د طالبانو حکومت په ایټالیا کې د درې افغان کډوالو د وژل کېدو پېښه غندلې ده.

د طالبانو د حکومت د بهرنیو چارو وزارت ویاند، عبدالقهار بلخي، د ایټالیا د کوزنزا ولایت د امېندولارا په سیمه کې د درې افغان کډوالو د وژل کېدو پېښه زړه بوږنوونکې او غیرانساني بللې او د قربانیانو له کورنیو او خپلوانو سره یې خواخوږي څرګنده کړې ده.

بلخي پرته له دې چې د پېښې د شکمنو کسانو هویت ته اشاره وکړي، د ایټالیا له حکومت غوښتي چې د پېښې په اړه هر اړخیزې، رڼې او دقیقې څېړنې ترسره کړي او عاملان یې عدالت ته وسپاري.

د راپورونو له مخې، درې افغان او یو پاکستانی کډوال په یوه موټر کې ژوندي سوځول شوي دي.

د دې پېښې په تړاو دوه پاکستاني وګړي نیول شوي او ویل کېږي چې د کار او مزد د پیسو پر سر د رامنځته شوي اختلاف له امله دغه پېښه رامنځته شوې ده.

امریکایي رسنیو ويلي، افغان الاصله امریکايۍ سیاستواله او د کلیفورنیا ایالتي سناتوره عایشه وهاب د کلیفورنیا د ۱۴مې کانګرس حوزې د استازولۍ لپاره د ټاکنو په لومړنیو پایلو کې لومړی مقام خپل کړی دی.

د لومړنیو پایلو له مخې، عایشه وهاب ۳۶ سلنه رایې ترلاسه کړې او د ډبلین پخوانۍ ښارواله ملیسا هرنانډیز د ۱۶ سلنه رایو په ترلاسه کولو دویم مقام خپل کړی دی.

عایشه وهاب، له ۲۰۲۲ کال راهیسې د کلیفورنیا د ایالتي سنا غړې ده او تر دې وړاندې یې د هایوارډ ښاروالۍ شورا کې هم دنده ترسره کړې ده.

نوموړې د کلیفورنیا د سنا لومړنۍ افغان الاصله او مسلمانه غړې بلل کېږي.

دغه ټاکنیزه سیالي وروسته له هغې رامنځته شوه چې د کانګرس پخواني غړي اېرېک سوالویل د جنسي ناسم چلند د تورونو له راپورته کېدو وروسته له خپلې دندې استعفا ورکړه او د والي له ټاکنیزې مبارزې هم ووت.

د ایران د بهرنیو چارو وزیر عباس عراقچي په ټولنیزه شبکه ایکس کې لیکلي چې د دغه هېواد وسله وال ځواکونه د دفاعي بریدونو په حال کې دي.

هغه ویلي: «زموږ وسله وال ځواکونه د مشروع ځان‌دفاع د حق په چوکاټ کې پر هغو ځایونو بریدونه کوي چې له هغه ځایه متحده ایالاتو ته اجازه ورکول کېږي څو د ملکي کښتیو پر ضد بریدونه وکړي او اوربند نقض کړي.»

عراقچي همدارنګه ټینګار کړی: «هر ډول دښمنانه اقدام به له سمدستي او قاطع ځواب سره مخ شي.»

په چین کې د طالبانو حکومت سفیر مولوي اسدالله بلال کریمي له خپل هندي سیال ویکرم دورایسوامي، سره په بیجینګ کې لیدلي او د دواړو هېوادونو ترمنځ د اړیکو او همکاریو پر پراختیا یې خبرې کړې دي.

د خپرو شویو معلوماتو له مخې، په دې لیدنه کې دواړو لورو د افغانستان او هند د خلکو ترمنځ پر تاریخي او تمدني اړیکو بحث کړی او د ګډو ګټو په برخو کې یې د همکاریو د پیاوړتیا لپاره د روانو هڅو هرکلی کړی دی.

دا لیدنه په داسې مهال ترسره کېږي چې په وروستیو کلونو کې د هند او افغانستان ترمنځ ډیپلوماتیک تماسونه زیات شوي او دواړه لوري د اړیکو د ساتلو او همکاریو د پراخولو لپاره خپلو هڅو ته دوام ورکوي.

د ۲۰۲۶ کال فوټبال نړیوال جام سیالیو اصلي جام د نړیوال سفر په ترڅ کې نن د امریکا په نیویارک ښار کې اېښودل شوی و.

دغه جام د امریکا د طبیعي تاریخ په موزیم کې د نیویارک د ښاروال زهران ممداني په شتون کې نندارې ته وړاندې شو.

