د طالبانو حکومت د ریاست‌الوزراء اقتصادي مرستیال ملا عبدالغني برادر په افغانستان کې د یوناما له مرستیال ایندریکا راتوات سره کتلي.

په دې لېدنه کې ملا برادر له یاد بنسټ څخه غوښتي، چې په افغانستان کې د بشري مرستو په توزیع کې شفافیت رامنځته او خپلې مرستې دې پراختیايي برخو ته واړوي.

دغې لیدنه کې د یوناما مرستیال ویلي، چې دوی د طالبانو له حکومت سره په همغږۍ خپلو پراختیايي او بشري مرستو ته دوام ورکوي.

نوموړي زیاته کړې، چې د افغان بزګرانو د ملاتړ په موخه به پر هغوی اصلاح شوي تخمونه او کیمیاوي سرې وویشي او کوچني بندونه به جوړ او کاریزونه به پاک کړي.

‏د ملګرو ملتونو د امنیت شورا د بندیزونو کمېټې ویلي، چې د طالبانو حکومت د کورنیو چارو وزیر سراج الدین حقاني د عمرې حج ادا کولو لپاره سعودي عربستان ته تللی دی.

د امنیت شورا ویلي، چې پر ښاغلي حقاني د لسو ورځو لپاره د سفر بندیز لیرې شوی.

د یادې شورا د اعلامیې پر بنسټ، دا بندیز د ۲۰۲۵زيږديز کال د جنورۍ له ۲۳مې څخه د فبرورۍ تر ۳مې پورې اعتبار لري، او موخه یې سعودي عربستان ته د نوموړي سفر د عمرې د مراسمو د ادا کول بلل شوي دي.

ښاغلي حقاني سعودي عربستان ته په سفر کې د متحده عربي اماراتو د حکومت له مشر سره هم کتلي.

د یادونې ده چې تېره ورځ د سوريې د انتقالي حکومت مشر احمد الشرع هم د عمرې حج ادا کړ او ددغه هېواد د چارواکو له لوري یې تود هرکلی وشو.

د تاجکستان دولتي رسنیو خبر ورکړی، چې د دغه هېواد د عدلیې وزارت اړوند په یوه زندان کې د بندیانو د یوې ډلې له خوا په ډزو کې درې بندیان وژل شوي او د زندان درې کارکوونکي ټپیان شوي دي.

د خاور خبري اژانس د راپور له مخې، د دوشنبې په ورځ یوې ۹ کسیزې ډلې له زندان څخه د تېښتې هڅه وکړه او د زندان پر مامورینو یې په چاقو برید وکړ.

د يو بل خبر له مخې، د زندان د مامورينو په ډزو کې درې تنه بنديان وژل شوي؛ خو اوس په زندان کې وضعيت عادي شوى دى.

دغه زندان د تاجکستان په پلازمېنه دوشنبه ښار کې موقعیت لري او د دغه هېواد له مهمو زندانونو څخه دی چې د تاجکستان د عدلیې وزارت تر څارنې لاندې فعالیت کوي.

د سپینې ماڼۍ یوه چارواکي اعلان کړی چې د امریکا ولسمشر ډونالډ ټرمپ د هند لومړي وزیر نریندرا مودي ته راتلونکې اوونۍ په سپینه ماڼۍ کې د لیدنې بلنه ورکړې ده.

تر اوسه امریکايي او هندي چارواکو واشنګټن ته د مودي د احتمالي سفر د جزیاتو په اړه څه نه دي ویلي.

ډونالډ ټرمپ د جنورۍ په ۲۷ مه له نریندرا مودي سره خبرې کړې وې.

د یادونې ده، چې د ټرمپ له خوا د مودي د بلنې د خبر له خپرېدو څو ساعته مخکې، یوه امریکايي پوځي الوتکه چې ایستل شوي هندي کډوال یې لېږدول، هند ته ولاړه.

د سوډان روغتیایي چارواکي وایي، چې د دې هیواد په جنوب او لویدیځ کې د پوځ او ملیشو تر منځ په تازه نښتو کې لږ تر لږه ۶۵ تنه وژل شوي او ۱۳۰ نور ټپيان شوي دي.

د دغه هېواد روغتیایي سرچینو د فرانس پریس خبري اژانس ته ویلي چې یو توپ د سودان په جنوب کې د کوردوفان په سیمه کې لګیدلی، لږ تر لږه ۴۰ تنه پکې وژل شوي او ۷۰ نور یې ټپيان کړي دي.

ویل کېږي، چې دغه برید د سوډان ولس آزادۍ غورځنګ په نامه یوې ملیشې کړی چې مشري یې د عبدالعزیز الهیلو په نامه یو تن کوي.

