د افغانستان د پخواني ولسمشر محمد اشرف غني دوو نږدې سرچینو بيبيسي ته ویلي، چې نوموړی له متحده عربي اماراتو وتلی او دا مهال په یوه خوندي ځای کې دی.
دا څرګندونې وروسته له هغې کېږي چې اشرف غني د لوی اختر په مناسبت له شاوخوا شپږو میاشتو چوپتیا وروسته ولس ته پیغام خپور کړی.
هغه په اېکس کې لیکلي، که څه هم په دې موده کې یې غږ خلکو ته نه رسېده؛ خو زړه یې هېڅکله له ولسه لرې نه و.
تر اوسه څرګنده نه ده چې نوموړی کوم هېواد ته تللی؛ خو احتمال دی چې هغه لبنان ته تللی.
د یادونې ده چې هغه له ۲۰۲۱ کال راهیسې، پر افغانستان د طالبانو حکومت له واکمنېدو وروسته، په متحده عربي اماراتو کې د سیاسي پناه غوښتونکي په توګه ژوند کاوه.
