د بلوچستان په قلعه عبدالله سیمه کې تېره شپه د وسله والو په برید کې دوه پاکستاني پوځیان وژل شوي دي.
رویټرز خبري اژانس وايي، پر یوې امنیتي پوستې په برید کې د دوو ځانمرګو په ګډون پنځه وسله وال او دوه پاکستاني پوځیان وژل شوي دي.
رویټرز زیاته کړې، چې لومړی په دغه امنیتي پوسته موټر بم برید ترسره شوی او وروسته د دواړو لوریو ترمنځ نښته شوې.
د دغه برید مسولیت تر اوسه کومې ډلې نه دی منلی.
د طالبانو حکومت د اقتصاد وزارت ویلي، چې په دې وروستیو کې په افغانستان کې د څه باندې ۵۰ موسسو فعالیتونه په ټپه درېدلې دي.
یاد وزارت ویلي، چې د دغو بنسټونو د فعالیتونو د ځنډېدو لامل د بهرنیو مرستو ځنډېدل دي.
په ورته وخت کې د طالبانو حکومت د اقتصاد وزارت مرستیال عبداللطیف نظري د امریکا په ګډون له مرسته کوونکو هېوادونو غوښتي چې د بشري مرستو په برخه کې دې سیاست نه کوي.
دا په داسې حال کې ده چې په دې وروستیو کې ډونالډ ټرمپ له اسرائیل او مصر پرته پر ټوله نړۍ هر ډول مرستې بندې کړې.
د طالبانو حکومت د کډوالو او راستنېدونکو چارو وزارت سرپرست مولوي عبدالکبیر ویلي، چې د طالبانو حکومت د علماوو او مشرانو سلا مشورو ته ضرورت لري.
مولوي عبدالکبیر خوست ولایت ته په سفر کې له علماوو او قومي مشرانو سره په کتنه کې ویلي، چې د دوی حکومت خپلې چارې د ولس په مشورو مخته وړي.
نوموړي زیاته کړې چې د طالبانو حکومت د افغانستان د پرمختګ پر وړاندې خنډونه لهمنځه وړي.
هغه ویلي، نړۍ پوهېږي، چې د طالبانو حکومت د افغانانو ښه استازولي کولای شي.
د طالبانو حکومت د سرحدونو، قومونو او قبایلو چارو وزارت سرپرست وزیر نورالله نوري ویلي، چې دا نظام یوازې د طالب نه؛ بلکې د ټولو افغانانو دی.
هغه ویلي، افغانان اصلي« فاتحین» دي او دوی ته یې میدان ګټلی.
نوموړي یو وار بیا د افغانانو ترمنځ پر یووالي ټینګار کړی؛ خو ویلي یې دي، چې په افغانستان کې تل فکري اختلافونو انقلابونه راوستي دي.
د یادونې ده، چې نن د سرحدونو، قومونو او قبایلو چارو وزارت کابل کې د نظام د ثبات او د خلکو ترمنځ د یووالي لپاره ناسته رابللې وه، چې نورالله نوري هم په کې خبرې وکړې.
د امریکا سنا مجلس اسکاټ بسنټ د دغه هېواد د خزانې وزیر په توګه ومانه.
هغه تېره ورځ ۶۸ موافقې او ۲۹ مخالفې رایې تر لاسه کړې.
نوموړی د امریکا د پخواني ولسمشر بایډن له منتقدینو څخه شمېرل کېده، چې ویل یې د امریکا لګښتونه هم له کنټرول وتلي دي.
یاد وزیر دغه راز د امریکا د اضافي لګښتونو پر کنټرول هم ټینګار کوو.
د طالبانو حکومت د امر بالمعروف وزارت د ښځو په اړه د یوناما وروستی راپور بې اساسه بللی.
یاد وزارت په یوه اعلامیه کې ویلي، چې دغه راپور د غربي لیدلوري په اساس جوړ شوی.
په اعلامیه کې زیاته شوې، چې د طالبانو حکومت د اسلامي اصولو، دیني او افغاني ارزښتونو او ټولنیزو حساسیتونو په پام کې نیولو سره د ښځو ټول حقونه خوندي کړي.
دوی له یوناما غوښتي چې خپلو راپورونو کې د افغانستان دیني او کلتوري ارزښتونو ته پام وکړي.
اعلامیه کې دغه راز ویل شوي، چې دوی د اسلام په رڼا او شریعت په چوکاټ کې د ښځو ټولو حقونو ته ژمن دي.
د طالبانو حکومت د بهرنیو چارو وزارت سرپرست امیر خان متقي وايي، د ایران او افغانستان ترمنځ د اوبو پر سر ستونزې د وچکالۍ له امله دي.
د ایران د بهرنیو چارو وزیر کابل ته له سفر وروسته په یوه غونډه کې ټینګار وکړ چې د طالبانو حکومت به د دغه حق د خوندي کولو په لاره کې هیڅ ډول خنډ رامنځته نه کړي.
د امریکا دفاع وزیر پیت هګسېت له افغان همکارانو پر ملاتړ ټینګار کړی.
هغه امریکا ته د افغان کډوالو د ورتلو په اړه ویلي، چی دی د خپلو افغان همکارانو په خوا کې ولاړ دی.
دا په داسې حال کې ده چې ټرمپ له راتګ سره امریکا ته د ورتلونکو کډوالو د ورتګ د ځنډېدو امر وکړ.
د طالبانو حکومت تر واک لاندې د افغانستان بانک اعلان کړی چې د افغانیو ارزښت ساتنې لپاره به د چهارشنبې په ورځ ۲۷ میلیونه ډالر لیلام کړي.
دا په تېره یوه اوونۍ کې څویم ځل دی، چې افغانستان بانک ډالر لیلاموي.
پر نړۍ او افغانستان د امریکا مرستو له بندېدو وروسته ډالر د افغانیو پر وړاندې پورته شول؛ خو افغانستان بانک وایي چې د افغانیو ثبات ساتنې لپاره کافي سرچینې واک کې لري.
افغانستان کې د ایران سفیر علي رضا بیکدلي وايي، کابل ته د عباس عراقچي سفر د طالبانو حکومت د رسمیت پېژندلو په معنی نه دی.
علي رضا بېکدلي ویلي، چې رسمیت پېژندنه یوه حقوقي موضوع ده، چې خپل نړیوال حقونه او ځانګړتیاوې لري.
هغه د کابل او تهران ترمنځ نږدې اړیکې اړینې بللې دي.
د یادونې ده، چې وړمه ورځ د ایران د بهرنیو چارو وزیر عباس عراقچي په یو ورځني سفر کابل ته راغلی وو، چې دلته یې د طالبانو حکومت له بېلابېلو چارواکو سره وکتل.