امریکايي رسنۍ اکسیوس د دوو امریکايي چارواکو او یوې بلې باخبرې سرچینې له قوله راپور ورکړی چې د امریکا ولسمشر ډونالډ ټرمپ او د اسراییلو لومړي وزیر بنیامین نتانیاهو ترمنځ د دوشنبې ورځې ټلیفوني خبرې له تاوتریخوالي او سختو خبرو ډکې وې.

د راپور له مخې، ټرمپ د لبنان په اړه د اسراییلو د پوځي عملیاتو د پراخېدو له امله پر نتانیاهو سختې نیوکې وکړې او د بیروت پر ضد د احتمالي برید له پلان سره یې مخالفت څرګند کړ.

سرچینو ویلي چې ټرمپ په خبرو کې نتانیاهو بې‌پروا وباله او هغه یې د نه مننې په چلند تورن کړ.

همدارنګه یې خبرداری ورکړ چې پر بیروت برید به اسراییل په نړیواله کچه لا منزوي کړي او د نړیوال فشار کچه به لوړه کړي.

د راپور له مخې، ټرمپ نتانیاهو ته یادونه کړې چې په تېرو کلونو کې یې د هغه ملاتړ کړی او حتی د فساد قضیو پر مهال یې ورسره سیاسي مرسته کړې وه.

د امریکا ولسمشر ډونالډ ټرمپ په خپل تروت سوشیال کې لیکلي چې له ایران سره مذاکرات په چټکۍ روان دي.

ټرمپ د هغو راپورونو په اړه چې ګواکې ایران د لبنان پر ضد د اسراییلو د پوځي عملیاتو له امله له امریکا سره د پیغامونو تبادله درولې، ویلي: «دا راته هېڅ مهمه نه ده، زه ورته هېڅ اهمیت نه ورکوم.»

نوموړي همدارنګه ویلي چې له بنیامین نتانیاهو سره یې ډېرې رغنده خبرې کړې دي.

د هغه په وینا، بیروت ته به هېڅ پوځي ځواک ونه لېږل شي او هغه ځواکونه چې د تګ په حال کې وو، بېرته ګرځول شوي دي.

ټرمپ زیاته کړې چې د لوړپوړو استازو له لارې یې له حزب الله سره هم ښه تماسونه لرلي او توافق شوی چې ټولې ډزې او نښتې ودریږي.

د هغه په وینا، اسراییل به پر حزب‌الله برید نه کوي او حزب‌الله به هم پر اسراییلو برید نه کوي.

د امریکا ولسمشر ډونالډ ټرمپ اعلان کړی چې د لبنان په اړه د اوربند پر یوې موافقې سلا شوې ده.

ټرمپ ویلي چې له اړوندو خواوو سره د خبرو اترو او ډیپلوماتیکو هڅو په پایله کې د جګړې د درولو او د تاوتریخوالي د کمولو لپاره پر اوربند توافق شوی دی.

نوموړي ټینګار کړی چې د اوربند موخه د ملکي وګړو خوندیتوب، د سیمې ثبات او د جګړې د پراخېدو مخنیوی دی.

هغه هیله څرګنده کړې چې ټولې ښکېلې خواوې به د موافقې درناوی وکړي او د سولې د ټینګښت لپاره به عملي ګامونه پورته کړي.

د افغانستان لپاره د پاکستان ځانګړي استازي محمد صادق خان ویلي، د اروپایي ټولنې له لوړپوړو چارواکو سره یې د سیمې د سیاسي او امنیتي وضعیت په اړه خبرې کړې دي.

نوموړي په خپله ایکس پاڼه لیکلي چې د اروپایي ټولنې د بهرنیو اړیکو د خدمتونو د اسیا او سوېل ختیځې آسیا سیمې له عمومي مدیر اریک کورزویل او د افغانستان لپاره د اروپایي ټولنې له ځانګړي استازي ژیل برتران سره یې لیدلي او په یو لړ موضوعاتو یې بحث کړی دی.

