د طالبانو حکومت د بهرنیو چارو وزارت ویاند حافظ ضیاء احمد تکل وايي، د «اسلامي امارت» له لوري یو امریکايي بندي د بشري ملاحظاتو پر بنسټ خوشې شوی دی.

د تکل په وینا، د بندي د کورنۍ، په ځانګړي ډول د هغه د مور له لوري د عفوې غوښتنې لیک د «اسلامي امارت» مشر ته تر رسېدو وروسته، د سترې محکمې له لوري د نوموړي د بند موده کافي وبلل شوه او د خوشې کېدو پرېکړه یې وشوه.

هغه زیاته کړې چې د بهرنیو چارو وزیر امیر خان متقي په کابل کې د افغان سولې لپاره د امریکا د پخواني ځانګړي استازي زلمي خلیلزاد، د متحده عربي اماراتو سفیر سیف الکتبي او د یاد بندي د کورنۍ له غړو سره په ناسته کې ټینګار کړی، چې «اسلامي امارت» بهرني وګړي د سیاسي موخو لپاره نه نیسي.

د تکل له قوله، متقي ویلي چې دواړه لوري باید خپلو اتباعو ته معیاري قونسلي خدمات وړاندې کړي او افغانستان په دې برخه کې بشپړ چمتووالی لري.

نوموړي همداراز ویلي، متقي د محمد بن زاید آل نهیان په مشرۍ د متحده عربي اماراتو له حکومت څخه د همکارۍ مننه کړې او د قطر رول یې هم ستایلی دی.

تکل د زلمي خلیلزاد له قوله ویلي، چې د بندي خوشې کېدل یو مثبت ګام دی او باید د دواړو لورو ترمنځ خبرې دوام ومومي.

په داسې حال کې چې په لندن کې د طالبانو د حکومت د مخالفینو غونډه روانه ده، خو دې غونډې ته یو شمیر بلل شویو افغان سیاستوالو له ګډون څخه ډډه کړې ده.

د پکتیا پخواني والي حلیم فدایي، د کابل پخوانی والي احمدالله علیزي او سیاسي فعال جاوید همدرد په ګډون یو شمېر نورو سیاستوالو او د مدني ټولنو استازو، د پاکستان د پرله‌پسې مداخلې پر وړاندې د اعتراض په توګه له دې غونډې سره پرېکون اعلان کړی دی.

د کابل والي احمدالله علیزي حماسه میډیا سره په خبرو کې وویل:« زه دعوت شوی وم، خو په غونډه کې مې اشتراک ونه کړ.»

همدا راز حماسه میډیا هڅه کړې چې په خپلواک ډول غونډه کې د نه ګډون د لامل په اړه د یادو څېرو نظرونه ترلاسه کړي، خو د پرله‌پسې اړیکو سره سره هغوی د لا ډېرو جزیاتو له شریکولو ډډه وکړه.

ایران ویلي چې د اسراییل پر تل‌ابیب یې توغندیز برید کړی دی.

د راپورونو له مخې، د اسراییل د لټون او ژغورنې ډلې د ښار مرکزي سیمو ته استول شوې دي، ځکه چې د ایراني توغندیو د لګېدو راپورونه ورکړل شوي دي.

له سیمې خپرو شویو ویډیوګانو کې لوګی لیدل کېږي او بیړني ټیمونه د ژغورنې چارې پر مخ وړي.

لومړني معلومات ښيي چې د برید له امله یوه ودانۍ زیانمنه شوې یا نړېدلې ده، خو تر اوسه د مرګ‌ژوبلې او نورو زیانونو په اړه رسمي جزییات نه دي خپاره شوي.

ټاکل شوې، چې د اسلام‌آباد کنفرانس دوهم پړاو دا ځل د لندن په کوربه‌توب د افغانستان د سیاسي راتلونکي پر بدیلو سناریوګانو تمرکز کوي.

د معلوماتو له مخې، په دې ناسته کې به د طالبانو حکومت مخالف افغان سیاستوال د پاکستان له نفوذ لرونکو سیاسي څېرو سره د احتمالي ګډ دریځ او سیاسي همغږۍ په اړه بحثونه وکړي.

سرچینې زیاتوي، چې دا غونډه یوازې د خبرو اترو تر کچې نه ده محدوده، بلکې د راتلونکو سیاسي حرکتونو لپاره د یوې همغږې اجنډا پر جوړولو هم تمرکز لري.

همداراز ویل کېږي، چې د پاکستان سیاسي کړیو له خوا د افغانستان له بېلابېلو قومي او سیاسي ډلو سره اړیکې زیاتې شوې دي، څو د طالبانو حکومت پر وړاندې یو پراخ سیاسي چوکاټ رامنځته شي.

د ایران دولتي رسنۍ تسنیم خبري اژانس راپور ورکړی، چې افغانه میرمنه کوثر عادلي چې په ایران کې مېشته وه، تیره ورځ په لومړیو ساعتونو کې د امریکا او اسرایيل د بریدونو په ترڅ کې ژوند له لاسه ورکړ.

د راپور له مخې، یادې مېرمنې د خیرآباد په استوګنیزو سیمو کې د ترسره شویو بریدونو پر مهال وژل شوې.

تسنیم خبري اژانس زیاته کړې، چې کوثر عادلي د هغو افغان کډوالو له ډلې وه، چې په ایران کې یې ژوند کاوه.

