د بالیووډ ستوري درمندرا سنګ دیوال د مړینې په اړه د هندي رسنۍ راپورونه رد شول.
د هغه میرمن هما ماليني او لور اشا دیوال تایید کړې چې د درمندرا سنګ روغتیايي وضعیت «ثابت او په ښه کېدو دی.»
د نوموړي کورنۍ له رسنیو او خلکو غوښتنه کړې چې د دوی شخصي ژوند ته درناوی وکړي.
د راپورونو له مخې، ښاغلی دیوال د دوشنبې په ورځ د ساه تنګۍ له امله روغتون ته وړل شوی و، چې وروسته یې هندي رسنیو د مړینې راپورونه خپاره کړل.
په ملګرو ملتونو کې د پاکستان استازي عاصم افتخار احمد ویلي، چې په افغانستان کې له امریکا څخه د پاتې شویو پرمختللو وسلو او مهماتو زیرمو د سیمې لپاره جدي ګواښ رامنځته کړی دی.
افتخار احمد، د ملګرو ملتونو امنیت شورا په ناسته کې ویلي، چې داعش خراسان، پاکستاني طالبان او نورې وسلهوالې ډلې له دغو وسلو څخه د پاکستان پر خلکو او امنیتي ځواکونو د بریدونو لپاره کار اخلي.
نوموړي ادعا کړې چې د دغو وسلو د قاچاق په تړاو د کره او موثقو معلوماتو په درلودلو په سرحدي سیمو کې نیول شوي او په تورو بازارونو کې هم پلورل کېږي، چې د سیمې ثبات او امنیت ته ستر خطر پیښولای شي.
د پاکستان دغه استازي ټینګار کړی چې نړیواله ټولنه باید د وسلو د قاچاق مخنیوي لپاره ګډې هڅې پیاوړې کړي او طالبان هم باید د دې جریان پر وړاندې خپل مسؤلیتونه عملي کړي.
د پاکستاني رسنیو د راپورونو له مخې، د تورخم دروازې د یوې میاشتې تړل کېدو له امله د دواړو هېوادونو سوداګریزو فعالیتونو د پام وړ زیانونه ګاللي.
راپورونه ښيي چې په دې موده کې په وارداتو او صادراتو کې شاوخوا ۴.۵ میلیارده ډالره او ۱۶.۵ میلیارده روپۍ تاوان رامنځته شوی دی.
یادو رسنیو زیاته کړې چې پر افغانستان د طالبانو حکومت د بیا واکمنۍ راهیسې پاکستان د افغان بازار شاوخوا ۶۵ سلنه برخه له لاسه ورکړې، او دغه بازار ایران، مرکزي اسیا، ترکیې او هند ته انتقال شوی.
د اسلام اباد او کابل سیاسي ناندریو د دواړو هیوادونو اقتصادي وضیعت ترینګلی کړی او ترمنځ یې سوداګرو ته پراخ مالي زیانونه اړولي.
د امریکا د بهرنیو چارو وزارت ویلي، د نوي ډهلي وروستۍ چاودنې ژور خواشیني کړي او د وضیعت د ارزونې په موخه به له نږدې څارنه کوي.
دا په داسې مهال کې ده چې وړمه شپه د هند په نوي ډهلي کې د چاودنې له امله نږدې اته کسان وژل شوي او شا او خوا شل تنه یې ټپیان کړي دي.
د هند لومړي وزیر نریندرا مودي دا پیښه تروریستي عمل بللې او ویلي یې دي چې ډېر ژر به د پیښې علت معلوم او ارزیابي کړي.
د امریکا سنا جرګې د هېواد د تر ټولو اوږد حکومتي بندیز د پای ته رسولو لپاره یوه طرحه د ۶۰–۴۰ په رایو تصویب کړه.
دغه بندیز څو اونۍ وړاندې پیل شوی و او د میلیونونو امریکایانو ژوند یې تر اغېز لاندې راوستی و چې له مخې یې د خوړو مرستې ګډوډې شوې وې، سلګونه زره فدرالي کارکوونکي بې معاشه پاتې شوي و، او د هوايي چلند خدمات هم له ستونزو سره مخ شوي وو.
د سنا په رایو کې ډېری جمهوري غوښتونکي او اته ډیموکراتانو د طرحې ملاتړ کړی.
دغه طرحه د SNAP د خوړو مرستو پروګرام تمویل هم تضمین کړی، چې د راتلونکي بندیز پر مهال خلک له سختو ستونزو سره مخ نشي او همدارنګه، د فدرالي کارکوونکو د معاشونو کمولو پلان به تر جنوري ۳۰ پورې وځنډول شي، ترڅو کارکوونکي په بې ثباتۍ ښکیل نشي.
