د پاکستان د تحریک انصاف ګوند عمومي منشي سلمان اکرم راجا ادعا کړې چې د ګوند بنسټګر او پخوانی لومړی وزیر عمران خان د زندان دننه له سخت چلند سره مخ دی او وهل کېږي.

نوموړي ویلي چې عمران خان د یوې سترګې لید په بشپړ ډول له لاسه ورکړی او د هغه روغتیايي وضعیت د اندېښنې وړ دی.

هغه زیاتوي چې د عمران خان مېرمن بشرا بي‌بي هم له جدي روغتیايي ستونزو سره مخ ده.

سلمان اکرم راجا د پاکستان سترې محکمې مخې ته خبریالانو ته ویلي چې د محکمې له خوا د ملاقاتونو امرونه نه عملي کېږي او د عدالتي پرېکړو پر وړاندې خنډونه موجود دي.

هغه زیاته کړې چې د تحریک انصاف له لوري څو ځله قانوني غوښتنې وړاندې شوې، خو تر اوسه یې اورېدنه نه ده شوې.

نوموړي ویلي چې ګوند به خپل دریځ اوس مستقیماً د ولس مخې ته وړاندې کړي.

تر دې مخکې د خیبر پښتونخوا اعلی وزیر سهيل اپرېدی او د عمران خان د کورنۍ ځینو غړو هم د هغه د روغتیا لپاره د سملاسي طبي انتقال غوښتنه کړې وه او د اقدام نه کولو په صورت کې یې د سختو غبرګونونو خبرداری ورکړی و.

د بلوڅانو د یووالي غورځنګ مشرې ماهرنګ بلوچ ویلي چې په بلوچستان کې د سوله‌ییزو سیاسي او ټولنیزو فعالیتونو لپاره فضا ورځ تر بلې تنګېږي او هغه کسان چې د عدالت او حق غوښتنه کوي له فشارونو او ګواښونو سره مخ دي.

نوموړې ویلي چې د بشري حقونو فعال او د دغه غورځنګ غړی نظار مري بلوڅ په جبري توګه بې‌درکه شوی او تر اوسه یې د برخلیک په اړه هېڅ معلومات نشته.

همدارنګه د ذیشان ظهیر بلوڅ کورنۍ وايي، د هغه پلار له ۲۰۱۵ کال راهیسې بې‌درکه و او وروسته په ۲۰۲۵ کال د جون په ۲۹مه وژل شوی دی. کورنۍ یې وایي چې کلونه کېږي له سختو کړاوونو او بې‌درکیو سره مخ دي.

ماهرنګ بلوڅ ادعا کړې چې د ذیشان خور ادیبه بلوڅ د فشارونو له امله اړ شوې څو په یوه خبري غونډه کې له دغه غورځنګ څخه د بېلتون اعلان وکړي، چې د بشري حقونو فعالان یې د رواني فشار بېلګه بولي.

هغه زیاتوي چې فوزیه بلوڅ او د هغې کورنۍ هم له ورته فشارونو سره مخ شوي، او د هغې ورور دادشاه د ۲۰۲۶ کال د اپرېل په ۲۱مه له خپل کور څخه بې‌درکه شوی دی.

راپورونه وایي چې د عدالت غوښتنې له امله د کورنۍ غړي نیول شوي او وروسته خوشې شوي دي.

ماهرنګ بلوڅ ټینګار کړی چې د دوی غورځنګ سوله‌ییز دی او خپلو فعالیتونو ته به دوام ورکوي، او له نړیوالو بشري حقونو ادارو یې غوښتي چې د بلوچستان وضعیت ته جدي پاملرنه وکړي.

د چین ولسمشر شي جین پینګ په بېجینګ کې د امریکا له ولسمشر ډونالډ ټرمپ سره په لیدنه کې خبرداری ورکړی، که د تایوان مسئله په سمه توګه مدیریت نه شي، نو چین او امریکا ښايي له ټکر او حتی شخړې سره مخ شي.

شي جین پینګ ویلي، د دواړو هېوادونو اړیکې به ډېر خطرناک حالت ته ولاړې شي که د تایوان موضوع په احتیاط او تفاهم حل نه شي.

نوموړي تایوان د بېجینګ او واشنګټن ترمنځ تر ټولو مهمه موضوع بللې.

چین تایوان د خپلې خاورې برخه ګڼي، خو تایوان دا ادعا ردوي او ځان خپلواک اداره کېدونکی ټاپو بولي.

همدارنګه، بېجینګ تایوان ته د امریکا د وسلو له پلور سره هم سخت مخالفت ښودلی دی.

د امریکا ولسمشر ډونالډ ټرمپ د پنجشنبې په ورځ د چین په پلازمېنه بېجینګ کې د چین له ولسمشر شي جین پینګ سره وکتل، او د دواړو هېوادونو ترمنځ د لوړې کچې مهمه سرمشریزه پیل شوه چې ټاکل شوې تر جمعې ورځې دوام وکړي.

