د امریکا ولسمشر ډونالډ ټرمپ ویلي، له روسیې سره خپلو خبرو ته دوام ورکوو.
د رویټر د یوه راپور له مخې په ریاض کې د شا او خوا څلورو ساعتونو خبرو وروسته ټرمپ د نورو، او حلېدونکې پاېلې غوښتنه کړې ده.
ویل کېږي چې روسیې د نورو اړونده بحثونو سره سره، په دې هم بحث کړی چې اوکراین دې نور د ناټو د غړیتوب خوبونه نه ویني او له دې خوبه دې پاڅي.
هېره دې نه وي چې په دې ناسته کې د اوکراین هیڅ استاذی ګډون نلري.
د طالبانو حکومت لومړی وزیر ملا محمد حسن اخوند د سوریې انتقالي مشر احمد شرع ته د مبارکۍ پیغام استولی دی.
د سوریې د جمهوري ریاست دفتر په یوه خبرپاڼه کې ویلي ، چې د طالبانو لومړی وزیر ، احمد شرع ته پدې هیواد د واکمنېدو مبارکي ورکړې.
اعلامیه کې ویل شوي ، چې ملا محمد حسن اخند احمد شرع ته د بشارالاسد دولت په مقابل کې د سرښندونو د وړتیا او بریا مبارکي ورکړې او د افغانستان او سوریې ترمنځ د ورورګلوۍ، سیاسي او ډیپلوماتیکو اړیکو د پیلیدو هېله څرګنده کړې.
د ملي مقاومت په نوم جبهې ادعا کړې چې یوازې روانه میاشت کې یې ۲۷ بریدونه ترسره کړي دي.
د مقاومت جبهې څخه خپره شوې ویناپاڼه کې ادعا شوې چې په دې بریدونو کې شا او خوا ۴۲ طالبان وژلي او ۳۷ تنه یې نور یې ټپیان کړي دي.
یادې جبهې ویلي چې دغه بریدونه یې په کابل، هرات، تخار، کندز، فراه، بادغیس، پروان، کاپیسا، بغلان او بلخ ولایتونو کې کړي دي.
د پکتیا پخواني والي محمد حلیم فدایي په ایکس پاڼې لیکلي، د افغانستان داخلي حالت ګډوډ او د یو نامعلوم برخلیک سره مخ دی.
ښاغلي فدایي د طالبانو د سقوط له بحثونو سره سم د طالبانو او پاکستان ترمنځ اړیکې ترینګلې بللي.
نوموړي لیکلي چې ګڼ طالب فعالان په خپل شیخ هبت الله نیوکې پیل کړي او هغه ته یې د مستعارو اکاونټونو له ادرس څخه د “فتنې” لقب ورکړی.
هغه د طالبانو خپلمنځي اختلافاتو ته د فرصت نوم ورکړی، او له افغان سیاستوالو یې غوښتې چې د یو چتر لاندې راټول شي.
د ملي دفاع پخوانی مرستیال تمیم عاصي وایي، افغانستان یو نوي نسل او یو نوي ادرس ته ضرورت لري.
ښاغلي عاصي د ویانا غونډې ته په غبرګون کې ویلي، چې پخواني غله او داړماران د جمهوریت بدیل نشي کېدلی.
ښاغلي عاصي لیکلي، چې ددې غونډې هر ګډونوال په شخصي توګه پېژنم.
نوموړي زیاته کړې، چې دغه کسان نړۍ ته هېڅ د باور وړ نه دي.
هغه دغه راز ویلي، چې طالبان تلونکي دي؛ خو د پرون ورځې خوشحاله سوداګر هم د طالبانو بدیل نه دي.
د اوکراین ولسمشر ولادیمیر زیلینسکي په یوه ټلویزیوني مرکه کې خبرداری ورکړی، چې له افغانستانه د امریکايي پوځیانو له وتلو وروسته به د هغه هېواد برخلیک د افغانستان وضعیت په څېر شي.
په ورته وخت کې د ډونالډ ټرمپ ادارې له روسي چارواکو سره د اوکراین د جګړې د پای ته رسېدو په اړه په ریاض کې خبرې پیل کړي دي.
ښاغلي زیلنسکي د جرمني له ټلوېزیون “ARD” سره په مرکه کې لوېدیځ ته د تېرو تېروتنو د نه تکرار خبرداری ورکړ او ویې ویل چې له ناټو سره له یوځای کېدو پرته د دغه هېواد د جګړې پای ته رسېدل ښايي د ۲۰۲۱ کال له اګست میاشتې وروسته په افغانستان کې د ورته وضعیت لامل شي.
