د طالبانو حکومت د اقتصاد وزارت ویلي، چې په افغانستان کې موسسو خپل فعالیتونه نه دي درولي؛ بلکې پنځوسو موسسو د یو شمېر برخو فعالیتونه ځنډولي دي.
د یاد وزارت ویاند ویلي، چې دا فعالیتونه د لنډ وخت لپاره تړل شوي او ښايي بېرته پیل شي.
دا په داسې حال کې ده، چې تازه د امریکا د بهرنیو چارو وزارت ویلي، چې د دوی له لوري نورو هېوادونو ته د ځنډول شویو پراختیايي مرستو په بیا ورکړه کې استثنا شتون لري.
د امریکا د بهرنیو چارو وزیر مارک روبیو ویلي، چې یو شمېر بشر دوستانه مرستې د ټرمپ له هغې پرېکړې استثنا دي، چې له مخې یې پر ټولې نړۍ پراختیايي مرستې بندې شوې دي.
مارک روبیو ویلي، چې د امریکا له ملاتړه برخمنې یو شمېر موسسې چې بشري مرستې وړاندې کوي، په همدې درې میاشتو موده کې هم فعالیت کولای شي.
د نوموړي په خبره، د خوړو، روغتیا، سرپناه، او د ژوند د معیشت برخې له دغې پرېکړې استثنا دي او هغه موسسې چې په دې برخه کې فعالیت کوي، نو کولای شي، چې خپلو فعالیتونو ته دوام ورکړي.
د افغانیو کارولو او د اسعارو، سرو زرو، قیمتي ډبرو قاچاق د مخنیوي په اړه د طالبانو حکومت د ریاست الوزرا له لوري یو تازه حکم صادر شوی دی.
په یاد حکم کې راغلي، چې هیڅوک نشي کولای له هېواد څخه د باندې د ځمکې له لارې تر پنځه سوه او د هوا له لارې تر پنځه زره زیات ډالر ولېږدوي.
سرچینه زیاتوي، که هر چا دا کار وکړ، نو د یو میلیون ډالرو د انتقال په صورت کې به په یو کال، د سل زرو ډالرو انتقال په صورت کې به یوه میاشت او تر دې ښکته به تر لسو ورځو پورې په بند محکومیږي.
د ریاست الوزرا له مقام څخه خپره شوې خبرپاڼه کې راغلي، چې هېواد ته د سیمې هېوادونو پورې اړوند کرنسۍ راوړل ممنوع دي.
دوی دغه راز له ټولو افغانانو غوښتي چې راکړه ورکړه په افغانیو وکړي.
طالبانو هغه کسان نیولي، چې تېره شپه یې خوست کې لس کسان قتل کړي وو.
خوست کې د طالبانو حکومت د والي ویاند مستغفر ګربز په خپله ایکس پاڼه لیکلي، چې د دې پیښې په تړاو یې دوه تنه نیولي چې تر ډېره پرې د دغه پېښې شک کېده.
هغه ویلي، چې له دغه کسانو څخه څېړنې روانې دي.
تر اوسه د یادو کسانو د هویت په اړه څه نه دي ویل شوي.
د یادونې ده چې تېره شپه د علیشیرو په بوخانه سیمه کې د یوې کورنۍ لس غړي د ښځو او ماشومانو په ګډون په خپل کور کې وژل شوي وو.
د روسیې ولسمشر ولادمیر پوتین وايي، چې د زیلنسکي قانوني دوره ختمه شوې او هغه نور د اوکراین د برخلیک ټاکلو صلاحیت نه لري.
پوتین زیاتوي، دا واک باید د اوکراین پارلمان ولري، چې له مونږ سره د سولې هوکړه کوي او که جګړې ته دوام ورکوي.
پوتین تر دې وړاندې ویلي وو، چې د اوکراین جګړې په اړه له امریکا سره خبرو ته چمتو دی.
د یادونې ده چې د زیلنسکي د ولسمشرۍ دوره په ۲۰۲۴ کال کې ختمه شوه؛ خو هلته د جګړې له کبله د ولسمشرۍ ټاکنې نه دي ترسره شوي.
سپينه ماڼۍ وايي، د امریکا ولسمشر، ډانلډ ټرمپ چمتو دی چې چې د فبروري پر لومړۍ ورځ پر کاناډايي او مکسیکوي وارداتو تعرفې ولګوي.
د سپینې ماڼۍ ویاندې کارولین لیوېټ ویلي، ټرمپ اوس هم پر چین د نویو تعرفو لګولو موضوع په جدي توګه څاري.
دا په داسې حال کې ده، چې ټرمپ پر خپلو کمپایني منډو ترړو کې هم ویلي وو، چې پر کاناډا او مکسیکو به تعرفې لوړې کړي.
د خوست علیشرو ولسوالۍ بوخانې سیمې کې نامعلومو وسله والو د یوې کورنۍ لس کسان په ډزو وژلي.
وژل شویو کسانو کې ښځې او ماشومان هم شامل دي.
سیمهییز مسؤلین وایي چې پېښه د شخصي دوښمنۍ له کبله رامنځته شوې.
د امریکا ولسمشر ډونالډ ټرمپ د اسرائیل لومړي وزیر بنیامین نتنیاهو ته بلنه ورکړې، چې د فبروري په څلورمه ورسره په واشنګټن کې وګوري.
