د پاکستان د جمعیت علما‌ءاسلام ګوند مشر مولانا فضل الرحمن وايي، د پاکستان حکومت مشران بې کفایته دي او نور باید سیاسي ګوندونو ته وخت ورکړي، چې رامخکې شي.

هغه ویلي، پوځ او حکومت له څو لسیزو راهیسې د ترهګرو د روزنې په برخه کې پر نړیوال سټیج یادیږي او دوی دې نور له سمو تګلارو کار واخلي.

هغه له طالبانو سره د پاکستان په ترینګلو اړیکو کې پاکستاني لوري ملامته کړي.

نوموړي ویلي، پاکستان د سپټمبر د یوولسمې له پېښې وروسته امریکا ته اډې ورکړې او له همدې ځایه په افغانستان بمبار کېده؛ خو طالبانو یوه ورځ هم په دې اړه پاکستان ته شکایت ونه کړ.

د کرېکټ نړیوال جام سیالۍ، چې له نږدې ۳۰ کلونو وروسته په پاکستان کې ترسره کېږي، د دغه هېواد امنیتي ځواکونو امنیتي تدابیر سخت کړي دي.

د کریکټ چمپینز ټرافي سبا چهارشنبه پیلیږي.

پاکستان هیله لري چې د دغو سیالیو په ترسره کولو سره به په دغه هېواد کې د بې ثباتۍ په اړه اندېښنې کمې شي او د یوه خوندي ځای په توګه به پر دغه هېواد د نړیوالې ټولنې باور زیات شي.

پاکستان وایي، هېله لري چې نړیوال ګرځندوي به د سیاحت او پانګونې لپاره بیرته دې هیواد ته د ستنیدو لپاره زړه ښه کړي.

پاکستاني امینتي چارواکي وایي، د کریکټ نړیوال جام د ښه امنیت لپاره یې ۲۰ زره وسله وال ځواکونه، په اسلام آباد، لاهور، کراچۍ او پینډۍ کې ځای پرځای کړي دي.

د امنیتي مسولینو په خبره هغه هوټلونه چې لوبغاړي پکې اوسیږي، لوبغالي او هوايي ډګرونه تر سختې ساتنې او څارنې لاندې دي.

د سعودي عربستان پلازمینې ریاض کې د لوړ پوړو امریکايي چارواکو او روسي چارواکو تر منځ خبرې اترې پیل شوې.

په دغو خبرو کې د امریکا د بهرنیو چارو وزیر مارکو روبیو، د امریکا د ملي امنیت سلاکار مایک والټز او د روسیې د بهرنیو چارو وزیر سرګي لاوروف ګډون لري.

تر دې مخکې د امریکا د استازو د جرګې د بهرنیو اړیکو د کمیټې پخواني مشر مایکل مک کال رویټرز ته ویلي وو چې د دغو خبرو موخه په اوکراین کې د جګړې د پای ته رسولو لپاره د خبرو پیلول او د امریکا، روسیې او اوکراین د ولسمشرانو ډونالډ ټرمپ، ولادیمیر پوتین او ولادیمیر زیلینسکي تر منځ د غونډې تنظیمول دي.

د «ویانا پروسې» تر نامه لاندې د طالبانو د مخالفو جبهو پنځمه ناسته نن سه شنبه په اتریش کې پیل شوه.

په دې غونډه کې د مقاومت د جبهې مشر احمد مسعود او د ازادۍ جبهې مشر جنرال یاسین ضیا هم ګډون کړی.

دغه غونډه د رسنيو له شتون پرته د بندو دروازو تر شاه پيل شوې ده.

د غونډې تنظیموونکي وایي، په دې غونډه کې افغان سیاسي شخصیتونو، پخوانیو ديپلوماټانو او د بشري او میرمنو برخې فعالانو هم برخه اخیستې ده.

د پاکستان د ایالتونو او سرحدي سیمو وزیر امیر مقام ویلي، ملګري ملتونه باید نورو هېوادونو ته د افغان کډوالو د لېږد په برخه کې خپلې ژمنې عملي کړي.

نوموړي ویلي، دوی څو کلونه د درې میلیونه افغان کډوالو کوربانه وو؛ خو اوس باید دا کډوال لاړ شي.

