د افغانستان لپاره د پاکستان ځانګړی استازی محمد صادق وايي، کابل ته یې د خپل وروستي سفر په اړه د پاکستان لومړي وزیر شهباز شریف ته معلومات ورکړل.
صادق خان په خپله ایکسپاڼه له شهباز شریف سره د خپلې لیدنې خبر ورکړی.
نوموړي ویلي، چې له نواز شریف سره یې د طالبانو او پاکستان پر روانو حالاتو او دوه اړخیزو اړیکو خبرې کړې دي.
د یادونې ده چې څو ورځې وړاندې صادق خان کابل ته راغلی و او له له لوړ پوړو طالب چارواکو سره یې وکتل.
د خیبر پښتونخوا په مانسهره سیمه کې نامعلومه وسله والو پر پولیسو برید کړی.
په دغه برید کې د یاسر په نوم یو پولیس وژل شوی او بل پولیس مرګونی ژوبل شوی دی.
ددغې برید مسؤلیت تر اوسه کومې ډلې نه دی منلی.
د یادونې ده چې په دې وروستیو کې په پاکستان کې ګڼې امنیتي پېښې رامنځته کېږي چې مرګ ژوبله هم اړوي.
د سوریې نوي واکمن احمد الشرع د اوکراین د بهرنیو چارو له وزیر اندري سیبیها سره په کتنه کې د دمشق او کییف ترمنځ اړیکې ستراتیژیکې وبللې.
د رویټرز خبري اژانس د راپور له مخې د اوکراین د بهرنیو چارو وزیر چې د یوه لوړ پوړي پلاوي په مشرۍ دمشق ته تللی، د سوریې له موقت حکومت سره ژمنه کړې چې د غلې دانې نورې کښتۍ به د سوریې د خلکو د اړتیاوو د پوره کولو لپاره دغه هېواد ته ولیږي.
د یادونې ده چې واک ته د احمد الشرع له رسېدو وروسته د ګڼو هېوادونو له استازو سره یې وکتل او د دوه اړخیزو اړیکو د پراختیا ژمنې یې وکړې.
پاکستان کې په دوو جلا ترافیکي پېښو کې ۱۸ کسان وژل شوي او ۳۵ نور ټپیان شوي دي.
د پاکستان رسنیو خبر ورکړی چې دغه ترافیکي پېښې په سند او پنجاب ایالتونو کې رامنځته شوې دي.
دوی ویلي، چې په دغو پېښو کې یوه د سند ایالت مورو ښار ته څېرمه د یوه موټر او لارۍ يوبل سره ټکر کړى او په بله پېښه کې د پنجاب ایالت په اټک ولسوالۍ کې یو بس اوښتی دی چې دواړو پېښو ۱۸ تنه وژلي.
د ایران د پارلمان د امنیتي او بهرنیو اړیکو د کمېسیون غړي ابوالفضل زهراوند ویلي، چې له طالبانو سره د اړیکو جوړول بې ګټې دي.
هغه د طالبانو په سیاست نېوکه کړې او ویلي، چې ترکیه په افغانستان کې ډېر بندونه جوړوي چې د ایران په زیان تمامیږي.
د یادونې ده چې ایران له څه باندې درېيو کالونو راهیسې د هلمند سیند د اوبو د حقابې پر سر له طالبانو سره اختلافات لري او دغه اختلافات د ایران او طالبانو ترمنځ د سړو اړیکو لامل هم شوي.
ټاس خبري اژانس وایي، چې د روسیې بهرنیو چارو وزیر، سرګي لاوروف ویلي، چې د ایران او اسراییل ترمنځ کړکېچ خطرناک حالت ته رسېدلی دی.
ټاس د سرګي لاوروف له قوله ویلي چې په منځني ختیځ کې د تاوتریخوالي کچه لوړه شوې او د ایران او اسراییل مخامخ کېدل خطرناکې پولې ته رسېدلې دي.
