د بلخ چهاربولک کې د ساتل شویو چاودېدونکو توکو د چاودنو له کبله درې کورونه ویجاړ شوي دي.
سیمهییزو سرچینو ویلي، چې پېښه کې چاته ځاني زیان نه دی اوښتی.
دا پېښه د هغو ۲۲ راکټ مرمیو د چاودونو له کبله رامنځته شوې چې په پټه ساتل کېدې.
د دغو راکټ مرمیو د ساتنې پټنځای کې لومړی ګاز ډبه چاودلې، چې وروسته مرمیو هم چاودنې کړې.
د افغان ښځو لپاره د امریکا ځانګړې استازې رینا امیري وايي، سره له دې چې افغانې ښځې په بد وضعیت کې دي، خو دوی بیا هم خپلې هیلې مړې کېدو ته نه پرېدي.
امیري د ژولیا پارسي او نیلا ابراهیمي له لوري د نړیوالو جایزو د اخیستلو هرکلی کړی او زیاته کړې یې ده، چې د دوی دا کار د افغان ښځو او نجونو د عزم څرګندونه کوي.
د یادونې ده، چې ژولیا پارسي تېره اوونۍ د مارتین انالز او نیلا ابراهیمي د ماشومانو سولې نړیوالې جایزې تر لاسه کړې.
یو شمېر افغانو ښځو له ډونالډ ټرمپ غوښتي چې له طالبانو سره د سولې تړون لغوه کړي.
دوی ویلي، دغه تړون نه یوازې دا چې د افغانستان لپاره سوله او ثبات رانه وست؛ بلکې په کور دننه او نړیواله کچه یې هم بحراني پایلې ولرلې.
یادو ښځو په یو لیک کې لیکلي، واک ته د طالبانو تر رسېدو وروسته طالبانو په افغانستان کې ښځې او نجونې ځپلي او لاهم دا لړۍ جریان لري.
د یادونې ده چې تر دې وړاندې هم یو شمېر بنسټونو له ټرمپ غوښتي چې د دوحې تړون عملي کړي.
په نړۍ کې د روانو جګړو له کبله ۲۰۲۴ کال د ملګرو ملتونو د مرستندویانو لپاره مرګونی کال وو.
د ملګرو ملتونو سازمان ویلي، روان کال یې ۲۸۱ مرستندویان وژل شوي دي.
د بشري چارو او بېړنیو مرستو د همغږۍ په برخو کې د دغه سازمان نوي مرستیال ټام فلچر ویلي، چې د دوی مرستندویانو خپله زړورتیا او اخلاص د بمونو او مرمیو قرباني کړ.
د دغو مرستندویانو د وژل کېدو راپورونه په اوکراین، غزه، یمن او افغانستان کې ورکړل شوي دي.
د یادونې ده چې تېر کال په شلو هېوادونو کې د ملګرو ملتونو ۲۸۰ مرستندویان وژل شوي وو.
د افغانستان د ژغورنې لپاره د مقاومت شورا غړی او د پوهنتون استاد حبیب الرحمن سیاف د افغانستان لپاره د کاناډا له ځانګړي استازي ډیویډ سپراول سره کتلي.
ښاغلي سیاف حماسه میډیا ته ویلي، چې په دې لیدنه کې یې د نورو مسایلو ترڅنګ افغانستان کې د ټوله شموله حکومت جوړېدو په اړه خبرې کړې.
نوموړي ویلي، په لیدنه کې پر دې ټینګار شوی، چې طالبان باید د خلکو او په ځانګړي ډول د ښځو حقونه ورکړي.
حبیب الرحمان سیاف د طالبانو تر واک لاندې افغانستان یو زندان ته ورته بللی او زیاته کړې یې ده چې هېواد باید له دغه وضعیت څخه را ووېستل شي.
د جمهوري حکومت د بهرنیو چارو سرپرست وزیر حنیف اتمر د بغلان ولایت په نهرین ولسوالۍ کې پر یوه زیارت د ناپېژاندو وسله والو برید په کلکو ټکو غندلی.
ښاغلي اتمر په خپله ایکسپاڼه لیکلي، چې د بې طرفه نړیوالې څیړنې غوښتنه کوي.
نوموړي زیاته کړې چې، دا پېښه یو ځل بیا د افغانستان د خلکو د دښمنانو جنایت او د خلکو د امنیت په تامینولو کې د اوسني مسلط شوي حکومت بې کفایتي ښکاره کوي.
د پښتون ژغورنې غورځنګ مخکښ غړی حنیف پښتین وایي، چې د پاکستاني پوځ لوري په بکاخېل سردې خیل او جانېخېل کې نااعلان شوي پوځي عملیات روان دي.
حنیف پشتین په خپله اکسپاڼه لیکلي، چې د پاکستاني پوځ دغه عملیات د عامو خلکو خلاف ترسره کیږي.
نوموړي ویلي:«پوځیانو د خلکو کورونه مورچې ګرځولي، ناروغانو ته د تګ راتګ اجازه نه ورکوي، خلک نشي کولای چې کاروبارونو او د روزمره ژوند په کارونو پسې له کوره بهر ووځي.»
هغه هلته په میشتو پښتنو غږ کړی چې ددې سیمې ټول قومونه باید په یوه غږ ددې جبر خلاف ودریږي او پوځ ته اجازه ورنکړي چې دا سیمه چور او تالان کړي.
اروپایي ټولنې یو وار بیا ویلي، چې دوی په افغانستان کې د ټولو لپاره یو ډول د زدکړو حقونه غواړي.
یادې ټولنې د زدکړو اوونۍ په مناسبت لیکلي، لوستي افغانان اقتصادي ودې او همېشني پرمختګ کې مهم رول لري.
اروپایي ټولنې تر دې وړاندې هم افغانستان کې د ټولو لپاره د یو ډول زدکړو غوښتنه کړې وه.
د بغلان ولایت په نهرین ولسوالۍ کې د نامعلومو وسله والو له لوري ۱۲ تنه وژل شوي.
د سرچینې د معلوماتو له مخې، دغه پېښه د نهرین په “زیارت شهر کهنه” سیمه کې رامنځته شوې.
تر اوسه چا د برید مسؤلیت نه دی منلی.
بل لورته د وژل شویو کسانو د هویت په اړه هم معلومات نه دي ورکړل شوي.
د نوبل جایزې ګټونکې ملالې یوسفزۍ له نړۍ غوښتي چې په واقعي توګه د افغانستان وضعیت درک او د افغان نجونو او ښځو وضعیت له پامه ونه غورځوي.
هغې ویلي، افغانستان کې د ښځو ځپلو ته باید دیني او فرهنګي توجیه ورنکړل شي.
د یوسفزۍ په خبره، د طالبانو تر راتګ وړاندې افغانو ښځو په بېلابېلو برخو کې دندې درلودې او د خپلو حقونو لپاره یې مبارزه کوله.