د امریکا ولسمشر ډونالډ ټرمپ ویلي چې ایران په رښتینې توګه د یوې هوکړې د ترلاسه کولو هڅه کوي او باور لري چې احتمالي توافق به د امریکا او د هغې د متحدینو لپاره ګټور وي.
ټرمپ په خپلې ټولنیزې شبکې تروث سوشیال کې لیکلي: «ایران واقعاً غواړي یوې هوکړې ته ورسېږي، او دا به د امریکا او زموږ د متحدینو لپاره یوه ښه هوکړه وي.»
نوموړي خپلو منتقدانو ته په خطاب کې ویلي چې باید ارام پاتې شي، ځکه د ده په وینا، په پای کې به هر څه ښه تمام شي.
د امریکا ولسمشر همداراز د خپلو سیاسي مخالفانو پر دریځونو نیوکه کړې او ویلي یې دي چې ځینې ډیموکراټان او یو شمېر جمهوري غوښتونکي په دوامداره توګه متضادې غوښتنې مطرح کوي؛ کله ترې غواړي چې چټک اقدام وکړي، کله ورو حرکت وکړي، کله جګړې ته داخل شي او کله هم له جګړې ډډه وکړي.
د ټرمپ په وینا، دغه ډول پرلهپسې فشارونه او سیاسي څرګندونې د ده لپاره د مذاکراتو بهیر او د سمې پرېکړې نیول لا ستونزمن کوي.
