د ایران مذهبي مشر ايت‌الله سید مجتبی خامنه‌يي د لوی اختر او حج په مناسبت په خپل پیغام کې ویلي، د اسلامي امت راتلونکی د «نوین اسلامي تمدن» پر لور روان دی او مسلمانان کولای شي د خپلې وړتیا او مسئولیت له مخې د دې راتلونکې په جوړولو کې ونډه واخلي.

هغه د «برائت از مشرکین» موضوع ته په اشارې سره ویلي، سږ کال د امریکا او اسرائیلو پر ضد دریځ ځانګړی اهمیت لري او دا مخالفت یوازې د حج تر مراسمو محدود نه دی، بلکې په اسلامي نړۍ کې به پراخ دوام ولري.

خامنه‌يي د ایران د وسلوالو ځواکونو او د مقاومت جبهې د فعالیتونو ستاینه هم کړې او ویلي چې د توغندیو او بې‌پیلوټه الوتکو له لارې امریکا او اسرائیل په نښه شوي دي.

نوموړي زیاته کړې، د «الله اکبر» شعار د اسلامي امت او د مقاومت د جبهې ترمنځ د یووالي لامل شوی او دا اړیکې له ایران، لبنان او فلسطین څخه تر عراق، سوریې، یمن، افغانستان او پاکستان پورې پراخې شوې دي.

پاکستان او چین په یوې ګډې اعلامیې کې ویلي چې دواړه هېوادونه به د افغانستان اړوند موضوعاتو کې خپلو نږدې اړیکو او همغږۍ ته دوام ورکړي.

په اعلامیه کې د چین، افغانستان او پاکستان ترمنځ د ۲۰۲۶ کال د اپرېل میاشتې درې‌اړخیزې خبرې مهمې بلل شوې او بیجینګ د کابل او اسلام‌اباد ترمنځ د اړیکو د پیاوړتیا لپاره د هڅو ملاتړ کړی دی.

دواړو هېوادونو همداراز د سي‌پېک پروژې، د ګوادر بندر پراختیا، سوداګرۍ، کرنې، انرژۍ، مصنوعي ځیرکتیا او امنیتي همکاریو په برخو کې د ګډ کار پر پراختیا ټینګار کړی دی.

اعلامیه زیاتوي چې د ترهګرۍ ضد مبارزه، سیمه‌ییز ثبات او د منځني ختیځ وضعیت هم د دواړو لورو د خبرو مهم محورونه وو.

له افغان کرکټ بورډ څخه باوري سرچینې حماسه ميډيا ته تایید کړه چې د هند خلاف راتلونکې ټیسټ لوبې ته افغان لوبډله سبا د اختر په لومړۍ ورځ هند ته ځي.

افغان لوبډله په يواځينۍ ټیسټ لوبه کې د جون په پنځمه نېټه له هند سره د سیالۍ ډګر ته ښکته کیږي.

د امریکا ولسمشر ډونالډ ټرمپ ویلي، د ایران غني شوي یورانیم باید یا سمدستي امریکا ته ولېږدول شي او له منځه یووړل شي، او یا هم د ایران له همغږۍ سره په بل ځای کې نابود کړل شي.

ټرمپ په خپلې ټولنیزې شبکې ټروت سوشیال کې لیکلي چې دا بهیر باید د اټومي انرژۍ نړیوالې ادارې تر څارنې لاندې ترسره شي.

دغه څرګندونې داسې مهال کېږي چې امریکايي چارواکي وایي، له ایران سره د یوه لومړني تړون لپاره خبرې روانې دي.

د امریکا د بهرنیو چارو وزیر مارکو روبیو ویلي، په قطر کې د دواړو لورو ترمنځ مذاکرات دوام لري او د تړون پر ابتدایي متن بحثونه روان دي.

نوموړي زیاته کړې چې د وروستي توافق بشپړېدل ښایي څو ورځې وخت ونیسي.

بلخوا، الجزیرې راپور ورکړی چې د قطر په منځګړیتوب د امریکا او ایران ترمنځ د تهران د کنګل شویو شتمنیو په اړه یو تفاهم رامنځته شوی او امکان شته ژر اعلان شي.

په همدې حال کې، د امریکا مرکزي قوماندانۍ (سینټکام) ویلي، ځواکونو یې د هرمز تنګي ته نږدې په ایران کې ځینې هدفونه په نښه کړي دي.

ایراني رسنیو هم د سپاه پاسداران د یو شمېر غړو د وژل کېدو خبر ورکړی.

افغان لوبغاړی راشد خان د خپل سفر او لوبیز ژوند څخه ډیر متاثر دی او هغه خپل ځان دې موقف او حالت کې لیدل یو ډیر غوره حس ګڼي.

راشد خان وروستي کلیپ کې ويلي:« اوس چې زه دې لوبغالو کې لوبیږم، هغه لوبغالي چې له نندارچیانو ډک وي د لوبو منځ کې چې ورته ګورم جلا او خوندور احساس راکوي.»