د صادق خان په وینا، په دې لیدنه کې د ترهګرۍ او امنیتي ګواښونو په اړه خبرې وشوې، په ځانګړي ډول د پاکستاني طالبانو یا (ټي‌ټي‌پي) او د بلوڅ ازادۍ غوښتونکې ډلې (BLA) فعالیتونه یاد شول چې د پاکستان په ادعا له افغان خاورې فعالیتونه تنظیمړي.

محمد صادق ویلي، دواړو لورو د سیمې د امنیتي ننګونو د حل لپاره د همغږو او ګډو هڅو پر اهمیت ټینګار کړی او د اړیکو او تعامل د دوام غوښتنه یې کړې ده.

دا لیدنه او څرګندونې داسې مهال کېږي چې پاکستان په وروستیو میاشتو کې د افغانستان له خاورې د وسله‌ والو ډلو د فعالیتونو په اړه خپلې اندېښنې بیا بیا مطرح کړې دي، خو د طالبانو حکومت دا ادعاوې ردوي.

د روسیې د بهرنیو چارو وزارت ویاندې ماریا زاخارووا د رومانیا د هغې پرېکړې په غبرګون کې چې د روسیې د قونسلګرۍ د فعالیت لپاره یې خپل رضایت بېرته اخیستی، ویلي چې دغه غیر دوستانه اقدام به حتمي ځواب ولري.

زاخارووا ویلي: «د رومانیايي چارواکو غیر دوستانه ګامونه به خامخا له متقابل غبرګون سره مخ شي. د ځواب ځانګړي اقدامات به په مناسب وخت کې اعلان شي.»

د رومانیا حکومت په دې وروستیو کې د روسیې د قونسلګرۍ د فعالیت د اجازې د لغوه کولو پرېکړه کړې، هغه اقدام چې د دواړو هېوادونو ترمنځ یې ډیپلوماتیک کړکېچ لا زیات کړی دی.

تر اوسه روسیې د احتمالي متقابلو اقداماتو جزئیات نه دي خپاره کړي؛ خو مسکو خبرداری ورکړی چې د رومانیا دا پرېکړه به بې ځوابه پاتې نه شي.

دا به داسې حال کې ده چې څو ورځې وړاندې یوه روسي بې پيلوټه الوتکه د رومانيا په يوه اپارتمان ولګېده چې مرګ ژوبله یې هم لرله.

د اسراییلو پوځ د لبنان پلازمېنې بيروت د جنوبي سیمو (ضاحیه) اوسېدونکو ته د بیړني وتلو امر کړی او ویلي یې دي چې په دغو سیمو کې به د حزب‌الله پر هدفونو بریدونه ترسره کړي.

د دې اعلان وروسته زرګونه کورنۍ له خپلو کورونو د وتلو په حال کې لیدل شوي دي.

د اسراییلو لومړي وزیر بنیامین نتنیاهو ویلي چې د لبنان په جنوب او د بیروت په جنوبي سیمو کې به عملیات پراخ شي.

اسراییل ادعا کوي چې حزب‌الله د اوربند له شرایطو سرغړونه کړې او پر شمالي اسراییل یې راکټي بریدونه کړي دي.

د لبنان چارواکو او سیمه‌ییزو سرچینو راپور ورکړی چې د ایستلو امر له خپرېدو وروسته په ضاحیه او نورو سیمو کې پراخې کډوالۍ پیل شوې دي.

د لبنان حکومت د اسراییلو دا ګام غندلی او د جګړې د پراخېدو په اړه یې خبرداری ورکړی دی.

د ملګرو ملتونو د ماشومانو د ملاتړ صندوق یا یونیسف په خپل تازه بیان کې د نړیوال بانک له ډلې (World Bank Group) سره د ګډ پروګرام یادونه کړې او ویلي یې دي چې د ماشومانو د لومړنۍ ودې پروګرام له لارې په افغانستان کې د مور او پلار د مهارتونو د لوړولو هڅې روانې دي.

دغه سازمان وایي، مور او پلار د ماشومانو لومړني ښوونکي دي او دوی هم ملاتړ او روزنې ته اړتیا لري.

