د مقاومت په نوم جبهې فعالیتونو ته په اشارې د امریکا د کانګرس غړي ټېم برچټ ویلي، چې د طالبانو پر وړاندې مقاومت شته او انتوني بلېنکن دا مقاومت له پامه غورځولی.
ټېم برچټ په خپله ایکسپاڼه لیکلي، چې انتوني بلېنکن د روانې میاشتې په پیل کې راته ویلي وه چې د طالبانو په وړاندې مقاومت نشته.
نوموړی دا څرګندونې داسې مهال کوي، چې په دې وروستیو کې د مقاومت په نوم جبهې بریدونه زیات شوي او د ګڼو طالب سرتېرو د وژلو ادعا کوي.
نیویارک ټایمز له ۱۲ اوسنیو او پخوانیو اسراییلي، امریکايي او اروپايي چارواکو سره د مرکو پر بنسټ چې د نوم د نه ښودلو په شرط یې خبرې کړي، د حزب الله د بې وسلې کولو د پروژې جزئیات بیان کړي او لیکلي یې دي چې دا پروژه د لسیزو د استخباراتو په مرسته ترسره شوې ده.
راپور وايي چې موساد د حزب الله د مشرانو پټنځایونه څارل او د حزب الله د یوه مشر له خپلو څلورو ملګرو سره یې د ناستې څارنه کوله.
د دغه راپور له مخې، موساد په ښکاره توګه د حزب الله د مشرانو حرکتونه په دقیق ډول څارل.
دغه راپور د ترلاسه شوو معلوماتو پر بنسټ وايي چې د حسن نصرالله او د سپاه پاسداران د قومندان جسدونه په داسې حال کې موندل شوي چې دواړو ساه ورکړې وه.
حسن نصرالله او عباس نیلفروشان د مې د میاشتې په شپږمه نېټه د بیروت د جنوبي څنډې په داهیا کې د حزب الله پر پناهځایونو د اسرائیلو په هوايي برید کې ووژل شول.
د پاکستان «ډان» ورځپاڼه وایي، چې خیبر پښتونخوا کې د ځانمرګي برید له کبله څلور پاکستاني پوځیان ټپیان شوي.
یادې ورځپاڼې ویلي، چې دغه برید د دېره تنګ لارې پر یوه امنیتي پوسته شوی دی.
ډان لیکلي، چې ددغه ځانمرګي بريدګر هدف د کلاچي امنيه قومانداني وه، چې له امله يې څلور امنيتي سرتېري ټپيان شوي او د پوليسو مرکز ته د پام وړ زيان اوښتى دى.
ډان دغه راز ویلي، چې دغه ځانمرګي بریدګر سره یوه ډله وسله وال هم وه چې په امنیتي پوسته یې ډزې وکړې او له ځوابي برید وروسته هغوی په تېښته بریالي شول.
د سوریې د نوي حکومت د بهرنیو چارو وزیر اسد شیباني د سوریې د نوي حکومت د ښځو د چارو د مشرې عایشه الدبس د څرګندونو په اړه په ځواب کې وویل چې چارواکي د ښځو تر څنګ ولاړ دي او د هغوی بشپړ ملاتړ کوي.
شيباني ویلي، چې موږ په ټولنه کې د ښځو پر فعال رول باور لرو او د ښځو پر وړتياوو باوري يو.
هغه زیاته کړې چې د سوریې ښځې له کلونو راهیسې د خپلو حقونو لپاره مبارزه کوي.
د یادونې ده چې عایشه الدبس له ټيآیټي تلویزیون سره په مرکه کې ویلي چې میرمنې باید له هغه لومړیتوبونو څخه بهر نشي چې خدای دوی ته په طبیعي ډول ورکړي دي او باید په کورنۍ کې د دوی تعلیمي رول ته پاملرنه وکړي.
د تحریر الشام ډلې مشر احمد الشرع له العربیه سره په مرکه کې د بشار الاسد حکومت له نسکوریدو وروسته د لومړي ځل لپاره په دغه هیواد کې د انتخاباتو د ترسره کیدو احتمالي مهال ویش اعلان کړ.
هغه ویلي چې د ټاکنو ترسره کېدل ښايي څلور کاله وخت ونیسي.
نوموړي زیاته کړې چې د سوریې د نوي اساسي قانون مسوده ښايي درې کاله وخت ونیسي.
الشرع دغه راز ویلي، چې سوریه به د هر ډول سیاسي کړکیچ څخه لیرې وي.
هغه ټینګار کړی چې د سوریې د نوي حکومت اصلي هدف د اقتصادي وضعیت ښه کول او د دغه هیواد پرمختګ دی.
د افغانستان لپاره د پاکستان پخواني استازي اصف دراني د طالبانو او پاکستان ترمنځ وروستۍ سرحدي جګړه د افسوس وړ بللې او ویلي یې دي چې طالبان باید ترې عبرت واخلي.