د اوکراین ولسمشر د دغه هېواد په وړاندې د امریکا د چلند په اړه وویل: “زه فکر نه کوم چې څوک دې له افغانستان سره لېوالتیا ولري.”
ولادیمیر زیلینسکي په ځانګړې توګه له افغانستان څخه د ناټو ځواکونو په ځانګړې توګه د امریکا متحده ایالاتو چټک وتلو ته اشاره وکړه، چې د ډونالډ ټرمپ د ولسمشرۍ په لومړۍ دوره کې له طالبانو سره په دوحه کې خبرې اترې وشوې او یو تړون لاسلیک شو او بیا په ۲۰۲۱ کال کې د جوبایډن په دوره کې له سره عملي شو.
د طالبانو حکومت د بهرنیو چارو وزارت وزیر امیرخان متقي په افغانستان کې د ایران سفیر علي رضا بیګدلي سره کتلي.
د طالبانو د بهرنیو چارو وزارت مرستیال ویاند حافظ ضیاء احمد تکل په خپله ایکس پاڼه لیکلي، چې په دې ناسته کې یې د دواړو هیوادونو په سوداګریزو، او اقتصادي برخو کې د تجارتي راکړې ورکړې په اسانتیا خبرې کړي.
ښاغلي تکل زیاته کړې، د دې ناستې هدف د دواړو هیوادونو سوداګرو او پانګه والو ته د سهولتونو رامنځته کول، د ترانزیتي دهلیزونو د پراختیا، د روغتیا او کرنې په برخو کې همکاري، د انرژۍ اړوند موضوعات، د برښناء تامین، په تخنیکي همکاریو کې پراختیا او د دغه دواړو هیوادونو د اړونده بنسټونو د ښه کولو په اړه بحث شوی.
د افغانستان لپاره د اسلامي همکارۍ سازمان ځانګړي استازي طارق بخیت، د طالبانو د امر بالمعروف وزیر خالد حنفي سره په لیدنه کې د دوی فعالیتونه د افغاني ټولنې جدي اړتیا بللې.
د طالبانو حکومت د امر بالمعروف وزارت ویاند سیف الاسلام خیبر په یوه اعلامیه کې ویلي، ښاغلي بخیت ډاډ ورکړی چې د اسلامي همکارۍ سازمان به له دغه وزارت سره د لاتقویې دپاره خپلو همکاریو ته دوام ورکوي.
هغه ویلي چې په دې لیدنه کې د امر بالمعروف وزارت وزیر ویلي چې د دوی هدف د اسلامي اصولو په چوکاټ برابر دی او د ټولنې د معنوي اړخونو د لا تقویې کوښښ کوي
طالبانو د شپږ تنه انسان تښتونکو د نیولو او د دوی له منګولو یې د ۲ تنو ازادولو خبر ورکړی.
د طالبانو حکومت د کورنیو چارو وزارت ویاند عبدالمتین قانع په خپله ایکس پاڼه لیکلي، د امنیتي ځواکونو په کشفي عملیاتو کې یې دوه تنه چې د پروان ولایت اوسېدونکي وو د انسان تښتونکو له منګولو ازاد کړي.
ښاغلي قانع زیاته کړې چې یاد تښتول شوي کسان څه موده مخښکې په ایران کې تښتول شوي وو او په بدل یې انسان تښتوونکو ۱۵۰ زره امریکایي ډالر غوښتل چې د کورنیو چارو وزارت د کشفي ځواکونو لخوا د تښتوونکو له منګولو ازاد شوه.
هغه ویلي چې یاد شپږ تنه انسان تښتوونکي یې د لازیاتو پلټنو لپاره اړوندو ادارو ته سپارلي
د پاکستان د بهرنیو چارو وزیر اسحاق ډار وايي، چې دوی له اړمنو افغانانو سره هر ډول همکاري ته چمتو دي.
ډار د اسلامي همکاریو سازمان په ناسته کې اندېښنه څرګنده کړې، چې د افغانانو اقتصادي وضعیت لا ترینګلی شوی.
نوموړي د افغانستان د کنګل شوې شتمنۍ د ازادېدو غوښتنه هم کړې.
اسحاق ډار دا څرګندونې داسې مهال کوي، چې دمګړی پاکستان خپله په بد اقتصادي وضعیت کې دی.