په ایکس ټولنیزې پاڼې ګڼ شمیر طالب پلویانو د خپل امیر شیخ هبت الله اخوندزاده څخه په کلکه وغوښتل چې د نجونو پرمخ د زده کړې دروازې پرانیزې او افغانستان دې د پردیو په ځانګړې ډول د پاکستان له احتیاج څخه خلاص کړي.

دغو طالب پلوو مبلغینو په ایکس سپیس کې په ملا هبت الله او د هغه په کابینې نیوکې وکړې چې په یوه پلمه او بله پلمه د امر ثاني په نوم د اسلامي نظام ریښې ریبي.

د ایکس سپیس جوړونکی مولوی ضیاء الرحمن اصغر وویل چې نور مصلحت نه کوي او نه غواړي چې د حق او باطل په لاره کې د باطل ملګری اوسی، هغه په ټولو علماوو غږ وکړ چې سر له سبا دې کندهارته وخوځیږي او شیخ هبت الله اخوندزاده دې قانع کړي چې د نجونو پرمخ دښوونځیو دروازې پرانیزي.

دغو طالب پلویانو د طالبانو چارواکو ته د پیغور په ژبه وویل چې څنګه غیرت مو اجازه درکوي چې پاکستان افغان نجونو ته درس ورکوي او تاسې ارامه خوبونه کوي او د شریعت په نوم مو ښوونځي تړلي.

د ایران د بهرنیو چارو وزیر عباس عراقچي نن سهار کابل ته را ورسېد.

د یاد هېواد د بهرنیو چارو وزارت ویاند اسماعیل بقایي ویلي، چې له دغه سفر څخه موخه د دواړو هېوادونو ترمنځ د اړیکو پیاوړتیا او د ګډو ستونزو حل دی.

دا سفر په داسې مهال کېږي، چې د هلمند په سیند کې د حقابې پر سر د کابل او تهران ترمنځ اړیکې ترینګلې شوې دي.

د یادونې ده، چې عباس عراقچي به په دغه یو ورځني سفر کې له یو شمېر طالب چارواکو سره وګوري.

د افغانستان لپاره د پاکستان ځانګړي استازي صادق خان ویلي، چې د نجونو په ګډون افغان زده کوونکي پاکستان کې زده کړو او تحصیل ته لېواله دي.

هغه پر خپله ایکس پاڼه له یو انځور سره لیکلي، چې اوس مهال لسګونه افغان زده کوونکو د علامه اقبال پوهنتون بورسونو کې ګډون کړی او دا د دې ښکارندوي کوي، چې افغانان پاکستان کې زده کړو سره علاقه لري.

دا په داسې حال کې ده، چې پر یو ایکس سپیس کې ګڼ شمېر طالب پلویانو په شیخ هبت الله نیوکه کړې، چې په کور دننه یې د زده کړو دروازې تړلې؛ نو ځکه افغانان اړ دي، چې خپلې لوڼې د زده کړو لپاره بل هېواد ته ولېږي.

د افغانستان، ازبکستان، قرغزیستان او چین تر منځ د ګډ اقتصادي دهلېز تړون د ۲۰۲۵م کال لپاره هم وغځېد.

د طالبانو حکومت د ټولګټو چارو وزارت د یاد تړون د نوي کېدو خبر ورکړی او ویلي یې دي، چې د تړون له نوي کېدو سره به له دغې لارې څخه په انتقالاتو کې د پام وړ زیاتوالی راشي.

دغه دهلیز له چین- قرغزیستان او ازبکستان تېر او د مزارشریف- حیرتان له اوسپنیزې کرښې سره وصلیږي.

د بشري حقونو سازمان ویلي، چې ایران یو وار بیا د یو افغان په شمول په درې تنو د اعدام حکم عملي کړی.

د سرچینې د معلوماتو له مخې، دغه افغان په قصدي قتل تورن وو.

د اعدام شوي افغان هویت تر اوسه نه دی څرګند شوی.