د یادونې ده، چې تر اوسه د سوډان په جنګ کې د وژل شویو کسانو شمېر تر ۱۵۰زره رسېږي او څه باندې ۱۲ میلیونه وګړي له خپلو سیمو بې‌ځایه شوي دي.

د امریکا د بهرنیو چارو وزیر مارکو روبیو ویلي، چې دوی باید پر ایران فشارونه لا زیات کړي.

هغه د یوې پوښتنې په ځواب کې چې ایا هغه فکر کوي چې د ایران په وړاندې باید د فشار اعظمي ستراتیژي بیرته راشي، وویل: «زه فکر کوم چې موږ باید پر ایران ډیر فشار راوړو چې خپل فعالیتونه ودروي.»

د امریکا د بهرنیو چارو وزارت د ویب پاڼې د راپور له مخې، روبیو ویلي، چې تهران غواړي اټومي وسلې ترلاسه کړي.

د یادونې ده چې سپینې ماڼۍ ته د ډونالډ ټرمپ له راستنېدو وروسته د تهران چارواکو په بېلابېلو حالاتو کې له امریکا سره د خبرو اترو لېوالتیا ښودلې ده؛ خو ډونالډ ټرمپ تر اوسه د تهران د خبرو اترو غوښتنې ته ځواب نه دی ویلی.

د امریکا ولسمشر ډونالډ ټرمپ ویلي، چې ډیر تاوتریخوالی شتون لري او د دې هیڅ تضمین شتون نلري چې په غزه کې اوربند به دوام ومومي.

ټرمپ په سپینه ماڼۍ کې خبریالانو ته ویلي، چې زه دا تضمین نشم کولی چې د اسراییلو او حماس ترمنځ به سوله تامین شي.

په همدې حال کې د منځني ختیځ لپاره د هغه ځانګړي استازي ویلي، چې د اسراییلو او حماس ترمنځ د اوربند او د یرغمل شویو تبادلې تړون اوس پر ځای دی.

د یادونې ده چې په غزه کې درې پړاويز اوربند د روانې مياشتې په ٢٦مه نېټه د قطر، مصر، او امريکا په منځګړیتوب د اسراييلو او حماس تر منځ رامنځته شو او له هغه مهاله لسګونه اسراييلي او فلسطيني بنديان خوشې شوي دي.

د امریکا د بهرنیو چارو وزیر مارک روبیو ته ‏د اردن، مصر، سعودي عربستان، متحده عربي اماراتو او د قطر د بهرنیو چارو وزیرانو او یو فلسطیني چارواکي لیک لېږلی او د فلسطینیانو د بېځایه کولو د پلان څرګند مخالفت یې کړی.

رویټرز خبري اژانس ویلي، چې دغه لیک تېره ورځ لېږل شوی.

د یادونې ده، چې له غزې د فلسطینیانو د ایستلو وړاندیز د روان کال د جنوري میاشتې په پای کې د ډونالډ ټرمپ له لوري وړاندې شوی و.

ټرمپ د اردن او مصر هېوادونو ته ویلي و چې لا زیاتو فلسطینیانو ته پخپلو هېوادونو کې ځای ورکړي.

د پاکستان دولتي راډیو د خپلو سرچینو په حواله خبر ورکړی، چې طالبانو د بادغیس د مرستیال والي بدرالدین زوی چې په خیبر پښتونخوا کې له پاکستاني امنیتي ځواکونو سره په نښته کې وژل شوی، د جسد له منلو انکار کړی دی.

تر دې وړاندې امنیتي سرچینو ویلي و چې د بادغیس د طالبانو د مرستیال والي زوی یو له هغو دریو جنګیالیو څخه دی چې د خیبر پښتونخوا د دیره اسماعیل خان په کلاچي سیمه کې د پاکستاني پوځیانو په عملیاتو کې وژل شوی دی.

د سرچینې په وینا، بدرالدین یوسف د پاکستاني طالبانو په یوه روزنیز مرکز کې روزونکی و.

د پاکستان دولتي راډیو زیاته کړې، چې طالب چارواکو د پاکستان له پرله پسې غوښتنو سره سره د بدرالدین د جسد له منلو ډډه وکړه.

ویل کېږي، چې هند د ۲۰۲۵ کال په بودجه کې له افغانستان او مالدیف سره ډېرې مرستې ځانګړې کړي دي.

بي بي سي اردو ویلي، چې نوي ډیلي د نوي مالي کال په بودجه کې د خپلو بهرنیو مرستو کچه د تېر کال په پرتله کمه کړې ده.

راپور کې زیاته شوې، چې هند د افغانستان او مالدیف په څیر ځینې ګاونډي هیوادونه نه هېروي او خپلې مرستې ورسره جاري ساتي.