د امریکا ولسمشر، ډونالډ ټرمپ په ریاض کې د خپل هېواد پر سفارت د برید او له ایران سره په روانه جګړه کې د امریکايي سرتېرو د وژل کېدو په اړه سخت غبرګون ښودلی دی.
نوموړي ویلي چې ایران به ډېر ژر د دې پېښې ځواب ترلاسه کړي او زیاته کړې یې ده: «زموږ ځواب به ژر روښانه شي.»
له دې وړاندې د سعودي عربستان د دفاع وزارت اعلان کړی و چې په ریاض کې د امریکا سفارت د ایران اړوند د دوو بېپیلوټه الوتکو هدف ګرځېدلی؛ خو د دوی په وینا په دغه برید کې د پام وړ زیان نه دی اوښتی.
په اسلام اباد کې د امریکا سفارت خپلې ورځنۍ چارې په موقتي ډول ځنډولې دي.
سفارت په یوه خبرپاڼه کې ویلي چې د اوسني امنیتي وضعیت له امله به په اسلاماباد کې سفارت او په لاهور او کراچۍ کې د امریکا کونسلګرۍ د جمعې تر ورځې پورې د ویزو ټولې ټاکل شوې مرکې لغوه کړي.
د خبرپاڼې له مخې، دا پرېکړه د امنیتي اندېښنو له امله شوې ده او د وضعیت له ارزونې وروسته به د هر ډول نوي بدلون په اړه نور معلومات له عامو خلکو سره شریک شي.
سفارت له مراجعینو غوښتي چې د نوې نېټې او لارښوونو لپاره د رسمي اعلاناتو څارنه وکړي.
د طالبانو حکومت ویاند، ذبیح الله مجاهد ویلي چې د افغانستان او پاکستان ترمنځ د ترینګلتیاوو په اړه د ملګرو ملتونو د امنیت شورا له راتلونکې غونډې هېڅ تمه نه لري.
ښاغلي مجاهد ویلي چې د امنیت شورا خپل اغېز او ارزښت له لاسه ورکړی دی.
نوموړي ادعا کړې چې افغانستان اوس مهال د پاکستان تر فشار او تېري لاندې دی، پر ملکي وګړو بریدونه کېږي او په پاکستان کې مېشت افغان کډوال له ګڼو ستونزو سره مخ دي؛ خو د هغه په وینا امنیت شورا یوازې پر تکراري موضوعاتو غونډې کوي او عملي پایله نه ورکوي.
هغه زیاته کړې چې افغانستان باید په دغو نړیوالو غونډو کې حضور ولري؛ خو په خبره یې ملګرو ملتونو له افغانستانه دا حق اخیستی دی.
دا په داسې حال کې ده چې تېره ورځ د ملګرو ملتونو امنیت شورا ویلي وو چې د روانې میاشتې په نهمه نیټه د افغانستان او پاکستان د وروستیو نښتو په اړه ځانګړې ناسته ترسره کوي.
د طالبانو حکومت د دفاع وزارت ویاند، عنایتالله خوارزمي، ویلي چې کندهار کې پر فرضي کرښه جګړه لا هم روانه ده.
خوارزمي ویلي چې دښمن مورال بایللی او په پرلهپسې ډول له سیمو شاتګ کوي.
نوموړي زیاته کړې چې تر دې مهاله یوازې په کندهار ولایت کې د پاکستاني ځواکونو لس امنیتي پوستې نیول شوې دي او له دغو پوستو سره یو شمېر غنیمتونه هم د دوی لاس ته ورغلي دي.
د جمهوري نظام د کورنیو چارو وزارت امنیتي مرستیال، جنرال خوشال سادات ویلي چې افغانستان نه د سیلانیانو ستر مرکز دی، نه د بهرنیو شرکتونو لپاره د پانګونې مهم بازار، او نه هم پکې د ټکنالوژۍ لویې تولیدي فابریکې شته.
نوموړي استدلال کړی چې پر افغانستان د بمبارۍ اغېز د پاکستان په پرتله کم دی؛ خو که جګړه د پاکستان لویو ښارونو ته وغځېږي؛ نو هلته به درانه زیانونه واوړي او پر ولس، سوداګرۍ او تولیدي سکټور به سخت فشار راشي.
جنرال سادات زیاته کړې چې افغان ولس له جګړو سره عادت شوی؛ خو د جګړې غږ د پاکستان د ښارونو پر مورال ژور اغېز کولی شي.
