د امریکا د بهرنیو چارو وزارت اعلان کړی چې د دې هېواد د خپلواکۍ د اعلان د ۲۵۰مې کلیزې په مناسبت به ځانګړي او یادګاري پاسپورټونه خپاره کړي، چې په ډیزاین کې به د ولسمشر ډونالډ ټرمپ انځور او لاسلیک هم شامل وي.

د راپورونو له مخې، دا پاسپورټونه به محدود شمېر کې د واشنګټن د پاسپورټ ادارې له لارې امریکایي وګړو ته ورکړل شي او وېش به یې د روان کال په دوبي کې پیل شي.

د امریکا د بهرنیو چارو وزارت ویاند ټومي پیګټ ویلي چې دا نوښت د هېواد د تاریخي کلیزې د نمانځلو د پراخو پلانونو یوه برخه ده، چې په راتلونکې جولای میاشت کې به په ټول هېواد کې ځانګړي مراسم ترسره شي.

په خپرو شویو انځورونو کې لیدل کېږي چې د پاسپورټ ډیزاین د امریکا د خپلواکۍ له اعلامیې او ملي بیرغ څخه الهام اخیستی او د ټرمپ انځور په کې ځای پر ځای شوی دی.

همداراز، په بله پاڼه کې د بنسټګرو مشرانو د لاسلیک صحنه هم انځور شوې ده.

دا په داسې حال کې ده چې د ټرمپ ادارې په وروستیو کې هڅه کړې خپل نوم او نښې په بېلابېلو دولتي پروګرامونو او بنسټونو کې ځای پر ځای کړي.

سربېره پر دې، د راپورونو له مخې، په واشنګټن ښار کې د ځینو ودانیو بڼه هم بدلېږي، چې د سپینې ماڼۍ په ختیځه څانګه کې د لوی تالار د جوړولو او د یوه ستر یادګاري قوس د جوړېدو پلانونه هم پکې شامل دي.

د پاکستان د بلوچستان ایالت په بېلابېلو سیمو کې د تاوتریخوالي په جلا پېښو کې درې کسان وژل شوي او دوه نور ټپیان شوي دي.

د راپورونو له مخې، په لومړۍ پېښه کې چې د کوټې ښار په «سول لاینز» سیمه کې رامنځته شوې، د یوې تاڼې د مشرې د کورنۍ غړو او ساتونکو پر یوه موټر ډزې کړې، چې له امله یې یو کس وژل شوی او د یوه اته کلن ماشوم په ګډون دوه تنه ټپیان شوي دي.

په بله پېښه کې د کوټې د سریاب پر سړک ناپېژاندو وسله‌والو پر یوه رېړۍ چلوونکي ډزې کړې، چې په پایله کې یې نوموړي خپل ژوند له لاسه ورکړی دی.

همداراز، د عبدالله کلا په ولسوالۍ کې هم ناپېژاندو کسانو پر یوه ځوان ډزې کړې، چې له امله یې هغه وژل شوی؛ ویل کېږي قرباني د خیبر پښتونخوا د سوات سیمې اوسېدونکی و.

تر اوسه د دغه پېښو اصلي لاملونه نه دي روښانه شوي.

د کندهار سیمه‌ییز چارواکي وایي چې د لومړي ځل لپاره له دغه ولایت څخه متحده عربي اماراتو ته د الوچو صادرات پیل شوي، چې دا چاره د کرنیزو محصولاتو لپاره یو مهم پرمختګ بلل کېږي.

د معلوماتو له مخې، تر اوسه شاوخوا ۲ ټنه الوچې اماراتو ته لېږدول شوې او تمه ده چې په راتلونکو ورځو کې به نورې هم صادرې شي.

چارواکي زیاتوي چې ټولټال ۲۰ ټنه الوچې د صادراتو لپاره چمتو شوې دي.

د کندهار د کرنې، اوبو لګولو او مالدارۍ ریاست ویلي چې دا لومړی ځل دی چې د دې ولایت الوچې د هوا له لارې بهرنیو بازارونو ته لېږل کېږي، چې دا کار د محصولاتو د کیفیت ساتلو او چټک لېږد لپاره مهم بلل کېږي.

سرچینې وایي چې د دې صادراتو ارزښت له ۷۰ زرو امریکایي ډالرو څخه زیات دی او دا بهیر د یوه خصوصي شرکت له لوري ترسره کېږي.

