فاکس نیوز په یوه راپور کې لیکلي چې د ايران مذهبي مشر مجتبی خامنهيي د ډونالډ ټرمپ د هغو هڅو په غبرګون کې چې غواړي د ابراهیم تړون پراخ کړي، د امریکا تر مشرۍ لاندې نظم پر ضد د یوه سیمهییز ائتلاف د جوړولو هڅه کوي او غواړي د «نوې اسلامي تمدن» تر بیرغ لاندې د منځني ختیځ هېوادونه سره راټول کړي.
په راپور کې راغلي چې مجتبی خامنهيي د امریکا د نفوذ پر ضد په منځني ختیځ کې یو سیاسي او ایډیالوژیک کمپاین پیل کړی او هڅه کوي د سیمې هېوادونه د تهران تر مشرۍ لاندې د اسلامي یووالي پر لور وهڅوي.
فاکس نیوز وايي چې د تهران وروستي تحرکات یوازې څو ساعته وروسته له هغه پیل شول، کله چې ټرمپ د سعودي عربستان، متحده عربي اماراتو، قطر، ترکیې، پاکستان، مصر، اردن او بحرین له مشرانو سره د ابراهیم تړون د پراختیا په اړه خبرې وکړې.
ټرمپ همدارنګه د مې په ۲۵مه په ټروث سوشيال ټولنیزه شبکه کې د دې تړون د پراختیا ملاتړ کړی و.
د فاکس نیوز د راپور له مخې، یوه ورځ وروسته مجتبی خامنهيي په ایکس کې په هغه پیغام کې چې ده ته منسوب شوی، د «نوې اسلامي تمدن» د جوړېدو غوښتنه وکړه او له اسلامي دولتونو یې وغوښتل چې د اسلامي امت د پرمختګ او د اسلامي نړۍ د ستونزو د حل لپاره له یو بل سره همکاري وکړي.
