رویټرز خبري آژانس خبر ورکړی چې یو ایرانی لوړپوړی پلاوی د قطر له لومړي وزیر سره د امریکا د احتمالي هوکړې او ځینو مهمو مسایلو په اړه د خبرو لپاره دوحې ته تللی.

د خبر له مخې، په دې پلاوي کې د ایران د پارلمان رئیس محمد باقر قالیباف او د بهرنیو چارو وزیر عباس عراقچي شامل دی.

ویل کیږي، د دې خبرو تمرکز به د هرمز تنګي وضعیت، د ایران د لوړو غني شویو یورانیمو زېرمو او د کنګل شوو شتمنیو د خوشې کېدو پر موضوع وي.

سرچینې زیاتوي چې د ایران د مرکزي بانک مشر هم په دې پلاوي کې ګډون لري، څو د هغو پیسو په اړه خبرې وکړي چې د احتمالي وروستۍ هوکړې برخه ګڼل کېږي.

دا خبرې د امریکا او ایران ترمنځ د تاوتریخوالي د کمولو او د یوې سیاسي حل لارې د موندلو لپاره مهم ګام بلل کېږي.

د طالبانو د حکومت د ګمرکونو لوی ریاست وایي، په تېرو دوو اوونیو کې یې د ننګرهار، کندهار، هلمند او نیمروز ولایتونو په بېلابېلو سیمو کې لسګونه زره قاچاقي توکي نیولي دي.

د دغه ریاست په وینا، یاد توکي له ګمرکي محصول پرته افغانستان ته راوړل کېدل او په غیرقانوني ډول هېواد ته داخل شوي وو.

د معلوماتو له مخې، په نیول شویو توکو کې څه باندې ۲۲ زره انساني طبي درمل هم شامل دي چې له پاکستانه افغانستان ته قاچاق شوي وو.

دا په داسې حال کې ده چې د تېر کال له اکټوبر میاشتې راهیسې د افغانستان او پاکستان ترمنځ ځمکنۍ سوداګري او راکړه ورکړه بنده شوې ده.

راپورونه ښيي، د افغانستان بازارونه، چې تر ډېره پر پاکستاني تولیداتو تکیه لري، اوس د ګڼو اړتیا وړ توکو له کمښت او بحران سره مخ دي.

سره له دې، د ځمکنۍ سوداګرۍ له بندېدو وروسته هم وخت ناوخت له پاکستانه په پټه او غیرقانوني ډول توکي افغانستان ته راوړل کېږي.

ایراني رسنیو راپور ورکړی چې دغه هېواد به ډېر زر بېرته د انټرنېټ له نړیوالې شبکې سره وصل شي.

د ایراني رسنیو د راپورونو له مخې، د انټرنېټ او مجازي چارو د همغږۍ ادارې په څلورمه غونډه کې د نړیوال انټرنېټ د بېرته نښلېدو پرېکړه تصویب شوې ده چې د تایید لپاره ولسمشر مسعود پزشکیان ته لېږل شوې.

د ایران حکومت د ۲۰۲۶ کال له پیل راهیسې په دغه هېواد کې د لاریونونو، امنیتي وضعیت او د امریکا او اسرائیل له بریدونو وروسته پر انټرنېټ پراخ محدودیتونه لګولي.

د ایران حکومت په دې کار سره غوښتل د اعتراضونو، جګړې او امنیتي پېښو اړوند معلومات او ویډیوګانې محدودې کړي او د خلکو اړیکې له نړۍ سره کمزورې کړي.

د راپورونو له مخې، حکومت ځینو دولتي ادارو او ځانګړو کسانو ته محدود انټرنېټ پرې ایښی و، خو عام خلک لا هم له سختو محدودیتونو سره مخ دي.

اقتصادي راپورونه ښيي چې د انټرنېټ دغو بندیزونو د ایران اقتصاد ته میلیاردونه ډالره زیان اړولی او د انلاین سوداګرۍ کچه په کې په پراخه توګه راکمه شوې ده.

د المپیک، بدني روزنې او ورزش عمومي ریاست اړوند د سوک وهنې ملي فدراسیون له لوري د کابل ولایت د سوک وهنې ټاکنیزې سیالۍ د ۶۰۰ ورزشکارانو په ګډون په بریالیتوب سره پای ته ورسېدې.

په دغو سیالیو کې له دوو اوونیو سیالیو وروسته ۲۶ غوره ورزشکاران د کابل ولایت د سوک وهنې ټاکنیزې لوبډلې ته غوره شول.

یادې سیالۍ د دې لپاره ترسره شوې وې چې د کابل ولایت لپاره تر ټولو وړ او استعداد لرونکي سوک وهونکي وپېژندل شي او راتلونکو ملي سیالیو ته چمتو شي.

د افغانستان کرکټ ملي لوبډلې مخکښ ټولچاري لوبغاړي د هند غوره لیګ د ګروپي پړاو له پای ته رسېدو وروسته له خپلې اړوند پنجاب کېنګر لوبډلې او مینه‌والو مننه کړې ده.

عظمت‌الله عمرزي په خپله اېکس پاڼه لیکلي، له پنجاب کنګز سره یې یو «نه هېریدونکی فصل» درلود او د لوبډلې له ادارې، روزونکو، مرستندویه کارکوونکو، ملګرو لوبغاړو او مینه ‌والو یې ځانګړې مننه کړې ده.

هغه ویلي، د لوبډلې مینه‌ وال د ټول سفر پر مهال ورسره ولاړ وو او د دوی ملاتړ یې کاوه.

