د ملګرو ملتونو د بشري چارو د همغږۍ دفتر (اوچا) ویلي، چې سویډن د افغانستان د بشري مرستو صندوق ته ۲۸ میلیونه سویډني کرونه، چې شاوخوا ۲.۹۹ میلیونه امریکایي ډالر کېږي، مرسته کړې ده.
اوچا زیاته کړې، چې دغه مالي مرسته به د بشري اړتیاوو د پوره کولو، د بېړنیو پېښو پر مهال د چټک غبرګون او له زیانمنو ټولنو سره د مرستو د دوام لپاره ولګول شي.
د ملګرو ملتونو د شمېرو له مخې، په افغانستان کې لا هم میلیونونه کسان بشري مرستو ته اړتیا لري، خو د مرستو د تمویل کچه د اړتیاوو په پرتله کمه ده.
اوچا له نړیوالو مرستندویانو غوښتي چې د بشري فعالیتونو د دوام لپاره خپلې مرستې زیاتې کړي.
یاد دفتر خبرداری ورکړی چې د بودجې کمښت ښایي د اړمنو افغانانو لپاره د مرستو رسولو بهیر له ستونزو سره مخ کړي.
