د پاکستان تر ادارې لاندې په آزاد کشمیر کې د لاریونونو او امنیتي ځواکونو ترمنځ د نښتو پر مهال څلور پاکستاني امنیتي سرتېري وژل شوي او شاوخوا ۲۰ نور ټپیان دي.

د پولیسو په وینا، پېښه د راولاکوټ ښار په ګډ پوځي روغتون (CMH) کې رامنځته شوې، چیرې چې د ګډ عوامي عمل کمېټې (JAAC) پر غړو تور لګول شوی چې پر امنیتي ځواکونو یې برید او ډزې کړې دي.

دا نښتې د جون د نهمې نېټې لپاره د ګډ عوامي عمل کمېټې له اعلان شوي احتجاج مخکې شوې دي. یاده ډله د کشمیري کډوالو لپاره د ځانګړو شویو ۱۲ پارلماني څوکیو د لغوه کېدو غوښتنه کوي.

بل لور ته، د دغې ډلې له خوا د پولیسو د ادعاوو په اړه تر اوسه کوم رسمي غبرګون نه دی ورکړل شوی.

د یادونې وړ ده چې د آزاد کشمیر حکومت څو ورځې وړاندې د ګډ عوامي عمل کمېټه ناقانونه اداره اعلان کړې وه او د دې ډلې لسګونه غړي یې نیولي وو. همدارنګه د آزاد کشمیر سترې محکمې تازه پرېکړه کړې چې د کشمیري کډوالو لپاره ځانګړې شوې څوکۍ د اساسي قانون له خوندیتوب څخه برخمنې دي او یوازې د اساسي قانون د تعدیل له لارې بدلېدای او لغوه کېدی شي.

د یمن د وسله‌والو ځواکونو ویاند اعلان کړی چې د سره سمندر له لارې د اسرائیلو اړوند پر ټولو بېړیو د تګ راتګ سمدستي بشپړ بندیز نافذ شوی دی.

ایراني رسنیو د دغه ویاند له قوله راپور ورکړی چې له دې وروسته به هېڅ داسې بېړۍ چې له اسرائیل سره اړیکه ولري، اجازه ونه لري چې د سره سمندر له لارې تېره شي.

د راپورونو له مخې، دا اقدام د اسرائیل د پوځي فعالیتونو او د سیمې د روانو کړکېچونو په غبرګون کې اعلان شوی دی.

تر اوسه د دې پرېکړې په اړه د نړیوالو سمندري ادارو یا نورو اړخونو رسمي غبرګون نه دی خپور شوی.

د اسټرالیا په یتر سوداګریز کرکټ لیګ بېګ باش کې لوی بدلون پلان شوی چې ښایي د مېلبورن دوه مشهورې لوبډلې مېلبورن سټارز او مېلبورن رېنېګډز سره یوځای شي.

همدارنګه ویل کیږي چې له ډلې یې یوه لوبډله د مالي سرچینو د برابرولو لپاره پلورل کیږي او نوي مالک ته به وسپارل شي.

دا دواړه لوبډلې شاوخوا ۱۵ کاله وړاندې جوړې شوې وې او د بېګ باش لیګ مهمه برخه بلل کېدې، د دې پرېکړې له امله د کرکټ مینه‌ والو غبرګونونه هم ښکاره کړي او ناخوښي یې څرګنده کړې ده.

خو د بېګ باش لیګ چارواکي وایي، دا بدلون د لیګ د ښه کولو او اقتصادي پیاوړتیا لپاره عملي کیږي.

د طالبانو حکومت د عدلیې وزارت اعلان کړی چې د «جهادي آثارو د ساتنې قانون» د دې ډلې د مشر شيخ هبت‌الله اخندزاده له لوري له توشیح وروسته رسمي شوی او خپور شوی دی.

د یاد وزارت په وینا، دغه قانون دوه فصلونه او ۱۴ مادې لري او د پلي کولو مسوولیت یې د اطلاعاتو او فرهنګ وزارت د جهادي آثارو د ساتنې ریاست ته سپارل شوی دی.

