د تحریر الشام مشر احمد الشرع د سوریې انتقالي پړاو کې رسما د سوریې د نوي دولت مشر وټاکل شو.

الجزیرې تلویزیون ویلي، چې په دې اړه جوړو شویو مراسمو کې چې د تحریر الشام په ګډون د سوریې د ځینو ګوندونو مشرانو په کې ګډون کړی وو، پرېکړې شوې، چې پخوانی اساسي قانون، ولسي جرګه، د اسد پوځ او پخواني رژیم اړوند امنیتي ادارې لغوه دي.

الجزیرې تلوېزیون زیاته کړې، چې دې مراسمو کې د نویو امنیتي ادارو د جوړولو پرېکړه هم شوې، چې د خلکو امنیت وساتي.

د یادونې ده، چې تحریرالشام د تېر میلادي کال وروستۍ میاشت د بشارالاسد نظام ړنګ او واک یې ترلاسه کړ.

د ایران د بهرنیو چارو وزیر عباس عراقچي ویلي چې له طالبانو سره د سیمې هېوادونو تعامل اړین دی.

عباس عراقچي افغانستان یو مهم ګاونډی بللی.

نوموړي د افغان کډوالو په اړه ویلي چې هېواد یې د یو چوکاټ له مخې خپل هېواد ته د افغان کډوالو ستنولو ته ژمن دی.

عراقچي دغه راز د حقابې په اړه هم زیاتوي چې طالبان یې د هملند په سیند کې د حقابې ورکړې ته ژمن دي.

اسرائیلي چارواکي وايي، په پام کې ده، چې حماس به نن په غزه کې درې یرغمل شوي اسرائیلیان او پنځه تایلنډیان خوشي کړي.

دغه چارواکو ویلي، چې د اسرائیلي یرغمل شویو کسانو بدل کې ۱۱۰ فلسطیني بندیان د اسرائیل له زندانونو خوشي کېږي.

که دغه بهیر نن بشپړ شي، دا به په غزه کې د اوربند هوکړې یوې برخې په توګه د یرغمل شویو اسرائیلیانو درېیمه ډله وي، چې خوشي کېږي.

بل لور د تایلنډي یرغمل شویو کسانو خوشي کېدل د حماس یواړخیز ګام دی او د اوربند هوکړې برخه نه بلل کېږي.

راپورونو کې ویل شوي، چې دا کسان کرنیز کارګر دي، چې له اسرائیله تښتول شوي وو.

‏د امریکا ولسمشر ډونالډ ټرمپ د دغه هېواد دفاع وزارت او د کورني امنیت وزارت ته امر کړی، چې ګوانتانامو زندان کې د ۳۰ زره ناقانونه کډوالو لپاره ځای جوړ کړي.

ډونالډ ټرمپ ویلي، چې دغه مرکز ته به امریکا ته ګواښ پېښونکي کډوال ولېږدوي.

د یادونې ده چې په ګوانتانامو کې د امریکا پوځي اډه پخوا د ترهګرو په ګډون د بندیانو د ساتلو لپاره کارول کیده.

په دغه زندان کې امریکا د عراق او افغانستان د جګړو پر مهال د طالبانو د ځینو مشرانو په ګډون زرګونه کسان بندیان کړي وو.

د ازادۍ جبهې د یوې ویډیو په خپرولو سره په کندز کې د نن ماښام د چاودنې مسوولیت منلی.

دغې جبهې ویلي، چې د دې برید په پایله کې څلور طالب سرتېري یې وژلي او درې نور یې ټپیان کړي دي.

د طالبانو حکومت تر اوسه په دې اړه څه نه دي ویلي.

د بریتانیا د بهرنیو چارو وزارت مرستیال همیش فالکونر وایي چې د افغانستان لپاره د بشري مرستو په اړه یې یوه غونډه کړې ده.

فالکونر ویلي چې بریتانیا د افغانستان له خلکو، په ځانګړي ډول له ښځو او نجونو، سره پر خپله ژمنه ولاړه ده.

هغه زیاته کړې، ویاړي چې د خوړو نړیوال پروګرام او د ملګرو ملتونو د وګړو صندوق د افغانستان لپاره جوړې شوې غونډې کې د دوی مېلمانه وو.

تر دې مخکې، همیش فالکونر ویلي وو چې د افغانستان د ښځو او نجونو د حقونو دفاع د بریتانیا له مهمو لومړیتوبونو څخه ده.

د کندز یو شمېر ځایي سرچینو ویلي، چې نن چهارشنبه ماښام د کندز ښار په لومړۍ امنیتي حوزه کې چاودنه شوې ده.

تر اوسه ددغې چاودنې د نوعیت او مرګ ژوبلې په اړه څه نه دي ویل شوي.

د طالبانو حکومت هم تر اوسه د دې چاودنې په اړه څه نه دي ویلي.

په تېر یوه کال کې خوست کې د ځان وژنو ۷۲ پېښې ثبت شوې دي.

د یاد ولایت د طالبانو حکومت امنیې قومنداني ویلي چې په دغو کسانو کې ۳۸ نارینه او ۳۴ ښځینه دي.

د یادونې ده چې هېواد کې تر ډېره د فقر، کورنیو او رواني ستونزو له کبله دا ډول پېښې رامنځته کېږي.

قطر کې د طالبانو حکومت سرپرست سفیر سهیل شاهین د افغانستان لپاره د فرانسې له سفیر سره دوه اړخیزو اړیکو، د روغتیا په برخه کې د همکارۍ، او د کابل هوایي ډګر اړوند د مخکنیو خبرو د تعقیب پر موضوعاتو خبرې کړې دي.

سهیل شاهین پر خپله ایکس پاڼه لیکلي، چې له جین میرین سره یې د سیمې او نړۍ په اړه هم پر یو شمېر موضوعاتو بحث کړی دی.

شاهین تر دې وړاندې ویلي و، چې قطر له نورو هېوادونو سره د اړیکو ټینګولو لپاره تر ټولو غوره مرکز دی او یاد هېواد هم په دې برخه کې غوره رول لوبولی دی.

طالبانو دوه روحاني منتقدین محمود حسن او عبدالقادر قانت نیولي دي.

یادو کسانو د دوشنبې په ورځ د اسلامي او جهادي ارزښتونو شورا له لوري جوړه شوې غونډه کې ویلي وو، چې د طالبانو حکومت مشر شیخ هبت‌الله اخوندزاده واک انحصار کړی او د کابینې ۱۲ وزیران یې له پنجشیر څخه دي.

یاد کسان د سې شنې په ورځ د طالب استخباراتو له لوري نیول شوي دي.

تر اوسه د هغوی د ځای په اړه څه نه دي ویل شوي.