چینایي سوداګر جاستین سان هغه کېله وخوړه چې په ۶.۲ میلیونه ډالر یې اخیستې وه.
نوموړي دا کېله نن په یو ګران بیه هوټل کې تر خبري کنفرانس وروسته وخوړه.
د سان په خبره د رسنیو ترمخه د دغې کېلې خوړل یوه تاریخي صحنه ده.
د یادونې ده چې دغه کېله یوه اوونۍ وړاندې په نیویارک کې د یو هنري اثر په توګه په ۶.۲ میلیونه ډالرو اخیستل شوې وه.
د پښتونخوا په کورمه کې د شعیه او سنیانو ترمنځ په تازه نښتو کې ۳۰ کسانو ته مرګ ژوبله اوښتې.
سره له دې چې هلته د اوو ورځو لپاره اوربند شوی وو؛ خو اوس دا اوربند مات او تازه بریدونو کې د دواړو لوریو ۱۲ تنه وژل شوي او ۱۸ نور ټپیان دي.
تېره ورځ هم هلته پنځه تنه وژل شوي وو.
د یادونې ده چې په دغه سیمه کې د نښتو له کبله تر اوسه نږدې ۱۲۰ کسان وژل شوي او تر ۱۵۰ زیات ټپیان دي.
د پاکستان د پخوانۍ لومړۍ وزیرې بینظیر بوټو لور او اوسنۍ لومړۍ مېرمن اصفه بوټو زرداري په نړۍوالې ټولنې غږ کړی چې پر طالبانو د امر کولو پر ځای له دوی سره پر تعامل خبرې وکړي.
نوموړې د العربیه ټلویزیون سره په خبرو کې ویلي چې پاکستان باید په افغانستان کې د ښځو او نجونو حقوقو په اړه طالبانو سره خبرې وکړي.
اصفه بوټو زرداري له افغانستانه د امریکایي ځواکونو وتل غندلي او په وینا چې د بهرنیانو وتل د افغانستان وضعیت زیانمن کړی دی.
د پاکستان رسنیو راپور ورکړی چې د احتساب ملي دفتر د راولپینډۍ څانګې یوه ډله به خیبرپښتونخوا ته واستوي ترڅو د عمران خان مېرمن، بشری بي بي، د ۱۹۰ میلیونه پونډو اړوند قضیه کې ونیسي.
پاکستانۍ رسنۍ جیو نیوز ویلي، چې دا پرېکړه د پاکستان د احتساب ملي ادارې لخوا شوې ده، او د خیبرپښتونخوا د ملي احتساب دفتر ته لارښوونه شوې چې د راولپینډۍ له ډلې سره بشپړه همکاري وکړي.
راپور زیاتوي چې د پاکستان د احتساب ملي دفتر به د بشري بي بي د نیولو لپاره د خیبرپښتونخوا له پولیسو هم مرسته وغواړي.
دا په داسې حال کې ده چې درې ورځې وړاندې پاکستان کې د عمران خان پلویانو مظاهرې وکړې چې مشري یې بشرا بي بي کوله.
روسیه وایي، افغانستان کې اوسنی ثبات بې مخینې او هیڅوک پر دغه وضعیت سترګې نشي پټولی.
د روسیې ولسمشر ولادیمیر پوتین د ټولیز امنیتي تړون سازمان ناستې ته په یوه برخه کې ویلي، چې مسکو له افغانستان سره د غوره اړیکو غوښتونکی دی.
نوموړی دا څرګندونې داسې مهال کوي، چې څو ورځې وړاندې کابل ته د مسکو راغلي لوړ پوړي پلاوي هم د روسیې او افغانستان ترمنځ د اړیکو پر پراختیا ټینګار کړی و.
قطر او برېټانیا د افغانستان په وروستي وضعیت خبرې کړې.
