکايي پوځ سپینې ماڼۍ ته ویلي چې اوسنی پوځي حضور د داسې جګړې لپاره بسنه نه کوي او که واشنګټن بې له بشپړ چمتووالي برید وکړي، ایران به وکولای شي په چټکۍ سره د امریکا او د هغې د متحدینو پر اډو، بېړیو او ځواکونو په سیمه کې سخت غچ واخلي.
تر دې د مخه رویټرز خبري اژانس د اسرائیلو د درېیو سرچینو په حواله راپور ورکړی و چې په ایران کې د وروستیو کلونو د حکومتضدو تر ټولو لویو اعتراضونو د دوام او د امریکا د احتمالي مداخلې له امله، اسرائیل د لوړ تیارسۍ حالت ته داخل شوی دی.
بل خوا د ایران د بهرنیو چارو وزیر عباس عراقچی د تهران په غونډه کې د مقیمو بهرنیو سفیرانو پر وړاندې د هیواد د پراخو اعتراضونو په اړه وویل چې دا مظاهرې د «ترهګرو ډلو او داعش» فعالیتونه دي او «هغه څه چې اوس پیښیږي، مظاهره نه ده، بلکې د هیواد پر وړاندې ترهګریز جګړه ده.»
هغه همدارنګه وویل چې د ایران چارواکي د هغو غږیزو پیغامونو ثبتونه لري چې ترهګرو ته د ملکي وګړو او امنیتي ځواکونو پر وړاندې د ډزو امرونه پکې ورکړل شوي دي. عراقچی د امریکا ولسمشر ډونالډ ټرمپ د مظاهرهچیانو ملاتړ څرګندونې د ایران په کورنیو چارو کې مداخله وبللې او خبرداری یې ورکړ چې هیڅ هیواد حق نلري د بشري حقونو یا اعتراضونو په بهانه پوځي ګواښ وکړي.
دا مهال ایراني حکومت هڅه کوي د ولس ملاتړ بیرته تر لاسه کړي چې ولسمشر مسعود پزشکیان هم خلکو ته د مظاهرو د نه ګډون او د “ترهګرو” په توګه د بهرنیو اغیزو یادونه کړې، خو په ورته وخت کې یې د اقتصادي اصلاحاتو ژمنې کړي.
خو د ایران د پارلمان رییس محمدباقر قالیباف امریکا ته خبرداری ورکړی چې هر ډول پوځي اقدام به یوازې د ایران په ځواب پورې محدود نه پاتې کېږي، بلکې د امریکا او اسراییلو ستراتیژیکې پوځي اډې به هم د تهران د هدف په لېست کې شاملې شي.
شنونکي په دې ټینګار کوي چې ایران اوس له دوه اړخیز فشار سره مخ دی: له یوې خوا پراخ داخلي مخالفت، او له بلې خوا نړیوال فشار او د امریکا ګواښونه.
د اخوندي نظام اوږدمهاله بقا اوس نه یوازې په امنیتي ځواک پورې تړلې، بلکې په دې هم تړلې چې خلک د اقتصادي ستونزو او سیاسي محدودیتونو پر وړاندې څه اندازه زغم لري.
که حکومت د خلکو غوښتنو ته ځواب ورنه کړي، ممکن د سیاسي بې ثباتۍ او داخلي بحران خطر خورا زیات شي، او د اسلامي جمهوریت بنسټونه به په جدي توګه وازمایل شي.
د ایران تسنیم خبري اژانس د اسراییل د رسنیو په حواله راپور ورکړی چې د بنیامین نتنیاهو د دفتر رییس صخي براورمن نیول شوی دی.
د تسنیم د راپور له مخې، براورمن بهرنیو رسنیو ته د حساسو او پټو اسنادو د افشا کولو او سپارلو په تور نیول شوی دی.
د اسراییل ۱۲ چینل خبر ورکړی چې پولیسو د براورمن له نیول کېدو مخکې د هغه کور هم تلاشي کړی دی.
په ورته وخت کې، د هکرانو یوې ډلې ادعا کړې چې د صخي براورمن ټیلیفون یې هک کړی دی.