د وال‌سټریټ ژورنال د امریکایي چارواکو له قوله راپور ورکړی چې د امریکا ولسمشر ډونالډ ټرمپ خپلو سلاکارانو ته لارښوونه کړې چې د ایران پر وړاندې د اوږدمهاله محاصرې لپاره چمتووالی ونیسي.

د راپور له مخې، ټرمپ په وروستیو غونډو کې پرېکړه کړې چې د ایران بندرونو ته د کښتیو د تګ راتګ د محدودولو له لارې پر دغه هېواد فشار زیات کړي، څو د ایران اقتصاد او د تېلو صادرات تر اغېز لاندې راولي.

په راپور کې ویل شوي چې ټرمپ باور لري نور انتخابونه، لکه د بمبارۍ بیا پیل یا له شخړې څخه شاتګ، د محاصرې په پرتله له لوړو خطرونو سره مل دي.

تر اوسه د امریکا رسمي سرچینو په دې اړه جزییات نه دي ورکړي، خو دا راپور په داسې حال کې خپرېږي چې د ایران او امریکا ترمنځ اړیکې لا هم ترینګلې دي.

د اسرائیلو پوځ وايي چې د لبنان په سوېل، قنطره سیمه کې یې د حزب‌الله یوه پراخه او پرمختللې تونلي شبکه کشف او ویجاړه کړې ده.

اسرائیلي پوځ په یوه بیان کې ویلي چې په دې عملیاتو کې له ۴۵۰ټنو چاودیدونکو توکو ډک، دوه لوی تونلونه له منځه وړل شوي، چې یو یې شاوخوا ۸۰۰ متره او بل یې نږدې ۱.۲ کیلومتره اوږد و.

د پوځ په وینا، دغه تونلونه یوازې د تګ راتګ لپاره نه وو، بلکې د استوګنې خونې، تشنابونه، د پخلنځي اسانتیاوې او د توغندیو د توغولو تجهیزات پکې ځای پر ځای شوي وو.

اسرائیل ادعا کړې، چې دا شبکه د «ایراني معیارونو» له مخې جوړه شوې او ایران په مستقیم ډول د هغې په طرحه او مالي ملاتړ کې ښکېل و.

د طالبانو حکومت د کابل ښاروالۍ ویاند د هغو راپورونو په غبرګون کې چې د درې پوړونو څخه د لوړو ودانیو پر جوړولو د بندیز ادعا کوي، ویلي چې دا خبرې ناسمې دي او هېڅ ډول عمومي محدودیت نه دی لګول شوی.

د کابل ښاروالۍ ویاند، نعمت‌الله بارکزي ویلي، چې ښاریان کولی شي د منظورو شوو ښاري پلانونو او تخنیکي اصولو له مخې تر ۳۰ پوړونو پورې ودانۍ جوړې کړي.

د هغه په وینا، یوازې په ځانګړو حالاتو کې، هغه کسان چې بیړنۍ سرپناه ته اړتیا لري، کولای شي تر درې پوړونو پورې ساده ” غیر له تهکوي” استوګنیز کورونه جوړ کړي.

نوموړي زیاته کړې، چې دغه درې پوړیز کورونه یوازې د استوګنې لپاره دي او د سوداګریزو فعالیتونو لپاره ترې استفاده اجازه نه لري.

د طالبانو حکومت د کورنیو چارو وزیر، خلیفه سراج‌الدین حقاني، د روسیې د ولسمشر له ځانګړي استازي ضمیر کابلوف سره په کتنه کې د دواړو هېوادونو ترمنځ د اړیکو او همکاریو پر پراختیا خبرې کړې دي.

د یاد وزارت د ویاند عبدالمتین قانع د ورکړل شویو معلوماتو له مخې، په دې لیدنه کې د افغانستان او روسیې ترمنځ د دوه اړخیزو همکاریو د پیاوړتیا پر لارو چارو بحث شوی او امنیتي، اقتصادي او سیاسي موضوعات د خبرو مهم محورونه وو.

دواړو لورو همداراز په سیمه کې د مثبت تعامل، ثبات او د متقابل تفاهم د پراخېدو په اړه خپل نظرونه شریک کړي دي.

د افغانستان د کرکټ ملي لوبغاړي عظمت‌الله عمرزي د خپلې مور د جنازې پر مهال د خلکو د ناسم چلند له امله ګیله کړې

عظمت الله عمرزي په یوه پیغام کې ویلي چې د خلکو د بې‌ځایه ویډیوګانو او عکس اخیستلو له امله یې حتی د خپلې مور وروستی دیدن هم په ارامه زړه نه دی ترسره کړی.