دغه غونډه د سوداګرۍ، تعرفو، تایوان، ایران، مصنوعي ځیرکتیا (AI) او نادرو معدني موادو په ګډون پر مهمو نړیوالو موضوعاتو راڅرخي.

د راپورونو له مخې، د امریکا یو شمېر سوداګریز مشران هم د ټرمپ په پلاوي کې شامل دي.

ټرمپ د لیدنې په پیل کې ویلي چې د امریکا او چین اړیکې به تر بل هر وخت غوره شي.

هغه زیاته کړې چې دی او شي جین پینګ له اوږدې مودې راهیسې یو بل پېژني او د دواړو هېوادونو ترمنځ همکاري کولی شي نړیوال اقتصاد ته ثبات ورکړي.

بل لور ته، شي جین پینګ له ټرمپ سره په خبرو کې د “توسیدیدس جال” یادونه کړې؛ دا هغه اصطلاح ده چې د یوه راپورته کېدونکي ځواک او واکمن ځواک ترمنځ د شخړې احتمال ته کارول کېږي.

نوموړي پوښتنه کړې چې ایا امریکا او چین کولی شي له دې خطرناک حالت څخه ځانونه وژغوري او اړیکې د سیالۍ پر ځای د همکارۍ پر لور یوسي.

دواړو مشرانو د هرکلي رسمي مراسم هم وکتل چې د بېجینګ د خلکو په ستر تالار کې ترسره شول.

د امریکا ولسمشر ډونالډ ټرمپ د پنجشنبې په ورځ د چین په پلازمېنه بېجینګ کې د چین له ولسمشر شي جین پینګ سره وکتل، او د دواړو هېوادونو ترمنځ د لوړې کچې مهمه سرمشریزه پیل شوه چې ټاکل شوې تر جمعې ورځې دوام وکړي.

دغه غونډه د سوداګرۍ، تعرفو، تایوان، ایران، مصنوعي ځیرکتیا (AI) او نادرو معدني موادو په ګډون پر مهمو نړیوالو موضوعاتو راڅرخي.

د راپورونو له مخې، د امریکا یو شمېر سوداګریز مشران هم د ټرمپ په پلاوي کې شامل دي.

ټرمپ د لیدنې په پیل کې ویلي چې د امریکا او چین اړیکې به تر بل هر وخت غوره شي.

هغه زیاته کړې چې دی او شي جین پینګ له اوږدې مودې راهیسې یو بل پېژني او د دواړو هېوادونو ترمنځ همکاري کولی شي نړیوال اقتصاد ته ثبات ورکړي.

بل لور ته، شي جین پینګ له ټرمپ سره په خبرو کې د “توسیدیدس جال” یادونه کړې؛ دا هغه اصطلاح ده چې د یوه راپورته کېدونکي ځواک او واکمن ځواک ترمنځ د شخړې احتمال ته کارول کېږي.

نوموړي پوښتنه کړې چې ایا امریکا او چین کولی شي له دې خطرناک حالت څخه ځانونه وژغوري او اړیکې د سیالۍ پر ځای د همکارۍ پر لور یوسي.

دواړو مشرانو د هرکلي رسمي مراسم هم وکتل چې د بېجینګ د خلکو په ستر تالار کې ترسره شول.

سي‌اېن‌اېن راپور ورکړی چې د امریکا سنا مجلس د روان کال لپاره د اووم ځل په توګه هغه طرحه رد کړه چې هدف یې د ډونالډ ټرمپ د جګړه‌ییزو واکونو محدودول او له ایران سره د هر ډول راتلونکو پوځي اقداماتو لپاره د کانګرس د اجازې شرط ایښودل وو.

د راپور له مخې، دغه طرحه د ۵۰ مخالفو او ۴۹ موافقو رایو په پایله کې له تصویب پاتې شوه او پرمخ لاړه نه شوه.

سی‌اېن‌اېن ویلي، ډیموکراټ سناتور جان فټرمن د جمهوري غوښتونکو ترڅنګ د دې طرحې مخالفت وکړ، خو جمهوري غوښتونکو سناتورانو رنډ پال، سوزان کالینز او لیزا مورکوفسکي د ډیموکراټانو ترڅنګ د طرحې ملاتړ وکړ.

راپور زیاتوي، ځینو جمهوري غوښتونکو سناتورانو، په ځانګړي ډول لیزا مورکوفسکي او ټام ټیلیس، استدلال کړی چې که له ایران سره روانه جګړه تر ۶۰ ورځو اوږده شي، نو کانګرس باید د جګړې د دوام یا پوځي عملیاتو د اجازې په پرېکړه کې رول ولري او یا لږ تر لږه پرې زیات نظارت وکړي.