د ایران د بهرنیو چارو وزیر عباس عراقچي د تهران په غونډه کې د مقیمو بهرنیو سفیرانو پر وړاندې د هیواد د پراخو اعتراضونو په اړه ویلي چې دا مظاهرې د «ترهګرو ډلو او داعش» فعالیتونه دي.
نوموړي ویلي: «هغه څه چې اوس پیښیږي، مظاهره نه ده، بلکې د هیواد پر وړاندې ترهګریزه جګړه ده.»
هغه همدارنګه ویلي چې د ایران چارواکي د هغو غږیزو پیغامونو ثبتونه لري چې ترهګرو ته د ملکي وګړو او امنیتي ځواکونو پر وړاندې د ډزو امرونه پکې ورکړل شوي دي.
عراقچي د امریکا ولسمشر ډونالډ ټرمپ د مظاهرهچیانو ملاتړ څرګندونې د ایران په کورنیو چارو کې مداخله بللې او خبرداری یې ورکړی چې هیڅ هیواد حق نلري د بشري حقونو یا اعتراضونو په بهانه پوځي ګواښ وکړي.
هغه همدارنګه زیاته کړې چې په تیرو څو ورځو کې ۵۳ جوماتونه د معترضینو لخوا سوځول شوي دي.
د بریتانیا تلګراف ورځپاڼې د امریکایي چارواکو په حواله راپور ورکړی چې متحده ایالات د معترضانو د ځپلو له امله د ایران پر ضد د سایبري بریدونو د ترسره کولو لپاره د چمتووالي په حال کې دي.
تلګراف لیکلي چې د امریکا حکومت همدارنګه ایران ته د سټارلېنک ترمینلونو د لېږلو امکان ارزوي.
دا وسایل د سپوږمکۍ له لارې انټرنېټ برابروي او کولی شي فعالانو سره د مخابراتي محدودیتونو په شاوخوا تېرېدو کې مرسته وکړي.
د دې ورځپاڼې د راپور له مخې، د اسراییلو پوځ هم په هغه صورت کې چې امریکا د تاوتریخوالي له امله پر ایران برید وکړي، د لوړې تیارسۍ په حالت کې دی.
تلګراف زیاتوي چې راپورونه ښيي د اسراییلو پوځ کولی شي د امریکا د هوايي بریدونو ملاتړ وکړي او ځینې خپل ټاکلي هدفونه هم په نښه کړي.
د ملګرو ملتونو سرمنشي انتونیو ګوتریش په ایران کې د وروستیو لاریونونو پر مهال د لاریون کوونکو په وژلو خواشیني څرګنده کړې ده.
هغه په ایکس ټولنیزه شبکه کې ولیکل: «د هغو راپورونو له لوستلو سخت خواشینی او حیران شوی یم چې پکې ویل کېږي ایراني چارواکو د معترضانو پر وړاندې تاوتریخوالی او له حده زیات زور کارولی دی.»
نوموړي د ایران له چارواکو غوښتي چې په لویه کچه زغم وښيي او له غیر ضروري او نامتناسب زور کارولو ډډه وکړي.
ګوتریش همدارنګه د ایران له مسئولانو غوښتي چې «د معلوماتو د لاسرسي د تضمین لپاره عملي ګامونه پورته کړي، په ځانګړي ډول د انټرنېټي اړیکو د بیا ټینګولو له لارې.»
د استرالیا د بهرنیو چارو وزارت د دوشنبې په سهار د ایکس ټولنیزې شبکې له لارې بېړنی خبرداری خپور کړی او له استرالیایي وګړو یې غوښتي چې ژر تر ژره ایران پرېږدي.
په دې پیغام کې ویل شوي: «همدا اوس ایران پرېږدئ. د وتلو لپاره عادي هوايي لارې لا هم شته؛ خو په چټکۍ سره محدودېږي. د دې احتمال شته چې په نږدې راتلونکې کې هوايي حریم وتړل شي او الوتنې لغوه شي، چې په هغه صورت کې به وروسته وتل ناممکن شي. همدارنګه، کېدای شي د مخابراتي اړیکو نورې ستونزې هم رامنځته شي.»