په قانون کې د دې ریاست دندو او جوړښت ته اشاره شوې چې پکې د تېرو شلو کلونو جګړې اړوند اسناد، مدارک او تاریخي مواد راټولول، ثبتول او تنظیمول شامل دي.

همدارنګه یاد ریاست مکلف شوی چې د افغانستان د معاصر تاریخ اړوند بېلابېلې دورې مستندې کړي، په ځانګړي ډول د شوروي اتحاد پر ضد جګړه، د برتانوي استعمار پر ضد جګړې، د طالبانو حکومت د لومړۍ واکمنۍ دوره او د امریکا په مشرۍ د ایتلافي ځواکونو پر ضد شل کلنه جګړه.

چارواکي وایي دا اقدام د تاریخي اسنادو د ساتنې او د راتلونکو نسلونو د پوهاوي لپاره ترسره کېږي.

په تېر حکومت کې د ننګرهار والي ضیاءالحق امرخېل د افغان سوداګر او پانګه وال میرویس عزیزي هغه هڅې او مرسته ستایلې چې پر مټ یې په قرغزستان کې د امریکایي پوهنتون افغان زده کړیالانو خپلې نیمګړې زده کړې بشپړې کړې.

ښاغلی امرخېل وایي، په اوسني وخت کې واقعي اتلان هغه دي چې د افغانانو لپاره د کار او زده کړو فرصتونه چمتو کوي.

نوموړي له میرویس عزیزي مننه کړې او زیاته کړې یې ده چې د افغان ځوانانو، په ځانګړي ډول د نجونو، د زده کړو د بشپړولو په برخه کې یې ملاتړ او خدمت د ستاینې وړ دی.

دا په داسې حال کې ده چې میرویس عزیزي وروسته له هغې چې د امریکا حکومت په قرغزستان کې د افغان زده کړیالانو د بورسونو له ملاتړ لاس واخیست، د یادو زده کړیالانو د زده کړو بهیر د بشپړولو لپاره ۵۰۰ زره امریکایي ډالر مرسته وکړه او دوه ورځې وړاندې یې د فراغت سندونه ترلاسه کړل.

د طالبانو د حکومت د امربالمعروف او نهې عن المنکر وزارت حماسه ميډيا ته ویلي چې په هرات کې د ښځو د نیولو په اړه خپاره شوي راپورونه او ګنګوسې بې‌اساسه او د دښمنانو تبلیغات دي.

یاد وزارت په خپلو څرګندونو کې ویلي چې په ټولنیزو رسنیو او ځینو رسنیزو راپورونو کې د ښځو د نیولو ادعاوې هیڅ حقیقت نه لري او دا موضوع کاذب پروپاګند بلل شوی دی.

د وزارت په وینا، هغه سرچینې چې دا ډول معلومات خپروي، په تېرو کلونو کې هم ناسم او بې‌اساسه راپورونه ورکړي دي او د دوی ادعاوو ته کوم معتبر شواهد نه شته.

وزارت ويلي:« د یادې موضوع په تړاو نه کوم شواهد شتون لري او نه اسناد، یواځې دین دوښمنه عناصر دیني اوامر ځکه هدف ګرځوي ترڅو افغانستان کې هم د غرب پڅیر د ښځو د حقوقو تر عنوان لاندې پریوتي معیارونه ترلاسه کړي.»

دغه وزارت زیاته کړې چې حجاب الهي امر دی، مسلمانې ښځې مکلفې دي چې حجاب وکړي او زمونږ لومړیتوب هم شرعي حجاب دی.

د طالبانو حکومت د پېښو پر وړاندې د چمتووالي ادارې ویاند، محمد یوسف حماد، ویلي چې د روان کال د حمل میاشتې له پیله تر اوسه په هېواد کې د اوبو کې د ډوبېدو له امله ۷۵ کسان مړه شوي او درې نور ټپیان شوي دي.