خان په هند غوره لیګ کې د لوبیدنې تر څنګ د بريالي لوبیدنې په پار ویلي:« که تېر لس یا دولس کاله وګورئ چې لا به یې فکر هم نه و کړی چې له افغانستان به یو څوک راځي او اې‌پي‌ایل کې به لوبیږي، دا زما لپاره لویه لاسته راوړنه ده، دا د یو رښتیا شوي خوب په څېر دی، چې دومره لوړ ځای کې لوبیږم او ښه ځلیږم»

د طالبانو د حکومت د ملي دفاع وزیر، مولوي محمد یعقوب مجاهد، د روسیې په کوربتوب د نړۍوال امنیتي کنفرانس کې د ګډون لپاره مسکو ته سفر کړی دی.

دغه کنفرانس چې ټاکل شوې د مې میاشتې له ۲۶مې تر ۲۹مې پورې دوام وکړي، د نړۍ د ګڼو هېوادونو او نړیوالو سازمانونو د استازو په ګډون ترسره کېږي.

د غونډې اصلي موضوعات سیمه‌ییز امنیت، د ترهګرۍ پر ضد مبارزه، او د هېوادونو ترمنځ امنیتي همکارۍ بلل شوي دي.

راپورونه ښيي چې د طالبانو حکومت استازي به په دې ناسته کې د افغانستان د امنیتي وضعیت، سیمه‌ییز ثبات او له نورو هېوادونو سره د همکاریو په اړه خپل دریځ وړاندې کړي.

د سریلانکا هیواد تجربه لرونکی ویکټ ساتوونکی توپ وهوونکی کوسال مېنډس د یاد هیواد د شل اوریزو او ورځینو لوبو لوبډلمشر وټاکل شو.

مېنډس په لومړي ځل د ویسټ انډیز خلاف راتلوونکي لوبلړیو کې د لوبډلمشرۍ مسؤلیت ترلاسه کوي.

یاد سریلانکایې لوبغاړي (۷۳) ټېسټ، (۱۵۴) یو ورځنۍ او (۱۰۶) شل اوریزې لوبې ترسره کړي چې د سریلانکا هیواد له تجربه لرونکو او کلیدي لوبغاړو ګڼل کیږي.

د امریکا د بهرنیو چارو وزیر مارکو روبيو د ایران اړوند وروستیو بریدونو ته په غبرګون کې ویلي، د سمندري تنګیو لارې باید خلاصې پاتې شي او په هر ډول به پرانیستې وساتل شي.

روبیو د قطر په منځګړیتوب د ایران او امریکا د مذاکراتو په اړه ویلي، د هوکړې د لومړني متن پر سر خبرې لا هم روانې دي او د نهایي متن بشپړول ښايي څو ورځې وخت ونیسي.

د امریکا د بهرنیو چارو وزیر ټینګار کړی چې واشنګټن د سیمې د سمندري لارو د خوندیتوب او د نړیوالې سوداګرۍ د دوام لپاره خپلې هڅې جاري ساتي.

د الجزیرې د راپور له مخې، د قطر په منځګړیتوب د امریکا او ایران ترمنځ د تهران د کنګل شویو شتمنیو پر سر مهم تفاهم ته د رسېدو احتمال زیات شوی دی.

الجزیرې د خپلو سرچینو له قوله ویلي، چې په دوحه کې د ایراني لوړپوړي پلاوي او قطري چارواکو ترمنځ ترسره شویو خبرو کې د امریکا او ایران ترمنځ د مالي شتمنیو د ازادولو په تړاو پرمختګ شوی دی.

سرچینې الجزیرې ته ویلي، د ایران لپاره د دې موضوع د ځانګړي اهمیت له امله تمه کېږي، چې د دواړو هېوادونو ترمنځ احتمالي هوکړه ښايي نن، سه شنبه په رسمي ډول اعلان شي.

تر دې دمه واشنګټن او تهران په رسمي ډول د دغه راپور په اړه څه نه دي ویلي.

د امریکا ولسمشر ډونالډ ټرمپ په ټروت سوشیال کې د مصنوعي ځیرکتیا له لارې جوړ شوی انځور خپور کړی او د بارک اوباما او جو بایډن د دورې سیاستونه یې له خپلې دورې سره پرتله کړي دي.

ټرمپ لیکلي، په پخوانیو امریکايي حکومتونو کې ولسمشرانو له ایران سره د خبرو غوښتنه کوله، خو تهران به د پوځي اقدام ګواښونه کول؛ په داسې حال کې چې د نوموړي په وینا، دی و چې ایران یې وګواښه او وروسته تهران خبرو ته حاضر شو.

هغه همداراز د بارک اوباما یو بل مصنوعي انځور خپور کړی چې پکې د نغدو پیسو له یوې لویې زېرمې سره ښکاري.

ټرمپ ادعا کړې چې د اوباما سیاستونو د ایران په اړه د جګړې د رامنځته کېدو زمینه برابره کړې ده.