د طالبانو حکومت له لورې له شپږم ټولګي پورته د نجونو په ښوونځي د امر ثاني بندیز ۱۵۵۰ ورځو ته وغځید.
که څه هم طالب چارواکي وایي دا موضوع تر کار لاندې ده او هېله لري ژر تر ژره د نجونو پرمخ د ښوونځیو دروازې پرانیستل شي.
خو شنونکي نیوکه کوي چې د نجونو موضوع د طالبانو حکومت لپاره لومړیتوب نه لري او نه غواړي دغه حیاتي مسله روښانه کړي.
د پاکستان لومړي وزیر شهباز شریف د ترکمنستان «د سولې او باور نړیوال فورم» کې د ایران له ولسمشر مسعود پزشکیان سره په کتنه کې ویلي چې د افغانستان اوسنی حکومت باید وهڅول شي څو د پاکستان د امنیت له اړخه موجودې اندېښنې کمې کړي او په دې برخه کې عملي ګامونه پورته کړي.
شریف تر دې مخکې د یاد فورم د غونډې پر مهال په خپله وینا کې هم ادعا کړې وه چې پاکستان ته له افغانستانه امنیتي ګواښونه متوجه دي او اسلامآباد د دې وضعیت په اړه جدي اندېښنه لري.
د طالبانو حکومت د شهباز شریف تازه څرګندونو ته تراوسه رسمي غبرګون نه دی ښودلی.
د بالیووډ پیژندل شوي ستوري سلمان خان ویلي چې له تېرو ۲۵ کلونو راهیسې یې د باندې رسټورانټ کې ډوډۍ نه ده خوړلې.
د هند رسنیو له راپور سره سم، هغه د جده د ریډ سي فیسټیوال په یوه مرکه کې وویل چې زما ټوله ژوند د کار او سفر ترمنځ تېرېږي.
سلمان خان زیاته کړه:
«۲۵–۲۶ کاله شول چې زه د کور نه بهر ډوډۍ خوړلو ته نه یم تللی. له کوره کار ته، له کاره کور ته، له کوره هوايي ډګر ته، له هوايي ډګر هوټل ته، او بیا له هغه ځایه جده ته راغلم، او بېرته به خپل شوټینګ ته ستنېږم. همدا ده زما ژوند.»
هغه زیاته کړه:
«زما ډېره برخه ژوند د کورنۍ او ملګرو په منځ کې تېره شوې. ډېر پخواني ملګري لاړل، اوس یوازې ۴–۵ زاړه ملګري را پاتې دي.
د کندهار د سپین بولدک په شهید بازار سیمه کې د سورګل جامع جومات امام مولوي عزیزالله تېره شپه د نامعلومو وسلهوالو په برید کې ووژل شو.
برید هغه مهال رامنځته شوی چې مولوي عزیزالله د ماښام له لمانځه وروسته کور ته روان و.
طالب امنیتي چارواکي د پېښې پخلی کوي او زیاتوي چې په دې تور یې له یوشمیر کسانو پوښتنې ګرویږنې پیل کړي.
د طالبانو حکومت تر واک لاندې د کندهار د اطلاعاتو او کلتور ریاست مسوولین وايي، چې د احمدشاه بابا د تاریخي کور د ترمیم او بیارغونې پر مهال د احمدشاهي دورې درې مهم تاریخي اثار ترلاسه شوي دي.
دغه موندنې چې یو ډبرین پلیتهیي څراغ، یو خاورین څراغ او یو فلزي ځنځیر پکې شامل دي، د مسوولینو په وینا د څو پېړیو زړې بېلګې دي او د ودانۍ تاریخي ارزښت نور هم پیاوړی کوي.
د ریاست په خبره، موندل شوي اثار به له پاک کارۍ او ترمیم وروسته د احمدشاه بابا د کور په موزیم کې د احمدشاهي دورې له نورو ارزښتناکو توکو سره یو ځای، ځای پر ځای او نندارې ته وړاندې شي.
د پاکستان لومړی وزیر شهباز شریف وايي چې له افغانستان څخه د ترهګرۍ نوی ګواښ راټوکېدلی او نړیواله ټولنه باید پر طالبانو فشار زیات کړي تر څو خپلې امنیتي او نړیوالې ژمنې عملي کړي.
شهباز شریف دا څرګندونې د لېندۍ په ۲۱مه د ترکمنستان په پلازمېنه عشقاباد کې د سولې نړیوال کنفرانس ته په وینا کې کړې.