ښاغلي دراني په خپله ایکسپاڼه لیکلي چې تحریک طالبان پاکستان یوه سره کرښه ده او هیچا ته باید اجازه ورنهکړل شي چې له هغې تېر شي.
د یادونې ده چې د تېر سه شنبې په شپه پاکستاني پوځیانو د پکتیکا ولایت د برمل ولسوالۍ ځینې سیمې بمبار کړې چې د طالبانو د ادعا له مخې د ښځو او ماشومانو په ګډون ۴۶ تنه پکې وژل شوي دي.
بل لورته د پاکستان د بهرنیو چارو وزارت ویلي، چې دغه بریدونه د استخباراتي معلوماتو پر بنسټ او د پاکستان د امنیتي ګواښونو پر وړاندې ترسره شوي دي.
د هېواد پخواني ولسمشر حامد کرزي په افغانستان کې د اروپایي اتحادیې د پخوانۍ شارژدافیرې رافائلا یودیچه پر مړینې خواشیني څرګنده کړې.
ښاغلي کرزي په خپله ایکسپاڼه لیکلي، چې میرمن رافائلا یودیچه د خپل ماموریت په دوره کې د افغانستان له خلکو سره ډېرې مرستې او همکارۍ کړې وې.
هغه ویلي، چې خپل د خواشینۍ او ډاډگیرنې مراتب د ارواښادې کورنۍ او دوستانو ته وړاندې کوي.
د یادونې ده چې نوموړې مېرمن د مغزو د سکتې له امله مړه شوې ده.
په داسې حال کې چې حماسه میډیا د طالبانو د مالیې وزارت څخه د معاشاتو د نه ورکړې خبر ورکړی وو او د طالبانو مالیې وزارت دا خبر رد کړ، اوس تازه افغان خبریال سمیع یوسفزي د یو طالب امنیتي مسول له قوله لیکلي چې له تیرو دریو میاشتو راهیسې یې معاش نه دی اخیستی.
ښاغلي یوسفزي په خپلې ایکس پاڼې لیکلي:«پرون راته یو طالب چې په يو امنیتي وزارت کې د مدیریت رتبه لري وویل “ قسم کوم دا مې درېیمه میاشت ده چې امارت معاش نه دی راکړی او وایي چې ۳ میاشتې نور به هم انتظار کوئ ځکه ‘ کسر معاش بودیجه “ رامنځ ته شوې.»
بل لورته د اقتصادي چارو شننونکي عثمان نورزي لیکلي چې طالبانو د لومړي کال په راتګ ۲۳۱ میلیارده افغانۍ بودیجه د ۲۰۲۲ کال لپاره اعلان کړه چې ۲۷.۹ میلیارده افغانۍ انکشافي او پاتې عادي بودجه وه او یادې بودیجې ۴۴ میلیارده افغانۍ کسر درلود.
ښاغلي نورزي لیکلي:«ددې ارقامو وروسته نور په ورستیو ۳ کلونو کې طالبانو نه کلنۍ بودجه اعلان کړې او نه یې کورني عواید اعلان کړي او دا ټول ارقام یې پټ ساتلي؛ حال دا چې د نړیوال بانک د ۲۰۲۴ کال په ګزارش کې د غیر رسمي سرچینو څخه د دوی بودجه تېر کال ۳۳۵ میلیارده افغانۍ پیشبیني کړې وه چې په دې کې یوازي ۵۰ میلیارده افغانۍ انکشافي بودجه وه او ۲۸۵ میلیارده افغانۍ عادي بودجه وه یعنې تاسې فکر وکړئ چې دوی په ۲۸۵ میلیارده افغانیو کې ان معاشات نشي ورکولی؛ نو دا پیسې چرته ځي او په څه مصرفیږي!»
بلوچستان کې چاودنې درې تنه ساحلي ساتونکي ټپیان کړي.
دغه چاودنه د بلوچستان د ګوادر ولسوالۍ په جیواني سیمه کې رامنځته شوې.
تر اوسه کومې ډلې ددغه برید مسولیت نه دی منلی.
د فلسطین روغتیايي چارواکو ویلي، د غزې پر ځینو برخو د اسرائیلو په بریدونو کې لږ تر لږه ۳۶ کسان وژل شوي او لسګونه نور ټپیان شوي دي.
په ورته وخت کې د فلسطین د روغتیا وزارت اعلان کړی چې د غزې په تړانګه کې د کمال عدوان روغتون له عملیاتو وروسته د اسرائیلو پوځ د طبي کارکوونکو په ګډون ۲۴۰ فلسطینیان نیولي دي.
له بلې خوا د روغتیا نړیوال سازمان پر کمال عدوان روغتون باندې د اسرائیلو د برید په غندلو سره ویلي دي چې د غزې د روغتیا سکتور سیستماتیک ړنګول د څه باندې ۷۵ زره فلسطینیانو ژوند له خطر سره مخامخ کوي.