د یادې ناستې محور تر ډېره غزې کې پر اوربند او سوله، د سیمې هېوادونو او د ګډ دوښمن پر وړاندې مبارزه ښودل شوې.
د نتنیاهو له دفتر څخه په خپره شوې خبرپاڼه کې راغلي، چې دا لیدنه د دواړو هېوادونو د اړیکو د ټینګښت لپاره ترسره کېږي.
د یادونې ده، چې واک ته د ټرمپ له بیا رسېدو ورسته به بنیامین نتنیاهو لومړنی بهرنی مېلمه وي، چې واشنګټڼ ته ځي.
د افغانانو د تخلیې پروګرام مسوول یو وار بیا د افغانانو د ژوند پر ژغورولو ټینګار کړی.
شان وان ډایور ویلي، چې د افغان متحدینو ژوند باید همدا اوس وژغورل شي.
نوموړی زیاتوي، افغانان د یوې سیاسي پرېکړې له کبله د تخلیې پروګرام کې لاهم له ناڅرګند برخلیک سره مخ دي.
وان ډایور ویلي، باور لري چې دا چاره د امریکا د بهرنیو چارو وزیر له یوې ټیلیفوني اړیکې سره هم بدلېدلی شي.
لیکوال: حلیم فدایي
الله جل جلاله فرمایي:
يَا أَيُّهَا الَّذِينَ آمَنُوا اتَّقُوا اللَّهَ وَقُولُوا قَوْلًا سَدِيدًا يُصْلِحْ لَكُمْ أَعْمَالَكُمْ وَيَغْفِرْ لَكُمْ ذُنُوبَكُمْ ۗ وَمَنْ يُطِعِ اللَّهَ وَرَسُولَهُ فَقَدْ فَازَ فَوْزًا عَظِيمًا
(سورة الأحزاب: 70-71)
ژباړه:
ای هغو کسانو چې ایمان مو راوړی! د الله ویره وکړئ او سمه خبره وکړئ. نو هغه به ستاسو کړنې سمې کړي او ستاسو ګناوې به در وبښي، او څوک چې د الله او د هغه د رسول اطاعت وکړي، هغه په لوی بریا بریالی شو.
نو زه له همدې آیت څخه په الهام او رهنمایي تاسو ته لاندې مهمې مشورې درکوم او په جدي ډول یې رعایت کړئ:
۱. د بین الافغاني مذاکراتو پیل او پیاوړي کول.
۲. د دې مذاکراتو په نتیجه کې د یوه ټولګډونه او ټولمنلي اسلامي نظام جوړول چې د ټولو افغانانو استازیتوب وکړي.
۳. د مېرمنو په ګډون د ژوند په هره برخه کې د بشري حقونو درناوی او رعایت.
۴. د انحصار، استبداد، حذف سیاست، جهالت، افراطیت او بېعدالتۍ پای ته رسول.
۵. د ملا له قشر پرته هر قوم، هره ژبه، هر مذهب او هر افغان نر او ښځه باید په سیاسي نظام کې خپل استازی او حق وویني.
۶. له هر ډول نړېوالو تروریستي شبکو او افرادو او د مخدره موادو له قاچاقبرانو سره اړېکې وشکوئ او داسې سیاست ونیسئ چې هم له افغانانو او هم له نړۍ سره په سوله کې ژوند وکړئ.
یاد ساتئ:
دا افغانستان دی، نه کچلاغ او نه دارالعلوم حقانیه. یوازې د نجونو تعلیم د افغانستان د بحران یوازینی حل نه دی.
ځینې سادهلیدي او سطحي نظر لرونکي خلک د افغانستان ټولې ستونزې یوازې په ښځو کې را لنډوي؛ داسې نه ده.
که چېرې پورته شپږ خبرې ومنئ، ستاسو د تورلیسټ، د نړېوالو بندیزونو، ملي مشروعیت او نړېوال رسمیت مشکل په خپله حلېږې. د پورته ستونزو د حل لپاره دا شرطونه او موانع مه ږدئ.
که دا مشوره منئ، کور مو ودان. که نه، نو یاد ولرئ: لکه څنګه چې په ۱۹۹۸ کې مې ستاسو د برخلیک په اړه وړاندوینې ټکي په ټکي رښتیا شوې، دا ځل هم په ډاډ وایم:
که همداسې روان یاست، په خدای قسم چې په کلیو او بانډو کې به خلک ستاسو لونګې په لغتو ووهي، او چې یوازې “ملا” مختاړی یا وروستاړی درسره وي، ځای به نه لرئ.
په صراحت وایم: موږ د قدرت او واک په شریکۍ کې هېڅ شخصي ګټه نه لرو. موږ هیڅ واک نه غواړو.
نور که غوړه مالان راته شکنځلې کوي، وایې چې زما مشورو ته اړتبا نلري، دروغ راباندې تړي او په کبر او غرور سپاره یاست، وبه ګورو چې تاریخ ستاسو په خوا درېږي که زموږ په خوا.
وما علینا الا البلاغ!
یادونه: حماسه میډیا د یوې بې پرې رسنۍ په توګه د ټولو سیاستوالو ، لیکوالو او نظر خاوندانو لیکنو او نظریاتو ته درناوی لري، دا لیکنه د حماسه میډیا نظر نه څرګندوي بلکې د لیکوال نظر دی او مونږ یې کټ مټ دلته خپروو.