د مقام په خبره، پاکستان ته د افغان کډوالو د راتګ په وخت کې ژمنه شوې وه چې دغه کډوال ژر تر ژره بل هېواد ته لیږدول کېږي او د کوربه هیوادونو ستونزې به هم حل شي؛ خو تر اوسه په دې برخه کې څه نه دي شوي.

کابل کې د ایران سفارت سرپرست علي رضا بېکدلي د طالبانو حکومت د بهرنیو چارو له سرپرست وزیر امیرخان متقي سره په کتنه کې د اقتصادي او سیمه‌ییزو اړیکو په اړه خبرې کړې دي.

کابل کې د ایران سفارت د یادې لیدنې خبر ورکړی دی.

د ایران سفارت لیکلي، چې په دې کتنه کې د دواړو هېوادونو ترمنځ د سوداګرۍ، ټرانسپورټ، روغتیا او درملنې، کرنې، انرژۍ او سیاسي همکاريو خبرې اترې شوې دي.

امریکايي سناتورانو د غزې د اشغال لپاره د ټرمپ طرحه رد کړې ده او ټینګار یې کړی، چې عربي هېوادونه ښايي د غزې د راتلونکي لپاره بهتره لارې وړاندې کړي.

رویټرز د لینډسي ګراهام له قوله خبر ورکړی، چې په سنا کې په دې اړه هیڅ لیوالتیا نشته، چې امریکا دې غزه ونیسي.

بل لورته د دموکراتانو سناتور ریچارد بلومنتال ویلي، دا طرحه په مکمل ډول د نه منلو وړ ده.

تر دې وړاندې ټرمپ ویلي وو، چې غزه به دوی ونیسي.

د ایران د بهرنیو چارو وزیر له طالبانو سره د هلمند په سیند کې د حقابې ستونزې حل رد کړی او ویلي یې دي، چې کابل کې د طالبانو حکومت له چارواکو سره د ایران د بهرنیو چارو وزیر د لیدنو په ترڅ کې دا مسئله نه ده حل شوې.

د یاد هېواد د بهرنیو چارو وزارت ویاند اسماعیل بقايي ویلي، طالبانو په دې لیدنو کې ټینګار کړی وو، چې دا دوی یو انساني مسوولیت هم دی.

نوموړي ویلي، چې د دغې ستونزې حل له طالبانو سره په تعامل او خبرو کې نغښتی دی.

دا په داسې حال کې ده، چې د طالبانو حکومت د ایران د بهرنیو چارو وزیر ته ویلي وو، چې دا مسئله یوازې تر تړون پورې تړلې نه ده؛ بلکې د دوی انساني مسوولیت هم دی، چې د سیستان او بلوچستان خلکو ته اوبه پرېدي.

د بریتانیا لومړي وزیر کی‌یر استارمر ټرمپ ته خبرداری ورکړی چې اوکراین دې د افغانستان له برخلیک سره نه مخ کوي.

استارمر د ټرمپ اوسنی دریځ د ۲۰۲۱ کال د افغانستان د حکومت له سقوط سره پرتله کړی او ویلي یې دي چې امریکا باید خپل ستر تاریخي شکست بیا تکرار نه کړي.

نوموړي ویلي، چې د اوکراین وضعیت د بریتانیا له ملي ګټو سره مستقیمه اړیکه لري او د دې هېواد برخلیک باندې به څوک لوبې ته پرېنږدي.

هغه دغه راز زیاته کړې، چې داسې ښکاري واشنګټن مسکو ته ډېر امتیازونه ورکړي دي.

دا په داسې حال کې ده چې د امریکا د بهرنیو چارو وزیر مارکو روبیو د اوکراین د سولې د خبرو لپاره سعودي عربستان ته تللی، ترڅو له خپل روسي سیال سرګي لاوروف سره وګوري.

د اوکراین ولسمشر، ولادیمیر زېلېنسکي وایي، چې اوکراین به له روسیې سره د سولې مذاکراتو کې ګډون ونکړي.

هغه ویلي، د سولې کوم مذاکرات چې په سعودي کې کیږي، دوی پکې ګډون نه کوي، ځکه په تړاو یې هېڅ مالومات نه لري.

زېلېنسکي زیاته کړې، چې کییف باید د خپل راتلونکي په اړه هره غونډه او مذاکره کې ګډون ولري.

دا په داسې حال کې ده، چې د امریکا بهرنیو چارو وزیر، مارکو روبیو سعودي عربستان ته تللی او د اوکراین د جګړې په اړه هلته مذاکرات وکړي.