هغه ټینګار کړی چې د سیمې او نړۍ ثبات ګډو هڅو ته اړتیا لري او د افغانستان روان وضعیت د ټولو لپاره د اندېښنې وړ دی.
د عشقاباد په دې ناسته کې د روسیې، ترکیې، تاجکستان، ازبکستان، ترکمنستان، ایران، پاکستان، قزاقستان او قرغزستان په ګډون د ګڼو هېوادونو مشران ګډون کړی وو.
د خوړو نړيوال پروګرام (WFP) د اروپايي ټولنې لهخوا د ۲۵ ميليونه يورو تازه مرستې هرکلی کړی او وايي، دغه بوديجه به د افغانانو د ژوند د ښهوالي لپاره پر مهمو پروژو ولګېږي.
د ډبلیو اِف پي ایکس ادرس ویلي، چې دغه مرسته به د ښوونځيو د ماشومانو لپاره د خوراکي توکو د برابرولو تر څنګ، د اقليمي بدلون پر وړاندې د مقاومت لرونکو تاسيساتو په جوړولو، د ځایي خوراکي نظامونو په پياوړتیا او د ښځو او ځوانانو لپاره د کاري فرصتونو په رامنځته کولو کې ولګول شي.
اروپايي ټولنې د دسمبر په دويمه دا مرسته اعلان کړې وه او ټينګار کوي چې ملاتړ به د افغانانو د اقتصادي ثبات او ټولنيز ځواکمنتيا لپاره دوام وکړي.
سره له دې، نړيوالې مرستندويه ادارې په افغانستان کې د مرستو پر وېش د طالبانو حکومت د لاسوهنې په اړه لا هم اندېښنې لري.
د طالبانو حکومت د بهرنیو چارو وزارت وایي، هغه راپورونه ناسم دي چې ګواکې «اسلامي امارت» د بهر مېشتو دوهتابعیته افغانانو لپاره د افغانستان ویزه اخیستل لازمي کړي دي.
د وزارت ویاند حافظ ضیاء احمد تکل وايي، حکومت هېڅ نوې پرېکړه نه ده کړې او دا ډول خبرونه د حقیقت سره اړخ نه لګوي.
تکل وایي، هغه افغانان چې غواړي د بهرني پاسپورت په وسیله افغانستان ته سفر وکړي، د خپل افغاني هویت په ثابتولو سره د ویزې اخیستلو اړ نه دي او کولای شي د معمول په څېر له ویزې پرته هېواد ته ستانه شي.
د طالبانو حکومت د صنعت او سوداګرۍ وزیر نورالدین عزیزي وایي چې له ایران سره یې د چابهار بندر د لګښتونو د راکمولو په اړه خبرې روانې دي.
عزیزي وايي، که څه هم د چابهار لاره به د تل لپاره فعاله ساتي؛ خو هلته بیې د کراچۍ بندر په پرتله لوړې دي او همدا موضوع د دواړو لوریو ترمنځ د بحث اصلي ټکی دی.
نوموړي د افغانستان ملي راډیو ټلوېزیون سره په مرکه کې ویلي چې د ایران له لارې سوداګریز تګ راتګ پراخوي او د بار وړونکو لاریو شمېر له ۱۰۰ څخه نږدې ۲زرو ته لوړوي.
د هغه په خبره، «اسلامي امارت» څو ځله د ایران اړوندو بندرونو ته سفرونه کړي او د لګښتونو د کمولو په موخه یې له ایراني وزیرانو سره مذاکرات کړي دي.
تهران اعلان کړی چې راتلونکې اونۍ به د افغانستان په اړه د سیمهییزو هېوادونو مهمه ناسته ترسره کړي، چې موخه یې د وروستیو جیوپولیټیکو ترینګلتیاوو په منځ کې د سیمې د ثبات لپاره ګډ دریځ رامنځته کول دي.
د ایران د بهرنیو چارو وزارت ویاند، اسماعیل بقایي، ویلي چې تهران په وروستیو کې د کابل او اسلاماباد له چارواکو سره ګڼ پړاویزې دیپلوماټیکې ناستې کړي او هڅه کوي د تاوتریخوالي د زیاتېدو مخه ونیسي.
هغه ټینګار کړی، چې ایران په سیمه کې د «عملي تفاهم» جوړېدو ته لومړیتوب ورکوي او غواړي د افغانستان لپاره د ګډو هڅو بهیر لا پیاوړی شي.
د معلوماتو له مخې، دغه غونډه به د پاکستان، تاجکستان، ازبکستان، ترکمنستان، چین او روسیې د ځانګړو استازو په ګډون په تهران کې ترسره شي.