د یونیسف په وینا، د مور او پلار د ملاتړ پروګرام له مخې به په شپږو ولایتونو کې شاوخوا ۱۰ زره مور او پلار وروزل شي، څو د ماشومانو د روزنې مهارتونه ترلاسه او پیاوړي کړي او په دې توګه نږدې ۲۰ زره ماشومان تر پوښښ لاندې راځي.

یونیسف ویلي د دې هڅو موخه دا ده چې ماشومانو ته په ژوند کې غوره پیل ورکړل شي او هغوی ته د ودې، زده‌کړې او روغتیا ښه فرصتونه برابر شي.

د ایران له سپاه پاسداران سره تړلې خبري اژانس تسنیم راپور ورکړی چې تهران د لبنان پر ضد د اسراییلو د روانو بریدونو له امله له امریکا سره د منځګړو له لارې د پیغامونو تبادله درولې ده.

ایران ویلي چې تر هغه وخته به هېڅ ډول خبرې او ډیپلوماتیک تماسونه ونه شي، څو چې په لبنان او غزه کې د اسراییلو پوځي عملیات ونه درېږي.

د ایران د بهرنیو چارو وزارت ویاند اسماعيل بقايي ویلي چې د امریکا متضاد دریځونه او د اسراییلو دوامدار بریدونه د خبرو اترو بهیر ټکنی کړی دی.

هغه ټینګار کړی چې د سیمې د هر ډول احتمالي توافق یوه مهمه برخه باید په لبنان کې د اوربند عملي کېدل وي.

سعودي عربستان د لبنان پر ضد د اسرائیلو وروستي بریدونه غندلي او د لبنان خاورې ته د اسرائیلي ځواکونو ننوتل یې د دغه هېواد د ملي حاکمیت سرغړونه بللې ده.

د سعودي د بهرنیو چارو وزارت په اعلامیه کې راغلي چې ریاض د لبنان پر وړاندې د اسرائیلو پوځي اقدامات ردوي او له نړیوالې ټولنې غواړي چې د دې بریدونو د درولو او د لبنان خاورې ته د اسرائیلو د پوځي پراختیا مخه ونیسي.

سعودي عربستان د لبنان د حاکمیت او د لبناني ولس د حقونو پر ساتنې ټینګار کړی او ویلي یې دي چې دا چاره باید د نړیوالو اصولو او تړونونو له مخې خوندي شي.

اعلامیه زیاتوي چې د لبنان د سیاسي جوړجاړي د تړون پلي کېدل مهم دي، څو د لبنان دولت وکولای شي پر خپلې ټولې خاورې بشپړ واک ولري.

سعودي چارواکو همداراز د لبنان د حکومت د هغو پرېکړو ملاتړ کړی چې له مخې یې وسلې باید یوازې د دولت او رسمي امنیتي بنسټونو په واک کې وي.

د دوی په وینا، دا کار به په لبنان کې د امنیت او ثبات د ټینګښت لپاره مرسته وکړي.

راپورونه ښیي چې د کرکټ نړیوالې شورا (ICC) د کاناډا په کرکټ بورډ بشپړ بندیز ولګاوه او غړیتوب یې هم ترې واخیست.

د معلوماتو له مخې، د کاناډا کرکټ بورډ د آی سي سي اسوسیېټ غړی و خو د پراخ مالي او اداري فساد له امله ترې غړیتوب واخیستل شو.

خو د کاناډا کرکټ ملي لوبډلې وضعیت له بندیز سره نه دی بدل شوی، لا هم د آی سي سي په نړیوالو ټورنمټونو کې د لوبېدو اجازه لري.

دا په داسې حال کې ده چې څه موده وړاندې آی سي سي پر یاد کرکټ بورډ د شپږو میاشتو لپاره مالي بندیز هم ولګاوه.

په دې وروستیو کې د کاناډا کرکټ بورډ د اداري او مالي درغلۍ او فساد له تورونو سره مخ دی، په تېر شل اووریز نړیوال جام کې د دغه هېواد د ملي لوبډلې یوه لوبه لا هن د فکسېنګ د شک له امله د آی سي سي د فساد ضد څانګې تر څارنې لاندې ده.