مینه وال به وکولی شي له نږدې دغه جام وګوري او یادګاري انځورونه ورسره واخلي.

د ۲۰۲۶ کال فوټبال نړیوال جام د امریکا، کاناډا او مکسیکو په ګډ کوربتوب د روانې جون میاشتې په ۱۱مه پیلیږي.

په دې سیالیو کې به د بېلابېلو هېوادونو ۴۸ لوبډلې ګډون ولري او لوبې به یې د جولای تر ۱۹مې په ۱۶ ښارونو کې دوام ولري.

د اسرائیلو لومړي وزیر بنیامین نتنیاهو ویلي چې د امریکا له ولسمشر ډونالډ ټرمپ سره یې د ایران اړوند پر مهمو او اساسي موضوعاتو توافق کړی دی.

نتنیاهو په یوې مرکې کې ویلي چې د ایران موضوع لا پای ته نه ده رسېدلې؛ خو په وینا یې تهران د پخوا په پرتله کمزوری شوی او وړتیاوې یې زیانمنې شوې دي.

هغه زیاته کړې چې د ایران د اټومي پروګرام او سیمه‌ییزو فعالیتونو په اړه لا هم مهمې مسلې شته چې باید حل شي، او اسرائیل به د خپلو امنیتي اندېښنو په اړه له امریکا سره نږدې همغږي وساتي.

دا په داسې حال کې ده چې تېره ورځ ډونالډ ټرمپ له نتنیاهو سره د لبنان د جګړې په اړه توندې خبرې کړې وې او ډونالډ ټرمپ نتنياهو لېونی بللی و.

رحمان‌ الله ګربز وايي، د‌ سريلانکا غوره ليګ سږني پړاو کې نه شي لوبېدلی ځکه د افغانستان کورنیو سیالیو کې ګډون ته ژمن دی.

ګربز په خپله انسټاګرام سټوري د لنکا غوره لیک کنډي رویلز لوبډلې ته خبر ورکړی چې غواړي د افغانستان په کورني شپږیزه لیګ کې ولوبیږي.

نوموړي له یادې لوبډلې مننه کړې او ويلي يې دي چې د ده پر ځای دې بل لوبغاړی پیدا کړي.

رحمان‌ الله ګربز دوه ورځې وړاندې د سریلانکا غوره لیګ یا لنکا پریمیر لیګ په ډرافټ کې کنډي رويلز لوبډلې په پلاټينم کېټګورۍ کې په 50 زره امریکايي ډالرو واخيست.

دا په داسې حال کې ده چې د سریلانکا غوره او د افغانستان شپږیزې لیګ سږني فصلونه د مهالوېش له مخې له یو بل سره ټکر کوي له همدې امله ګربز په شپږیزه لیګ کې لوبېدل غوره کړي دي.

د امریکا ولسمشر ډونالډ ټرمپ منلې چې د ټیلیفوني خبرو پر مهال یې د اسرائیلو لومړی وزیر بنیامین نتنیاهو «لېونی» بللی و.

ټرمپ په یوې تازه مرکې کې ویلي چې هغه د لبنان د جګړې د دوام له امله له نتنیاهو څخه ناخوښ و او غوښتل یې چې جګړه ودرول شي.

نوموړي زیاته کړې چې له نتنیاهو سره یې اړیکې لا هم ښې دي؛ خو د جګړې د پراخېدو له امله اندېښمن و.

د راپورونو له مخې، ټرمپ د ټیلیفوني خبرو پر مهال له نتنیاهو غوښتي وو چې د لبنان جګړه پای ته ورسوي او د سیمې د کړکېچ د پراخېدو مخه ونیسي.

ټرمپ همداراز هغه ادعاوې رد کړې چې ګواکې نتنیاهو د ایران پر ضد د اقدام لپاره دوکه ورکړې ده، او پر خپلو منتقدینو یې نیوکې کړې دي.

د هند د پلازمېنې ډیلي پولیسو ویلي چې د ښار په یوه څلور پوړیز هوټل کې د اورلګېدنې له امله لږ تر لږه ۲۱ کسان مړه شوي او یو شمېر نور ټپیان دي.

د چارواکو په وینا، اور د شپې ناوخته ولګېد او د ژغورنې ډلې سمدستي سیمې ته ورسېدې.

د اور د چټک خپرېدو له امله ګڼ کسان په ودانۍ کې بند پاتې شوي وو.

پولیسو ویلي چې د اورلګېدنې د علت په اړه پلټنې روانې دي، خو تر اوسه د پېښې اصلي لامل نه دی څرګند شوی.

راپورونه ښيي چې دا د ډیلي په وروستیو کلونو کې له تر ټولو خونړیو اورلګېدنو څخه ده.