د بلوچستان په بېلابېلو سیمو کې د سختو بارانونو له امله مرګژوبله او مالي زیانونه اوښتي دي.
د راپورونو له مخې، په دې پېښو کې اووه کسان وژل شوي چې دوه یې ماشومان دي، او څلور نور کسان ټپیان شوي دي.
د ناورینونو د مدیریت ادارې ویلي چې دغه پېښې د کیچ، لورلايي، کوهلو، جعفراباد او کچي ولسوالیو کې رامنځته شوې دي.
چارواکي زیاتوي چې د دوامدارو ورښتونو له امله لسګونه کورنۍ زیانمنې شوې دي، او لږ تر لږه ۲۲ کورونه په بشپړه توګه ویجاړ شوي دي.
د یادې ادارې په وینا، زیانمنو سیمو ته د مرستو رسولو هڅې روانې دي، خو لا هم ډېری کورنۍ له ستونزو سره مخ دي او بېړنیو مرستو ته اړتیا لري.