هغه د پوځي کارپوهانو له قوله ویلي: «تعرض تر ټولو ښه دفاع ده.»
د ننګرهار پخواني والي، ضیاءالحق امرخېل ویلي چې حکومتونه په سختو حالاتو کې خپلو ولسونو ته مراجعه کوي او د لا زیات ملاتړ د ترلاسه کولو لپاره ورسره سلا او مشوره کوي.
نوموړي زیاته کړې چې د طالبانو حکومت باید په اوسني حساس پړاو کې دوه مهم ګامونه پورته کړي.
د هغه په وینا، لومړی باید یوه پراخه او ټولګډونه لویه جرګه راوبلل شي چې د بېلابېلو قومونو او ټولنیزو قشرونو استازي پکې ګډون ولري، څو د هېواد د روان وضعیت په اړه بحث وشي او د ولس نظریات او ملاتړ ترلاسه شي.
ښاغلي امرخېل دوهم وړاندیز د نجونو د زده کړو د بیا پیل په اړه کړی او ویلي یې دي، له دې امله چې د نوي تعلیمي کال تر پیل پورې لږې ورځې پاتې دي، باید له اوسه د نجونو د ښوونځیو او پوهنتونونو د پرانیستلو اعلان وشي.
د هغه په باور، دا اقدام به د میلیونونو افغانانو زړونه وګټي.
د ننګرهار پخواني والي ټینګار کړی چې له بهرنیو دښمنانو سره مبارزه هغه وخت بریالۍ کېدای شي چې د ولس قاطع او پراخ ملاتړ موجود وي.
د طالبانو حکومت د دفاع وزارت د ویاند مرستیال صدیقالله نصرت ویلي چې د «اسلامي امارت» ځواکونو تر دې مهاله د پاکستان د پوځ اته امنیتي پوستې نیولې دي.
د هغه په وینا، له دغو پوستو څخه پنځه په کندهار، دوه په خوست او یوه په زابل ولایت کې نیول شوې ده.
نوموړي زیاته کړې چې جګړه لا هم روانه ده او نښتې دوام لري.
د طالبانو حکومت د دفاع وزارت ویاند عنایت الله خوارزمي ویلي چې د “رد الظلم” په نوم د عملیاتو په لړ کې د کندهار ولایت سپین بولدک ولسوالۍ اړوند سرو څاهانو سیمه کې د پاکستاني رژیم سره نښته کې یوه پوسته نیول شوې، یو عسکر ژوندی نیول شوی او درې تنه نور وژل شوي دي.
نوموړي په ایکس پاڼې لیکلي دغه عملیات نن شپه په 12:00 بجو د 205 البدر قول اردو شپږمې سرحدي لواء له لورې پیل شوې.
د کورنیو چارو وزارت پخواني ویاند طارق ارین ویلي، په داسې حال کې چې افغانستان د پاکستان تر بمبارۍ او تېري لاندې دی او ملکي وګړي زیانمن شوي، د پخواني حکومت یو شمیر چارواکي لکه میرویس ناب او نصیر اندیشه د پاکستان استخباراتي ادارې سره پټې ناستې کړي دي.
د نوموړي په وینا، ټاکل شوې د مارچ میاشتې په ترڅ کې په لندن کې یوه غونډه ترسره شي چې ظاهراً ملي بڼه لري، خو زمینهسازي یې د ISI له لوري شوې ده.
ارین ټینګار کړی چې په جلاوطنۍ کې سیاسي ډلې او اشخاص باید له تېر څخه درس واخلي، ځکه پاکستان هېڅکله د افغانستان د سولې او ثبات لپاره رښتینې طرحه نه ده لرلې او نه به یې ولري.
هغه دغه ډول تګلارې د وطن پر وړاندې خیانت او استخباراتي پروژه بللې ده.
تازه خبر:
د طالبانو حکومت لخوا د “رد الظلم” په نوم د عملیاتو په لړ کې نن شپه پر پاکستاني پوځیانو د ډیورینډ پر فرضي کرښه سخته جګړه پیل شوې.
د راپورونو له مخې یاده جګړه دا مهال د کندهار په شورابک، سرو څاهانو او معروف، د زابل په شملوزو او د خوست په علیشیرو کې روانه ده.
د کندهار په شورابک کې د پاکستاني پوځیانو څلور پوستې او معروف کې دوه پوستې دا مهال د طالب ځواکونو لاس ته لویدلي.