د قطر د بهرنیو چارو وزارت ویلي، چې د افغانستان لپاره د قطر بهرنیو چارو وزارت ځانګړي استازي، فیصل بن عبدالله آل حنزاب د افغانستان لپاره د بریټانیا له ځانګړي استازي، انډریو مک کوبري سره کتلي چې په افغانستان کې پر وروستي سیاسي، امنیتي او بشري وضعیت خبرې شوې دي.
د قطر د بهرنیو چارو وزارت د دغې لیدنې خبر ورکړی، خو د ناستې په اړه یې نور جزیات نه دي خپاره کړي.
د یادونې ده چې اوس مهال د ګڼ شمېر هېوادونو چار سمبالي د افغانستان لپاره خپلې چارې له قطر څخه سمبالوي.
د طالبانو مشر شیخ هبتالله اخوندزاده په خپل حکومت کې یو لړ بدلونونه رامنځته کړي.
د نوموړي د فرمان له مخې، د کندهار د ټولګټو چارو ریاست پخوانی مرستیال عبدالهادي یعقوب د اوبو او انرژۍ وزارت مرستیال، د بادغیس والي مولوي عبدالصمد د غزني د والي په توګه او د کورنیو چارو وزارت د اوپراسیون مرستیال ملا عزیز الرحمن د کندهار ولایت د ټولګټو چارو ریاست د رئیس په توګه ټاکل شوي دي.
د دغه فرمان له مخې، د یو شمېر قول اردو ګانو چارواکي هم تغییر او تبدیل شوي.
سره له دې چې خلک هر وخت د طالبانو پر حکومت نیوکه کوي چې کار اهل کار ته نه سپاري؛ خو په تازه ګمارنو کې یې هم لیدل کېږي چې مقرر شوي چارواکي ټول طالبان دي.
د نیمروز کمیسیاري کې طالبانو دغه ولایت ته د سل تنو هغو کسانو د جسدونو انتقال تائید کړی، چې څه موده وړاندې د ایران بلوچستان کې د دغه هېواد ځواکونو وژلي وو.
دوی ویلي، په دې کې د هغو افغانانو جسدونه هم شته چې په ټرافیکي پېښو کې وژل شوي.
یو شمېر سرچینې وایي په دې کې ډېر جسدونه د هغو افغانانو دي چې ایرانیانو وژلي وو.
تر دې وړاندې هم ایران ته تللي طالب پلاوي منلې وه چې پر افغانانو برید شوی؛ خو د وژل شویو کسانو شمېر یې یوازې درې تنه ښودلی وو.
د طالبانو امربالمعروف هرات کې د ښځینه وو لپاره ځانګړې شوې کافې تړلې دي.
هلته یو شمېر کافې د میرمنو لپاره ځانګړې وې، چې هیڅ نارینه نه ور پرېښودل کېده؛ خو اوس هغه هم تړل شوي دي.
تر دې وړاندې طالبانو د دغو کافې مالکانو ته ویلي وو، چې خپل کاروبار وتړي.
د طالبانو حکومت د یاد کار موخه له اخلاقي فساد څخه مخنیوی یادوي.
یوناما وایي، افغانستان کې یې د نشهیي توکو پر وړاندې د مبارزې کاري ډلې لومړۍ غونډه جوړه کړه.
یادې ادارې په یو راپور کې ویلي، دا غونډه یې د دوحې درېیمې ناستې د پرېکړو او ژمنو په تعقیب جوړه کړې.
راپور کې د یوناما د مشرې روزا اتونبایوا له قوله ویل شوي، چې افغانستان کې د نشهیي توکو پر وړاندې مبارزه مهمه مسئله ده، چې ان پر لرې پرتو ټولنو هم اغېز کوي.
د یادونې ده چې د دوحې درېیمې ناستې کې د افغانستان اقتصادي ثبات لپاره هڅې، د کنګل شوې شتمني ازادول او افغانستان کې د نشهیي توکو پر وړاندې د مبارزې لپاره د ګډې کاري ډلې جوړول مهمې غوښتنې وې.