عمرزي له هغو کسانو غوښتنه کړې چې د جنازو او قبرونو تر څنګ د ویډیوګانو او عکسونو اخیستلو ته مخه کوي، دې کار ته دې د پای ټکی کېږدي او د غم په داسې شېبو کې دې د انسانیت او درناوي احساس وساتي.

هغه ویلي: «مهرباني وکړئ لږ انسانیت او نزاکت وپېژنئ، دا ډېر دردناک حالت دی، باید د احترام او سکون فضا وساتل شي.»

نوموړي زیاته کړې چې دا ډول کړنې د غم ځپلو کورنیو درد نور هم زیاتوي او د هغوی احساسات ژوبلوي.

دې پیغام په ټولنیزو رسنیو کې پراخ غبرګونونه راپارولي او ډېری خلک وایي چې د جنازو پر مهال د حریم او احترام ساتل یو مهم انساني او اخلاقي مسؤلیت دی.

د یادونې ده چې د عظمت‌الله عمرزي مور نن خاورو ته وسپارل شوه.

د طالبانو حکومت د بهرنیو چارو وزیر مولوي امیر خان متقي په کابل کې د افغانستان لپاره د بریتانیا له ځانګړي استازي ریچارډ لینډزي سره کتلي.

د طالبانو حکومت د بهرنیو چارو وزارت ویلي، چې په دې لیدنه کې د افغانستان-پاکستان پر وروستي وضعیت، په دوحه کې پر څو اړخیزو ناستو او یو شمېر نورو مهمو موضوعاتو خبرې شوي دي.

وزارت په یوه خبرپاڼه کې ویلي، چې امیرخان متقي په خپلو څرګندونو کې ویلي چې د امریکا او ناټو د اشغال دورې په پرتله د افغانستان امنیتي او ټولنیز وضعیت د پام وړ ښه شوی او د «اسلامي امارت» عملي اقداماتو د سیمې د هېوادونو باور زیات کړی دی.

نوموړي ټینګار کړی چې «اسلامي امارت» غواړي له نړۍ سره مثبتې اړیکې ولري او هیچا ته به اجازه ورنه کړي چې د افغانستان خاوره د نورو هېوادونو پر ضد وکاروي.

بل لور ته، د بریتانیا ځانګړي استازي ریچارډ لینډزي د پاکستان له لوري په وروستیو بریدونو کې د افغانانو د مرګ‌ژوبلې په اړه خپله خواخوږي څرګنده کړې او د سیمې او نړۍ پر بېلابېلو موضوعاتو یې خپل نظرونه شریک کړي دي.

هغه همداراز ویلي چې د بریتانیا حکومت او ولس ژمن دي چې له افغانستان سره خپلې بشري مرستې دوامدارې وساتي او زیاته کړې چې په راتلونکې کې به د افغانستان سره د لا زیات تعامل لپاره خپلو سفرونو ته دوام ورکړي.

د پاکستان د جمعیت اسلامي پخواني مشر مولانا سراج‌الحق ویلي چې هېواد یې باید له افغانستان سره په اړیکو کې له زغم، تدبیر او سیاسي هوښیارۍ کار واخلي او د هر ډول شخړو مخه ونیسي.

هغه په خپلو څرګندونو کې ټینګار کړی چې د دواړو هېوادونو ترمنځ تاوتریخوالی نه یوازې امنیتي وضعیت خرابوي، بلکې د ولسونو پر ژوند هم منفي اغېز کوي او اقتصادي او ټولنیزې ستونزې زیاتوي.

سراج‌الحق زیاته کړې چې د اوسنیو حساسو شرایطو په نظر کې نیولو سره، د ستونزو د حل تر ټولو اغېزمنه لار مستقیمې او مانادارې خبرې اترې دي، نه تقابل او فشار.

نوموړي همداراز ویلي چې سیمه ثبات او همکارۍ ته اړتیا لري او پاکستان باید داسې پالیسۍ غوره کړي چې د ګاونډیو هېوادونو سره د باور فضا پیاوړې کړي.

هغه ټینګار کړی چې سوله‌ییز تعامل د دواړو هېوادونو په ګټه دی او دوامداره کړکېچ یوازې د بې‌ثباتۍ او کړاو لامل ګرځي.