د طالبانو حکومت د کلیو د بیارغونې او پراختیا وزارت د پلان او پالیسۍ مرستیال، شرفالدین مسلم، بدخشان ولایت ته د سفر پر مهال د واخان ولسوالۍ د سړک د جوړولو له روانو چارو څخه لیدنه کړې ده.
نوموړي ویلي، د دې سړک په بشپړېدو سره به د واخان او پامیر سیمو د اوسېدونکو د تګ راتګ ستونزې کمې شي او افغانستان به د لومړي ځل لپاره د واخان دهلېز له لارې د سړک په مټ له چين سره مستقیمه نښلونکې لار ولري.
د وزارت د خبرپاڼې له مخې، د سړک د جغل اچونې او هوارولو چارې تر اوسه ۷۵ سلنه بشپړې شوې دي او پاتې رغنیز کارونه په چټکۍ سره دوام لري.
یاده پروژه چې ۳۶۵ میلیونه افغانۍ لګښت لري، د هېواد له مهمو ملي او ستراتیژیکو پروژو څخه ګڼل کېږي.