د پښتونخوا د ملي عوامي ګوند مشر محمود خان اڅکزي پر پاکستاني حکومت سختې نیوکې کړې دي، او ویلي یې دي چې د اسلاماباد واکمن د برتانیې د پخواني استعماري سیاست تقلید کوي او هڅه کوي پر افغانستان خپله ولکه ټینګه کړي.
اڅکزي په یوه پیغام کې ویلي، د پاکستان واکمن غواړي افغانستان د ډیورنډ کرښه د رسمي پولې په توګه ومني، د بهرنیو اړیکو پرېکړې یې د اسلاماباد تر اغېز لاندې وي او د کابل حکومت د دوی د سیاسي امر تابع شي.
نوموړي زیاته کړې، د اوسني حکومت مشران د ملت د ګټو پر ځای د استعماري مفکورو تعقیب کوي او د ګاونډي هېوادونو سره د سالمو اړیکو چلند نهپېژني.
د باليووډ نوميالی ستوری درمندرا سنگ دیول د ۸۹ کلونو په عمر ومړ.
نوموړی د نفس تنګۍ له امله د ممبۍ په يو روغتون کې بستر شوی و، خو ډاکترانو يې د مړينې خبر تاييد کړی.
درمندرا په ۱۹۶۰ کال کې د «دل به تیرا هم به تیری» فلم له لارې هنري سفر پيل کړی و او وروسته د اکشن فلمونو له امله د «هند ځواکمن سړی» په نوم يادېده.
هغه دوه ودونه کړي وو او څلور اولادونه ترې پاتې دي.
درمندرا نه يوازې په هند، بلکې په افغانستان کې هم ګڼ مينه وال درلود.
د امریکا ولسمشر ډونالډ ټرمپ د سوریې له ولسمشر احمد الشرع سره په سپينه ماڼۍ کې کتلي.
د رویټرر د راپورونو له مخې احمدالشرع د خپلو خبرو وروسته ژمنه کړې چې د سوريې د بریا او ثبات لپاره به «هر ممکن ګام» پورته کړي.
احمد الشرع، چې پخوا د القاعدې پخوانی قوماندان بلل کېده او د واشنګټن تر بندیزونو لاندې و، د بشارالاسد له نسکورېدو وروسته د سوريې واکمن شوی او هڅه کوي ځان د منځلاري او یووالي غوښتونکي مشر په توګه نړۍ ته معرفي کړي.
د الشرع د واشنګټن د سفر یوه مهمه موخه د امریکا د سختو بندیزونو لرې کول وو.
د رویټرز د راپور له مخې، د دواړو مشرانو خبرې د تړلو دروازو تر شا ترسره شوې، خو د امریکا د خزانې وزارت اعلان کړی چې د موسومو «قیصر بندیزونو» د عملي کېدو ځنډ یې ۱۸۰ ورځو ته غځولی چې موقتي اقدام بلل کېږي.
د الشرع دا لیدنه، چې د هغه د واکمنۍ تر یو کال وروسته ترسره کېږي، د هغه د نړیوال مشروعیت د ټینګښت هڅو یوه مهمه برخه ګڼل کېږي.
د طالبانو حکومت د کورنیو چارو پخواني ویاند عبدالنافع ټکور ویلي چې په تاریخي ډول افغان حکومتونو د ملي او حساسو موضوعاتو د حل لپاره لویې جرګې راغوښتې دي او د جرړې پرېکړې به د وخت حکومت د ولسي مشروعیت په توګه منلې.
ټکور وايي، د لویې جرګې یو مهم رول دا و چې د هر ممکنه تاوان یا پایلې مسؤلیت به د خلکو له خوا ټاکل شوې جرګې ته ورګرځېده او پرېکړې به ملي باور پیدا کاوه.
نوموړي پوښتنه کړې:« نو که امارت هم په یوشمېر ملي مسائلو کې لویه جرګه راوبولي ښه به نه وي؟»
د طالبانو حکومت د کانونو او پټرولیم وزیر هدایتالله بدري اعلان کړی چې د غزني د زرکشانو د پولی میتال کان د پلټنې، استخراج او پروسس تړون یې له یوه خصوصي شرکت سره لاسلیک کړی دی.
بدري ویلي، «اسلامي امارت» هڅه کړې چې د کانونو کیندنه یوازې وړتیا لرونکو او مسلکي شرکتونو ته وسپاري.
د ده په وینا، دغه کان چې شاوخوا ۲۴۰ کیلومټره مربع مساحت لري، د شفافیت او اغېزمنې ګټې اخیستنې لپاره تر تړون لاندې راغلی، څو د کانونو په سکټور کې لا زیاتې اسانتیاوې رامنځته شي.