د ولسي جرګې پخوانۍ غړې فوزیه کوفي وايي، د ښځو لپاره د طالبانو د مشرانو د نیولو امر صادرول په اوسنۍ کړکېچن او تیاره فضا کې د تازه هوا تنفس دی.
فوزیه کوفي له سيانان سره په مرکه کې د طالبانو حکومت د لوړو زده کړو د وزیر ندا محمد ندیم او د امربالمعروف د وزیر خالد حنفي د نیولو غوښتنه کړې.
نوموړې ویلي، هیله لري چې د طالبانو حکومت د پوهنې د وزیر په ګډون د نورو طالب چارواکو په تړاو هم ورته اقدام وشي.
هغې زیاته کړې، چې طالب چارواکي باید د نسل وژنې پر بنسټ د بشریت ضد جرمونو په ترسره کولو کې حساب شي.
د هېواد پخواني ولسمشر حامد کرزي د بدن د ښکلا اتل علي رضا اساهي مړینه یوه ستره ضایعه بللې ده.
ښاغلي کرزي په ایکس کې لیکلي، چې علي رضا اساهي یو زیارکښ ځوان و چې د بدن د ښکلا په برخه کې یې په خپلو هڅو سره اتلولي ترلاسه کړه.
نوموړي د اساهي له کورنۍ سره خپله خواخوږي څرګنده کړې ده.
افغان لوبغاړي راشد خان د بدن ښکلا ملي لوبغاړي علي رضا اساهي له کورنۍ سره د مرستې اعلان کړی.
راشد له نورو هېوادوالو هم غوښتي چې د علي رضا اساهي د کورنۍ لاسنیو وکړي.
علي رضا اساهي پرون پنجشنبه کابل کې د زړه د حملې له کبله ساه ورکړه.
نوموړي دوه ځل د بدن ښکلا په نړیوالو سیالیو کې ګډون کړی و چې د سرو زرو مډالونه یې ګټلي وو.
د افغانستان لپاره د ملګرو ملتونو ځانګړی راپور ورکوونکي ریچارډ بینېټ د شیخ هبت الله او عبدالحکیم حقاني د نیولو له حکم هرکلی کړی.
نوموړي ویلي، دا طالبانو ته یو څرګند پیغام دی، چې ټولې کړنې یې څارل او بررسي کېږي.
د بینېټ په خبره، دا فرمان افغانانو ته هم ډاډ ورکوي چې د دوی حقونه هیر شوي نه دي.
د یادونې ده چې د جرمونو نړیوالې محکمې د یادو کسانو د نیولو حکم کړی دی.
د نړيوالې جنايي محکمې څارنوال کریم خان ویلي، چې د طالبانو حکومت مشر شیخ هبت الله اخوندزاده او د یادې ډلې د سترې محکمې رییس عبدالحکیم حقاني باید ونیول شي.
کریم خان ویلي، شیخ هبت الله او عبدالحکیم د بشر ضد جرمونه کوي.
تر.اوسه د طالبانو حکومت دې خبرې ته کوم غبرکون نه دی ښودلی.
د طالبانو حکومت د ریاستالوزرا اقتصادي مرستیال ملا عبدالغني برادر په افغانستان کې د قطر سفارت له شارژدافیر مُردف القاشوطي سره کتلي.
د طالبانو د ریاستالوزرا اقتصادي مرستیال دفتر په یوې خبرپاڼه کې ویلي چې دواړو لوریو په دې کتنه کې د کابل او دوحې ترمنځ د اقتصادي اړیکو د پراختیا په تړاو خبرې کړې دي.
خبرپاڼه زیاتوي، چې ملا برادر په دې ناسته کې د طالبانو، امریکا او د افغانستان د تېر حکومت ترمنځ د مذاکراتو اسانتیا د رامنځته کولو لپاره د قطر له کوربهتوب ستاینه کړې ده.
په دې ناسته کې ملا عبدالغني برادر قطري پانګوالو ته بلنه ورکړې چې افغانستان کې پانګونه وکړي.
خبرپاڼه کې دغه راز ویل شوي، چې د قطر سفارت شارژدافیر ویلي، چې هېواد یې د طالبانو له حکومت سره د اړیکو د پراختیا په لټه کې دی او په وینا یې چې هېواد یې د کابل او دوحې ترمنځ د مسافرو او سوداګریزو توکو د الوتنو د زیاتوالي لپاره کار کوي.
خبرپاڼه کې ویل شوي، چې قطر به ډېر ژر د کندهار ولایت په میرویس روغتون کې د ۴۰۰ نویو بسترونو د جوړونې پروژه پیل کړي.
د خیبر پښنونخوا په ټانک سیمه کې د پاکستان دوه ایفسي ځواکونه وژل شوي.
سرچینې وایي، چې په وژل شویو کسانو کې یو یې افسر وو.
د دغه بریدونو مسؤلیت تر اوسه چا نه دی منلی.
بل لورته د جنوبي وزیرستان په سراروغه سیمه کې څلور پاکستاني پولیس هم د وسله والو له لوري تښتول شوي دي.
د طالبانو حکومت د کابل امنیه قومندانۍ پخوانی ویاند «جنرال» مبین د طالبانو حکومت ته ویلي چې د کبر له خبرو لاس واخلي.
هغه په خپله ایکسپاڼه لیکلي، چې ملت نور د بدبختیو توان نلري او دا ملت یوازې د جنګولو لپاره نه دی پیدا شوی.
مبین وایي، بیا به هرڅه له لاسه وتلي وي او هیچاته به مخ نه لرئ.
نوموړی وایي، د زدکړو دروازې تړل شوي او د ملت هرې خبرې ته توند او مایوسه کوونکی ځواب ورکول کېږي.
هغه د طالبانو پر حکومت نیوکه کړې چې لاهم د زده کړو ستونزې ته حل لاره نه لري.
د امریکا په لاس انجلس کې لګېدلی اور لا تازه شوی او له یو شمېر سیمو څخه خلکو ته د وتلو امر شوی.
سیمهییز چارواکي وایي ۳۱ زره کسانو ته خبرداری ورکړل شوی، چې خپل کورونه پریږدي.
بل لورته رسنیو ویلي چې د تېرې دوشنبې ورځ د بادونو له کبله د دغه اور شدت زیات شوی او زرګونه هکتاره نوره ځمکه یې هم سوځولې.
د جنوبي وزیرستان په سراروغه سیمه کې څلور پاکستاني پولیس تښتول شوي دي.
سیمهییز چارواکي وایي، چې وسله والو د پولیسو پر پوسته برید کړی او وروسته یې څلور پولیس اسیران بیولي.
یادې نښتې یو ساعت دوام کړی.
تر اوسه د پېښې مسؤلیت چا نه دی منلی.