د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بینېټ له نړیوالې ټولنې وغوښتل چې د افغان کډوالو غږ واوري.
ریچارډ بینېټ د افغان میرمنو د غږ اړوند شهمامه ایکس سپیس کې وویل چې د کډوالو حقونه باید په نړیواله کچه واوریدل شي او د هغوې ستونزې باید واوریدل شي او د اسانتیاوو ترڅنګ باید پیاوړي شي.
ټلیګراف د خپلو سرچینو له قوله خبر ورکړی چې په دوحه کې د اسراییلو او حماس ترمنځ د مذاکره کوونکې ډلې ترمنځ په اوربند موافقه شوې.
که څه هم دا تړون تردې مهاله تایید شوی نه دی، خو ټیلګراف د امریکا د منتخب ولسمشر ډونالډ له قوله لیکلي چې دواړو لوریو اوربند منلی دی.
بل لورته ټلیګراف له دغو خبرو اترو څخه د خپلو سرچینو په حواله لیکلي چې په دغه هوکړه لیک کې چې د شپږ اونیو اوربند لومړنی پړاو او له غزې څخه د اسرائیلي ځواکونو تدریجي وتل او د اسرائیلو له خوا د فلسطیني بندیانو د خلاصون په بدل کې د حماس د یرغمل شویو بندیانو خوشې کول شامل دي.
دا اوربند په غزه کې د ۱۵ میاشتنۍ جګړې د پای ته رسولو لپاره ټاکل شوی دی.
سیمهییزې سرچینې وايي، نن ماښام د بلخ د مرکز مزار په دویمه امنیتي حوزه کې چاودنه شوې.
دا چاودنه نږدې اووه بجې د منډوي په سرک شوې ده.
چاودنه د چسپکي ماین له کبله رامنځته شوې، چې تر اوسه یې د تلفاتو په اړه څه نه دي ویل شوي.
ځايي طالب مسولینو هم تر اوسه په دې اړه څه نه دي ویلي.
ایرانی ولسمشر مسعود پزشکیان په یو رسمي سفر د تاجکستان مرکز دوشنبې ته رسېدلی.
ایراني رسنۍ وایي، چې ولسمشر پزشکیان به سبا له دوشنبې څخه مسکو ته ولاړ شي او هلته به په کرملین ماڼۍ کې د ولسمشر پوتین سره د همکارۍ یو شمیر سندونه لاسلیک کړي.
د ایران د ولسمشر په توګه د مسعود پزشکیان دا لومړی سفر دی چې دوشنبې او مسکو ته یې ترسره کوي.
افغان تاریخپوه او خبریال محمد حلیم تنویر په دې آند دی چې په افغانستان کې د قومونو ترمنځ د اقلیت او اکثریت موضوع مطرح ده.
ښاغلي تنویر د حماسه میډیا په ایکس سپیس کې ویلي، چې پښتانه ددې هیواد لوی اکثریت دي او نور قومونه هم کولای شي د ملي سیاست برخه اوسي.
حلیم تنویر وایي، د دوی څیړنو ښودلې چې په کابل او هرات ولایتونو کې اکثریت پښتانه هیوادوال استوګن دي.
تنویر زیاته کړې، چې د طالب پر سر باید له ټول پښتون سره دوښمني ونه شي.
د طالبانو حکومت د بهرنیو چارو وزارت سیاسي مرستیال شېر محمد عباس ستانکزي ویلي، پر افغانستان د لسګونو کلونو جګړې په دوران کې د کیمیاوي بمونو استعمال چاپیریال ته سخت زیان اړولی دی.
نوموړي د اقلیمي بدلون ملي کنفرانس ته په وینا کې ویلي، د شوروي په جګړه کې ۸۰ سلنه ځنګلونه له منځه لاړل.
د ستانکزي په خبره، د دغو بمونو له کبله د افغانستان د کرنې، چاپیریال ساتنې، معدنونه او اوبه سختې اغېزمنې شوې دي.
سږکال په ټول هېواد کې څه باندې څلور زره ټرافیکي پېښې ثبت شوې دي.
د طالبانو د ټرافیکو ریاست ویلي، چې په دې پېښو کې دوه زره کسان وژل شوي او تر ۷۰۰ زیات ټپیان شوي دي.
یاد ریاست زیاتوي چې د ټرافیکي پېښو احصایې تر هغې زیاتې کمې دي چې رسنۍ یې خپروي.
د یادونې ده چې ډېرې ټرافیکي پېښې د هېواد په لویو لارو کې کېږي.
د طالبانو حکومت د بهرنیو چارو وزارت سیاسي مرستیال شېر محمد عباس ستانکزي په کابل کې د ايران له سرپرست سفير عليرضا بیکدلي سره کتلي.
دواړو لوریو په دې کتنه کې د ایران او افغانستان پر اړیکو بحث کړی.
عباس ستانکزي ته منسوبې ایکسپاڼې لیکلي، چې ددې کتنې پر مهال په ايران کې د افغان کډوالو لپاره د لازمو اسانتياوو پر برابرولو او د هغوى د ستونزو د هواري پر اړتيا خبرې شوې.
جرمني، اتریش، هالنډ او کاناډا هېوادونو پرېکړه کړې چې طالبان باید د ملګرو ملتونو له لوري “د ښځو پر وړاندې د هر ډول تبعیض د لمنځه وړلو کنوانسیون” د نقض له امله ځواب ووایي.
د المان د بهرنیو چارو وزارت ویلي، دغو اروپايي هېوادونو او کاناډا له دې امله د طالبانو حکومت تر پوښتنې لاندې راوستی چې د هغوی په وینا په افغانستان کې د ښځو حقونه په جدي توګه تر پښو لاندې کیږي.
د طالبانو حکومت تر اوسه په دې اړه څه نه دي ویلي.
که څه هم وړمه ورځ جوبایډن یو وار بیا له افغانستان څخه د امریکايي ځواکونو وتل لاسته راوړنه وبلله؛ خو تازه د یاد هېواد دفاع وزارت ته نوماند وزیر پیټ هېګزېټ ویلي چې دې چارې په نړیواله کچه د امریکا حیثیت ته زیان رسولی دی.
نوموړي ویلي له افغانستانه د امریکا د وتلو له امله روسیې پر اوکراین بریدونه وکړل.
هېګزېټ زیاته کړې، ټرمپ ژمن دی چې د امریکا پوځ بېرته ورغوي.