د طالبانو حکومت تر واک لاندې د کونړ ولایت د اطلاعاتو او کلتور ریاست مسولینو منلې، چې په تېرو ۲۴ ساعتونو کې د پاکستاني پوځ له خوا د کونړ په ناړۍ او مرورې ولسوالیو ۲۴ د توپونو بریدونه شوي دي.

چارواکو زیاته کړې، چې په دې تازه بریدونو کې چا ته د سر زیان نه دی اوښتی، خو د خلکو امنیت او روانه ارامه فضا لا هم له ګواښ سره مخ ده.

پاکستان په مقرر ډول نږدې هره ورځ د افغانستان په یوشمیر ولایتونو د توپونو ګوازرونه کوي او ملکي خلکو ته ځاني او مالي زیان اړوي.

وای‌نټ ویب‌سایټ د باوري سرچینو له قوله راپور ورکړی چې د ایران د بهرنیو چارو وزیر عباس عراقچي، په یوه ټیلیفوني تماس کې سټیو ویتکاف ته ویلي، د نوي مذهبي مشر مجتبي خامنه‌ای موافقه یې د امریکا سره د خبرو او احتمالي موافقې ترلاسه کولو لپاره ترلاسه کړې ده.

سرچینې وایي، عراقچي په دې تماس کې په ډاګه کړې: «زه دلته یم ځکه چې د مجتبي خامنه‌ای موافقه او تایید مو ترلاسه کړی دی، ترڅو که زموږ شرایط پوره شي، د موضوع پای ته رسول ژر تر ژره ممکن شي.»

د جرمني د بهرنیو چارو وزارت وايي چې په برلین کې د افغانستان سفارت تر اوسه د پخواني منل شوي سفیر تر واک لاندې کار کوي او د کارکوونکو یا مشرتابه د بدلون په اړه هېڅ رسمي معلومات نه دي شریک شوي.

د یاد وزارت ویاند مارتین ګېزه ټینګار کړی چې د هر نوي سفیر د منلو لپاره د کوربه هېواد رسمي رضایت ضروري دی، خو په دې قضیه کې داسې کومه غوښتنه یا تایید تر دې دمه نه دی شوی.

بل لور ته، مخکې داسې راپورونه خپاره شوي وو چې ګواکې د طالبانو حکومت یو ډیپلوماټ په برلین کې د سفارت مسؤلیت اخیستی.

په دې تړاو د طالبانو حکومت تر اوسه څه نه دي ویلي.

د هوا پېژندنې نړیوال سازمان (ډبلیو ایم او) په خپل تازه راپور کې ویلي چې له ۲۰۱۵ څخه تر ۲۰۲۵ کال پورې ۱۱ پرله‌پسې کلونه د تاریخ تر ټولو ګرم ثبت شوي کلونه دي.

د راپور له مخې، ۲۰۲۵ کال د تاریخ دویم یا درېیم تر ټولو ګرم کال بلل شوی او د ځمکې د هوا او سمندرونو تودوخه لا هم په چټکۍ لوړېږي.

همداراز ویل شوي چې د کنګلونو ویلې کېدل دوام لري او سختې اقلیمي پېښې هم زیاتې شوې دي.

د هوا پېژندنې نړیوال سازمان (ډبلیو ایم او) زیاتوي چې د شدیدې ګرمۍ څپې، درانه ورښتونه او پراخې طبیعي پېښې په بېلابېلو سیمو کې د لویو زیانونو لامل شوي دي.

د امریکا مرکزي قومندانۍ (سنتکام) ویلي، چې د ایپیک فیوري په نوم عملیاتو له پیل راهیسې، د ایران اړوند له ۹ زرو زیات اهداف د امریکا په هوايي بریدونو کې په نښه شوي دي.

د سنتکام د معلوماتو له مخې، دغه بریدونه د ۹ زرو څخه د زیاتو جنګي الوتنو په ترڅ کې ترسره شوي، او په پایله کې له ۱۴۰ څخه زیاتې سمندري بېړۍ یا ویجاړې شوې او یا زیانمنې شوې دي.

په نښه شوو اهدافو کې د قوماندې او کنټرول مرکزونه، د سپاه پاسداران د قرارګاه ودانۍ، استخباراتي مرکزونه، د هوايي دفاع مدغم سیستمونه، د بالستیک توغندیو اډې، د سمندري ځواکونو کښتۍ، د بېړۍ ضد توغندیو مرکزونه او پوځي لوژستیکي تاسیسات شامل دي.

سربېره پر دې، د امریکا پوځ ویلي چې په دغو عملیاتو کې یې له پرمختللو هوايي وسایلو کار اخیستی، چې پکې: ۱ بم غورځوونکې الوتکه، بي-۲ پټه بم غورځوونکې الوتکه، بي-۵۲ ستراتیژیکه بم غورځوونکې الوتکه، اېف-۱۸ جنګي الوتکه، اېف-۲۲ پټه جنګي الوتکه، اېف-۳۵ پټه جنګي الوتکه، اېف-۱۶ جنګي الوتکه، اې-۱۰ بریدیزه الوتکه، اېف-۱۵ جنګي الوتکه، اي‌اې-۱۸ جي برېښنايي جګړې الوتکه، اې‌سي-۱۳۰اچ درنه بریدیزه الوتکه، يو-۲ کشفي الوتکه او ار سي-۱۳۵ کشفي الوتکې، شاملې دي.