ټاس دغه راز ویلي چې لاوروف په منځني ختیځ کې د دوامداره کړکېچونه او د تاوتریخوالي د تکرار مسووله امریکا ګڼلې.
نوموړي دغه راز ویلي چې امریکا د عرب هېوادونو په کورنیو چارو کې لاسوهنه کوي.
د ترکیې پولیسو د اژه سمندرګي په شمالي څنډو کې د ۱۶ ماشومانو په ګډون ۳۲ افغان کډوال نیولي دي.
د ترکي رسنیو د راپورونو له مخې دغه کسان تر نیول کېدو وروسته د مهاجرو د اخراج مرکزونو ته لېږدول شوي دي.
د یادونې ده چې افغان کډوال اکثره وخت په قاچاقي توګه د ترکیې له ځینو ساحلي سیمو د اژه سمندرګي له لارې په وړو او غیرمعیاري بېړیو کې د یونان ټاپوګانو ته د رسېدو په هدف ځانونه په خطر کې اچوي.
د مقاومت په نوم جبهې فعالیتونو ته په اشارې د امریکا د کانګرس غړي ټېم برچټ ویلي، چې د طالبانو پر وړاندې مقاومت شته او انتوني بلېنکن دا مقاومت له پامه غورځولی.
ټېم برچټ په خپله ایکسپاڼه لیکلي، چې انتوني بلېنکن د روانې میاشتې په پیل کې راته ویلي وه چې د طالبانو په وړاندې مقاومت نشته.
نوموړی دا څرګندونې داسې مهال کوي، چې په دې وروستیو کې د مقاومت په نوم جبهې بریدونه زیات شوي او د ګڼو طالب سرتېرو د وژلو ادعا کوي.
نیویارک ټایمز له ۱۲ اوسنیو او پخوانیو اسراییلي، امریکايي او اروپايي چارواکو سره د مرکو پر بنسټ چې د نوم د نه ښودلو په شرط یې خبرې کړي، د حزب الله د بې وسلې کولو د پروژې جزئیات بیان کړي او لیکلي یې دي چې دا پروژه د لسیزو د استخباراتو په مرسته ترسره شوې ده.
راپور وايي چې موساد د حزب الله د مشرانو پټنځایونه څارل او د حزب الله د یوه مشر له خپلو څلورو ملګرو سره یې د ناستې څارنه کوله.
د دغه راپور له مخې، موساد په ښکاره توګه د حزب الله د مشرانو حرکتونه په دقیق ډول څارل.
دغه راپور د ترلاسه شوو معلوماتو پر بنسټ وايي چې د حسن نصرالله او د سپاه پاسداران د قومندان جسدونه په داسې حال کې موندل شوي چې دواړو ساه ورکړې وه.
حسن نصرالله او عباس نیلفروشان د مې د میاشتې په شپږمه نېټه د بیروت د جنوبي څنډې په داهیا کې د حزب الله پر پناهځایونو د اسرائیلو په هوايي برید کې ووژل شول.
د پاکستان «ډان» ورځپاڼه وایي، چې خیبر پښتونخوا کې د ځانمرګي برید له کبله څلور پاکستاني پوځیان ټپیان شوي.
یادې ورځپاڼې ویلي، چې دغه برید د دېره تنګ لارې پر یوه امنیتي پوسته شوی دی.
ډان لیکلي، چې ددغه ځانمرګي بريدګر هدف د کلاچي امنيه قومانداني وه، چې له امله يې څلور امنيتي سرتېري ټپيان شوي او د پوليسو مرکز ته د پام وړ زيان اوښتى دى.
ډان دغه راز ویلي، چې دغه ځانمرګي بریدګر سره یوه ډله وسله وال هم وه چې په امنیتي پوسته یې ډزې وکړې او له ځوابي برید وروسته هغوی په تېښته بریالي شول.