د امریکا اساسي قانون له مخې، کانګرس د جګړې د اعلان واک لري، خو ولسمشر د پوځ د اعلی قوماندان په توګه د بیړنیو پوځي اقداماتو صلاحیت هم لري؛ هغه موضوع چې تل د امریکا په سیاست کې د بحث وړ پاتې شوې ده.

د پښتون ژغورنې غورځنګ د یوې اعلامیې په خپرولو سره ویلي، چې د دغه غورځنګ پر ضد د «مجرمانه رنګ» ورکولو یو منظم او پلان شوی کمپاین روان دی، چې دا ځل د یوې سیاسي ډلې له لوري مخته وړل کېږي.

د پښتون ژغورنې غورځنګ د مرکزي اطلاعاتو په خپره شوې اعلامیه کې راغلي، چې تر دې وړاندې هم برېتانوي استعماري نظام د پښتنو او د برصغیر د نورو محکومو قومونو پر ضد ورته تګلارې کارولې وې، او د هماغه استعماري میراث دوام اوس هم د بېلابېلو څېرو له لارې روان دی.

اعلامیه زیاتوي، سیاسي اختلافات خپل ځای لري، خو یو ولسي تحریک ته مجرمانه بڼه ورکول او د پولیسو د مخبرانو په څېر چلند کول د منلو وړ نه دي.

یاد غورځنګ دغه روان کمپاین د یوه پراخ استعماري اجنډا برخه بللې او ویلي یې دي، چې موخه یې د پښتنو د حقیقي غږ خاموشه کول او بدنامول دي.

د غورځنګ په وینا، «تاریخ به هېڅکله هغه کسان ونه بښي چې د پښتنو د اصلي غږ په ځپلو کې رول ولوبوي.»

د پښتون ژغورنې غورځنګ ټینګار کړی، چې دغه غورځنګ د پښتنو یوه حقیقي ولسي مبارزه ده او د پښتني سیمو پر ضد د استعماري جګړې پر وړاندې به خپل غږ پورته کولو ته دوام ورکوي.

وړاندې تر دې، د عوامي نیشنل ګوند مشر ایمل ولي خان د پښتون ژغورنې غورځنګ د ټي‌ټي‌پي وسله والې ډلې سره مقایسه کړی و، او ویلي یې وو، چې د پښتون ژغورنې غورځنګ، تحریک انصاف او ټي‌ټي‌پي یوه بڼه ده او له یوه لورې فعالیت کوي.

د امریکا مرکزي قومندانۍ (سنتکام) اعلان کړی چې د ایران د سویلي بندرونو او ساحلونو د سمندري محاصرې له پیل راهیسې ۶۷ سوداګریزې بېړۍ اړ شوې دي چې خپلې لارې بدلې کړي.

د سنتکام په وینا، امریکايي ځواکونو ۱۵ هغو بېړیو ته د تېرېدو اجازه ورکړې چې بشري مرستې یې لېږدولې.

دغه راز، څلور نورې بېړۍ د امریکايي ځواکونو د اقداماتو له امله له فعالیته لوېدلې دي.

سنتکام ویلي، دا اقدامات د سیمې د امنیت او د سمندري تګ راتګ د کنټرول په موخه ترسره کېږي، خو تر اوسه ایراني چارواکو په دې اړه رسمي غبرګون نه دی ښودلی.

ایران کې د طالبانو حکومت سفارت په خپره کړې خبرپاڼه کې ویلي، چې د دې حکومت سفیر مولوي فضل محمد حقاني د تهران له والي محمد صادق معتمدین سره لیدلي دي.

په خبرپاڼه کې راغلي چې په دې کتنه کې دواړو لورو د افغانستان د “اسلامي امارت” او د ایران اسلامي جمهوریت ترمنځ د اړیکو د لا پیاوړتیا او پراختیا پر اړتیا ټینګار کړی دی.

همدارنګه د خبرپاڼې له مخې، دواړو خواوو د اقتصادي، سوداګریزو او تعلیمي همکاریو پر پراختیا خبرې کړي او د کابل او تهران د سوداګریزو خونو ترمنځ د تعاملاتو د زیاتولو پر اهمیت هم موافقه شوې ده.

د پلچرخي زندان څخه سرچینې وایي، تېره شپه درې هغه بندیان چې د قتل په قضیو کې محکوم شوي وو او د شل کلن بند او اعدام حکمونه پرې صادر شوي وو، له زندانه تښتېدلي دي.

د سرچینو په وینا، ګومان کېږي چې د زندان رئیس ملا خاکسار د درې لکه امریکایي ډالرو رشوت په بدل کې دغو بندیانو ته د تېښتې زمینه برابره کړې ده.

تر اوسه د طالبانو حکومت او د پلچرخي زندان ادارې په رسمي ډول د دې پېښې په اړه څه نه دي ویلي