بل لورته د ایران حکومت هم په دې اړه څه نه دي ویلي؛ خو ویل کېږي، چې یاد کسان په کرج کې اعدام شوي دي.

د طالبانو حکومت تر واک لاندې د افغانستان بانک د ډالرو لوړېدو سره سم؛ هېوادوالو ته ډاډ ورکړی چې په دې اړه اندېښنې ونه کړي.

یاد بانک یوه خبرپاڼه کې ویلي، چې د افغانیو ثبات ساتنې لپاره اړین اقدامات ترسره کوي.

خبرپاڼه کې زیاته شوې چې دوی په دې برخه کې کافي سرچینې لري او بازارونه په دقیق ډول څاري.

د یادونې ده چې اوس مهال په افغانستان کې یو امریکایي ډالر په ۷۷ افغانیو تبادله کېږي.

په نړۍ د امریکا د مرستو له بندیدو سره سم؛ په هېواد کې د ډالرو بیه لوړه شوې.

اوس مهال د هېواد په بازارونو کې یو امریکايي ډالر ۷۷ افغانۍ تبادله کېږي.

بل لورته د طالبانو حکومت تر واک لاندې د افغانستان بانک وايي، د افغانیو ارزښت ساتنې لپاره کافي سرچینې په واک کې لري.

که څه هم د طالبانو حکومت اوس مهال د افغانیو ارزښت ساتنې لپاره ډالر لیلاموي؛ خو بیا هم دغه کرنسي د افغانیو پر وړاندې مخ پورته روانه ده.

بښنې نړیوال سازمان د زده کړې د نړیوالې ورځې په مناسبت له نړۍ غوښتي، چې په افغانستان کې د بشري حقونو سرغړونې پای ته ورسوي.

دغه سازمان په یوه بیان کې ویلي، چې نړۍ دې طالبان د نجونو او ښځو د بنسټیزو حقونو په تېره بیا د پوهنې په برخه کې د سرغړونې له امله مسوول وګڼي.

دغه سازمان زیاته کړې، چې د طالبانو له درې کلنې واکمنۍ وروسته دا هېواد د بشري حقونو د بې ساري سرغړونو، جنسي ځورونو، شکنجې، خپلسري نيونې او سانسور مرکز ګرځېدلی دی.

یاد سازمان دغه راز ویلي، چې واک ته د طالبانو له رسېدو وروسته افغانستان کې ښځې ګڼو مشکلاتو سره مخ دي.

د روسیې ولسمشر ولادیمیر پوتین ویلي چې دی چمتو دی تر څو د اوکراین جګړې په اړه له امریکا سره خبرې وکړي.

هغه ویلي ډونالډ ټرمپ یو ځیرک رهبر او ښه مشر دی.

د پوتین په خبره، که چیرې ټرمپ واک کې وی؛ نو ښایي دوی یې اوکراین کې جګړې ته نه وی پریښی.

تر دې وړاندې بیا ټرمپ ویلي وو چې که پوتین خبرو ته حاضر نه شي؛ نو بندیزونه به پرې ولګوي.

د ښځو د ازادۍ پر لور غورځنګ د زده کړو نړیوالې ورځې په مناسبت ویلي، چې طالبانو د ښځو پر زده کړو له بندیز سره افغان ښځې او نجونې په تیارو کې بندې ساتلې دي.

دوی ویلي، چې په دې ورځ هم په خورا ژورې خواشینۍ سره افغانستان ته ګوري.

دغه بنسټ ویلي، چې په دې کار سره طالبان د ټولنې د نیمايي برخې له هویت او وړتیا انکار کوي.

د دغه بنسټ په وینا، دې چارې افغان ټولنې ته خورا لوی زیان اړولی دی.

د یادونې ده، چې تېره ورځ د زده کړو نړیواله ورځ وه، چې په همدې ورځ هم ګڼو بنسټونو د طالبانو له حکومت وغوښتل ترڅو افغان نجونو ته د زده کړو اجازه ورکړي.