د طالبانو د حکومت د ګمرکونو لوی ریاست وایي، په تېرو دوو اوونیو کې یې د ننګرهار، کندهار، هلمند او نیمروز ولایتونو په بېلابېلو سیمو کې لسګونه زره قاچاقي توکي نیولي دي.
د دغه ریاست په وینا، یاد توکي له ګمرکي محصول پرته افغانستان ته راوړل کېدل او په غیرقانوني ډول هېواد ته داخل شوي وو.
د معلوماتو له مخې، په نیول شویو توکو کې څه باندې ۲۲ زره انساني طبي درمل هم شامل دي چې له پاکستانه افغانستان ته قاچاق شوي وو.
دا په داسې حال کې ده چې د تېر کال له اکټوبر میاشتې راهیسې د افغانستان او پاکستان ترمنځ ځمکنۍ سوداګري او راکړه ورکړه بنده شوې ده.
راپورونه ښيي، د افغانستان بازارونه، چې تر ډېره پر پاکستاني تولیداتو تکیه لري، اوس د ګڼو اړتیا وړ توکو له کمښت او بحران سره مخ دي.
سره له دې، د ځمکنۍ سوداګرۍ له بندېدو وروسته هم وخت ناوخت له پاکستانه په پټه او غیرقانوني ډول توکي افغانستان ته راوړل کېږي.