د استرالیا د بهرنیو چارو وزارت زیاته کړې: «که تاسو زموږ د سپارښتنې خلاف په ایران کې پاتې کېږئ، نو د خپل خوندیتوب او امنیت بشپړ مسئولیت به ستاسو پر غاړه وي. چمتو اوسئ چې که اړتیا پېښه شي، په خپل استوګنځای کې پناه واخلئ او کافي اندازه اوبه، خواړه او درمل له ځان سره ولرئ.»
د دغو پیغامونو په پای کې ټینګار شوی چې په ایران کې د استرالیا د قونسلي خدمتونو د وړاندې کولو وړتیا ډېره محدوده ده.
فلسطینۍ لیکوالې، رشا حلوه په یوه خپره کړې ویډیو کې د ایران د خلکو د انقلابي پاڅون ملاتړ کړی او ویلي:«هغه حکومت چې خپل خلک وژني او خپلې ښځې ځپي، نه شي کولای زما ولس ازاد کړي او نه شي کولای ما ازاده کړي.»
رشا څرګنده کړې چې له کوچنیوالي ورته ویل کېدل چې د ایران اسلامي جمهوریت د فلسطین له ارمان سره ولاړ دی او د فلسطینیانو د ازادۍ ملاتړ کوي؛ خو اوس دا روایت ردوي.
نوموړې وایي چې د ایران د هغو خلکو تر څنګ ولاړه ده چې د ایران د حکومت پر ضد کوڅو ته راوتلي دي.
د هغې په وینا، د فلسطین خلک د ایران د حکومت تر څنګ نه دي ولاړ، بلکې د ایران د زړورو خلکو ملاتړ کوي چې د کرامت، ازادۍ او عدالت غوښتنه کوي؛ هماغه حقونه چې فلسطینیان یې هم د ځان لپاره غواړي.
رویټرز خبري اژانس د باوري سرچینو په حواله راپور ورکړی چې پاکستان د شاوخوا ۱.۵ میلیارده ډالرو د وسلو، بېپیلوټه او جنګي الوتکو تړون له سوډان سره د نهایي کولو په وروستیو پړاوونو کې دی.
د راپور له مخې، پاکستان پر سوډان ۱۰ کاراکورم‑۸ سپکې تهاجمي الوتکې، تر ۲۰۰ پورې بېپیلوټه الوتکې او د څارنې او بریدونو لپاره مخکښ پرمختللي هوایي دفاعي سیستمونه پلوري.
رویټرز ویلي، سربېره پر دې Super Mushshak روزنیزې الوتکې او احتمالاً JF‑17 جنګي الوتکې هم د تړون برخه کېدای شي.
رویټرز د خپلو سرچینو له قوله ویلي، چې دا معامله “په عملي ډول بشپړه شوې ده” خو د تحویلي مهالویش او دقیقو جزئیاتو په اړه رسمي اعلان نهدی شوی.
همدارنګه، امکان شته چې د دې معاملې مالي ملاتړ سعودي عربستان وکړي، خو تر اوسه رسمي نهدي تایید شوي.
د ایران د پخواني پاچا زوی، شاهزاده رضا پهلوي په یوه تازه ویډیویي پیغام کې اعلان کړی چې د ایران د رژیم پر ضد ولسي پاڅون نوی پړاو ته داخل شوی او ټینګار یې کړی چې د اسلامي جمهوریت نسکورېدل نږدې دي.
نوموړي ویلي، «موږ یوازې نه یو، نړیوال ملاتړ هم په لاره دی او ډېر ژر به ایران له اسلامي جمهوریت بېرته واخلو»، او د ایران له خلکو یې غوښتي چې رژیم ته «د بیا ساه اخیستو فرصت ور نه کړي».
پهلوي د ایران له دولتي کارکوونکو، امنیتي ځواکونو او پوځ څخه غوښتنه کړې چې د ولس تر څنګ ودرېږي او خبرداری یې ورکړی چې د رژیم ملاتړ به «تلپاتې شرم» ولري.
هغه ویلي چې حکومت د د معترضینو په پرځولو له سخت کمښت سره مخ دی او پر خلکو د ډزو زیاتېدل د کمزورۍ او د سقوط د وېرې نښه ده.
نوموړي همداراز د رژیم د تبلیغاتو او مخابراتو بنسټونه «مشروع هدفونه» بللي او ویلي، چې د خلکو پر ضد د تاوتریخوالي عاملین به بېځوابه پاتې نه شي.