عظمت‌الله عمرزی د آی پي اېل ۲۰۲۶ فصل کې هم د پنجاب کېنګز لپاره په محدودو سیالیو کې ولوبېد او د لوبډلې په بریاوو کې یې مهم رول ادا کړ.

په ټوله کې عمرزي ته د پنجاب په درې لوبو کې چانس ورکړل شو چې د درې لوبو په دوه پاڼیو کې ۵۲ منډې وکړې او په درې پاڼیو کې یې درې وېکټې ترلاسه کړې.

د آی پي اېل په سږني پړاو کې د عظمت الله عمرزي او پنجاب کېنګز لوبډلې سفر پلی آف ته د راجستان رایلز لوبډلې په لارموندنې پای ته ورسېد.

د طالبانو د حکومت د کډوالو او راستنېدونکو چارو وزارت وایي، په تېرو درې ورځو کې ۳۷۳ افغان کډوال د پاکستان له زندانونو آزاد او هېواد ته راستانه شوي دي.

دغه وزارت نن (دوشنبه غبرګولي ۴مه) په خبرپاڼه کې ویلي چې له دې ډلې ۲۹۶ تنه د تورخم له فرضي کرښې او ۷۷ تنه د سپین بولدک له لارې افغانستان ته راغلي دي.

په خبرپاڼه کې راغلي چې یاد شمېر افغان کډوال د قانوني اسناد د نه درلودو له امله د پاکستان په بېلابېلو ښارونو کې نیول شوي او زنداني شوي وو.

وزارت زیاتوي، راستنو شویو کسانو ته بشري مرستې هم وېشل شوي او وروسته خپلو سیمو ته لېږدول شوي دي.

په دې وروستیو کې له پاکستانه د افغان کډوالو د راستنېدو بهیر چټک شوی دی.

د ايران د بهرنيو چارو وزارت وياند اسماعيل بقايي ویلي، د ایران د بهرنیو چارو وزیر عباس عراقچي به د ویزې د ستونزې له امله د ملګرو ملتونو د امنیت شورا په غونډه کې د ګډون لپاره نیویارک ته سفر ونه کړي.

هغه ویلي، اوسنی تمرکز د جګړې پر پای ته رسولو دی او د اټومي پروګرام پر جزییاتو لا خبرې نه دي پیل شوې.

د نوموړي په وینا، په احتمالي تفاهم کې به په لبنان او نورو جبهاتو کې د جګړې درول هم شامل وي.

بقایي امریکا تورنه کړې چې په سیمه کې یوازې د اسرائیل ګټو ته ارزښت ورکوي او د لوېدیځې اسیا د هېوادونو امنیت او ثبات ته پام نه کوي.

بقایي همداراز ویلي، ایران د هرمز تنګي څخه د عوارضو اخیستو نیت نه لري؛ خو د امنیت په بدل کې لګښت اخیستل کېدای شي.

هغه زیاته کړې چې تهران له پاکستان سره په ګډه د هرمز تنګي د خوندي تګ راتګ لپاره پر یوې طرحې کار کوي.

بل لور ته، د امریکا د بهرنیو چارو وزیر مارکو روبیو ویلي، له ایران سره احتمالي هوکړه لا هم تر کار لاندې ده.

استرالیا د یو ورځنیو لوبو د ترسره کولو لپاره پاکستان ته سفر کوي، خو په دې لوبډله کې د دوی درې مهم چټک توپ اچوونکي پیټ کمنز، مچل سټارک او جوش هیزلووډ شامل نه دي.

دا درې یو ورځنۍ لوبې به د مې په ۳۰مه په پاکستان کې پیل شي او د جون تر ۴مې نیټې پورې به دوام وکړي.

د استرالیا د لوبډلې مشر روزونکي ویلي، چې د دغو مهمو توپ اچوونکو نشتون د دې لپاره دی چې هغوی ته ځانګړې پاملرنه او فزیکي ساتنه یې وشي، څو د ۲۰۲۷ نړیوال جام لپاره په بشپړې روغتیا سره چمتو پاتې شي او د ټپ یا ستړیا له امله د لوبډلې لپاره ستونزه رامنځته نه کړي.

محمد باقر قاليباف د ایران د پارلمان د غړو د اکثريت رایو په ترلاسه کولو سره د اووم پرله‌پسې کال لپاره د اسلامي شورا د مجلس د رییس په توګه وټاکل شو.

قالیباف د ایران له مهمو سیاسي څېرو ګڼل کېږي او د تهران او واشنګټن ترمنځ د روانو خبرو او کړکېچونو پر مهال هم د اغېزناکو چارواکو له ډلې شمېرل کېږي.

هغه تر دې وړاندې د تهران ښاروال، د سپاه پاسداران قومندان او د ولسمشرۍ ټاکنو نوماند هم پاتې شوی دی.

د ایران د بهرنیو چارو وزارت وياند اسماعيل بقايي ویلي، هېڅوک دا ادعا نه شي کولی چې ایران او امریکا هوکړې ته نږدې شوي دي، ځکه د امریکايي چارواکو پرله‌پسې بدلېدونکي دریځونه د خبرو اترو بهیر له ستونزو سره مخ کوي.

هغه زیاته کړې، ایران دا مهال د مذاکراتو پر بهیر تمرکز لري او دا چې احتمالي هوکړه به وروسته څنګه اعلان یا لاسلیک شي، هغه موضوع ده چې د پرېکړې لپاره یې وخت شته.

بقایي همداراز ویلي، که اړتیا پېښه شي د پلاوو سفرونه تهران ته یا متقابل سفرونه ممکن ترسره شي؛ خو اوس‌مهال پاکستان ته د ایراني پلاوي د سفر یا ایران ته د پاکستاني پلاوي د ورتګ کوم پلان نه شته.