د نوموړي په وینا، په مړو شویو کسانو کې ۲۷ نارینه، ۷ ښځې او ۴۱ ماشومان شامل دي، چې ډېری پېښې د سیندونو، جهيلونو او د لامبو پر مهال رامنځته شوې دي.

حماد له خلکو غوښتي چې د اوبو ترڅنګ د تفریح او لامبو پر مهال د خوندیتوب اصول او د پېښو پر وړاندې د چمتووالي ادارې لارښوونې جدي ونیسي، څو د داسې دردناکو پېښو مخه ونیول شي.

چارواکي وایي چې هر کال د پسرلي او اوړي په موسمونو کې د ډوبېدو پېښې زیاتېږي، چې مهم علتونه یې د سیندونو د اوبو لوړوالی، د لامبو د مهارت نشتوالی او د کورنیو له څار پرته د ماشومانو اوبو ته نږدې کېدل بلل کېږي.

د معلوماتو له مخې، د دغو پېښو ډېره برخه قربانیان ماشومان وي، چې د احتیاطي تدابیرو د نه مراعت له امله خپل ژوند له لاسه ورکوي.

د طالبانو حکومت د صنعت او سوداګرۍ وزیر، نورالدین عزیزي، د ازبکستان د کرنیزو صنایعو د یوه شرکت له مشر، مراد قدرتوف، سره د سوداګریزو همکاریو د پیاوړتیا په موخه لیدنه کړې ده.

د صنعت او سوداګرۍ وزارت د معلوماتو له مخې، په دې کتنه کې د افغانستان د تازه مېوو د صادراتو د پراختیا، د نړیوالو بازارونو ته د لاسرسي او د سوداګریزو اړیکو د پراخېدو په اړه خبرې وشوې.

ازبک لوري څرګنده کړې چې ازبکستان، روسیې او یو شمېر اروپايي هېوادونو ته د افغان تازه مېوو د صادرولو لپاره لازم چمتووالی نیول شوی او د صادراتي بهیر د پراختیا لپاره مناسب شرایط برابر دي.

په غونډه کې دواړو لورو د کرنیزو محصولاتو د بازارموندنې، د سوداګریزو فرصتونو د زیاتولو او د افغانستان د تولیداتو لپاره د نویو نړیوالو بازارونو د موندلو پر اړتیا ټینګار کړی.

اسرائیلي ورځپاڼې اسرائیل هیوم د یوې باخبره سرچینې له قوله راپور ورکړی چې اسرائیل پر ایران خپل وروستی برید له امریکا سره په بشپړې همغږۍ ترسره کړی دی.

د راپور له مخې، د برید له ترسره کېدو وړاندې د دواړو هېوادونو ترمنځ امنیتي او پوځي سلا مشورې شوې وې او عملیات د ګډ تفاهم پر بنسټ مخته وړل شوي دي.

تر دې وړاندې د العربیه خبري شبکې هم د یوه اسرائیلي چارواکي له قوله ویلي وو چې د ایران د حکومت اړوندو هدفونو پر ضد ترسره شوی برید د امریکا له همغږۍ او ملاتړ پرته نه و.

دغه راپورونه په داسې حال کې خپرېږي چې په سیمه کې د ایران او اسرائیل ترمنځ کړکېچ لا هم دوام لري او د دواړو لورو ترمنځ بریدونه دوام لري.

په اسرائیل کې د امریکا سفیر مايک هاکبي د ټولنیزې شبکې ایکس له لارې د ایران له لوري پر اسرائیل د توغندیزو بریدونو په اړه غبرګون ښودلی دی.

هاکبي په خپل پیغام کې ویلي چې د ایران حکومت او د هغه اړوند نیابتي ځواکونه د امریکا او اسرائیل پر وړاندې یو جدي ګواښ ګڼل کېږي.

هغه زیاته کړې چې د سیمې ډېری امنیتي ستونزې او بې‌ثباتۍ له تهران څخه سرچینه اخلي.

د امریکا سفیر په خپلو څرګندونو کې ویلي: «د شیطان مور په تهران کې ده»، او په دې توګه یې د ایران پر حکومت سختې نیوکې کړې دي.