د چین د بهرنیو چارو وزارت، هغه راپورونو په کلکه رد کړل چې ګواکې دغه هېواد ایران ته د هوايي دفاع سیستمونه ورکوي، او دا ادعاوې یې بې‌اساسه وبللې.

د چین لخوا دا غبرګون وروسته له هغه ورکړل شو چې سي اېن اېن، د امریکايي استخباراتي معلوماتو پر بنسټ راپور خپور کړ او پکې یې ادعا کړې وه چې چین ښايي ډېر ژر ایران ته نوې دفاعي وسایل وسپاري.

د چین ویاند ټینګار وکړ چې هېواد یې د وسلو صادراتو په برخه کې له نړیوالو اصولو سره سم مسؤلانه چلند کوي او د هر ډول پوځي لېږد لپاره سخت قوانین لري.

نوموړي دغه راپورونه «سیاسي او مغرضانه» وبلل او زیاته یې کړه چې بیجینګ به د داسې تورونو پر وړاندې خپل دریځ وساتي.

د بلوچستان په بېلابېلو سیمو کې په جلا جلا پېښو کې لږ تر لږه پنځه کسان وژل شوي او یو بل ټپي شوی دی.

د پولیسو په وینا، د ډېره بګټي ولسوالۍ د پیرکوه په سیمه کې ناپېژاندو وسله‌والو د یوه ځايي قبايلي مشر پر کور برید کړی چې له امله یې نوموړی وژل شوی دی.

په همدې ولسوالۍ کې د سوي په سیمه کې په یوه بله پېښه کې وسله‌والو پر یو کس ډزې کړې چې په پایله کې یې یو ایسکریم پلورونکي خپل ژوند له لاسه ورکړی دی.

بل لور ته د ډېره مراد جمالي ولسوالۍ پولیس وايي، د غلو په ډزو کې یو ځايي کس وژل شوی او د ډزو په تبادله کې یو بل ټپي شوی دی.

همداراز د جهل مګسي ولسوالۍ کې هم ناپېژاندو وسله‌والو یو کس په ډزو وژلی دی.

په یوه بله پېښه کې چې د نصيراباد ولسوالۍ اړوند فلیجي سیمه کې شوې، د دېوال د نړېدو له امله یو کس مړ شوی دی.

د اسوشیټډ پرېس د راپور له مخې، امریکا او ایران د خبرو د دوهم پړاو د ترسره کېدو لپاره هوکړې ته نږدې شوي او امکان شته چې دا ناسته د پنجشنبې په ورځ ترسره شي.

راپور چې د څلورو باخبره سرچینو پر بنسټ خپور شوی، وايي دواړه لوري هڅه کوي چې د اوربند تر پای مخکې یوې موافقې ته ورسېږي، او همدا اوس د دوهم پړاو د تنظیم لپاره بحثونه روان دي.

د راپور له مخې، منځګړي لا هم هڅه کوي چې دا خبرې ژر تر ژره ترسره شي، که څه هم تر اوسه د ناستې دقیق وخت او ځای په بشپړه توګه نه دی ټاکل شوی، خو اټکل کېږي چې دا خبرې به په اسلام‌آباد کې ترسره شي.

له دې وړاندې د امریکا ولسمشر ډونالډ ټرمپ ویلي و چې ایران د یوې موافقې غوښتونکی دی.

بل لور ته د ایران ولسمشر مسعود پزشکیان هم ویلي چې د خبرو بهیر نه دی درېدلی او لا هم دوام لري.

د امریکا او ایران ترمنځ د خبرو لومړی پړاو د شنبې په ورځ په اسلام‌آباد کې بې له کومې پایلې پای ته رسېدلی و.

د اسوشیټډ پرېس د راپور له مخې، امریکا او ایران د خبرو د دوهم پړاو د ترسره کېدو لپاره هوکړې ته نږدې شوي او امکان شته چې دا ناسته د پنجشنبې په ورځ ترسره شي.

راپور چې د څلورو باخبره سرچینو پر بنسټ خپور شوی، وايي دواړه لوري هڅه کوي چې د اوربند تر پای مخکې یوې موافقې ته ورسېږي، او همدا اوس د دوهم پړاو د تنظیم لپاره بحثونه روان دي.

د راپور له مخې، منځګړي لا هم هڅه کوي چې دا خبرې ژر تر ژره ترسره شي، که څه هم تر اوسه د ناستې دقیق وخت او ځای په بشپړه توګه نه دی ټاکل شوی، خو اټکل کېږي چې دا خبرې به په اسلام‌آباد کې ترسره شي.

له دې وړاندې د امریکا ولسمشر ډونالډ ټرمپ ویلي و چې ایران د یوې موافقې غوښتونکی دی.

بل لور ته د ایران ولسمشر مسعود پزشکیان هم ویلي چې د خبرو بهیر نه دی درېدلی او لا هم دوام لري.

د امریکا او ایران ترمنځ د خبرو لومړی پړاو د شنبې په ورځ په اسلام‌آباد کې بې له کومې پایلې پای ته رسېدلی و.

د شمالي کوریا دولتي خبري اژانس KCNA راپور ورکړی چې دغه هېواد د خپل ناوشکن چایه‌یون پر سر د ستراتیژیکو کروز توغندیو او د کښتیو ضد توغندیو ازموینه ترسره کړې ده.

د راپور له مخې، دا ازموینه د ناوشکن د عملیاتي وړتیا د ارزونې لپاره شوې چې پکې دوه کروز توغندي او درې د کښتیو ضد توغندي توغول شوي دي.

موخه دا وه چې د هدایت سیسټم، دقت او د عملې د توغولو وړتیا وازمویل شي.

په دې ازموینو کې د شمالي کوریا مشر کیم جونګ اون او د لوړ پوړو پوځي چارواکو حضور هم یاد شوی دی.

کارپوهان وایي چې د شمالي کوریا دا اقدام د سمندري ځواک د پراختیا هڅې ښيي او دا هېواد د نړیوالو کړکېچونو سره هم مهاله خپل د وسلو پروګرام ته دوام ورکوي.

د ملګرو ملتونو امنیت شورا د بندیزونو کمېټې اعلان کړی چې د طالبانو حکومت د څو لوړپوړو چارواکو اړوند معلومات یې په خپل بندیزي نوملړ کې تازه کړي دي.

د معلوماتو له مخې، په دې نوې تازه‌کولو کې د طالبانو حکومت د رییس‌الوزرا محمد حسن اخند، د هغه د مرستیال عبدالغني برادر، د بهرنیو چارو وزیر امیرخان متقي او د کانونو وزیر هدایت‌الله بدري اړوند جزئیات اصلاح او زیات شوي دي.

یاد کسان له وړاندې هم د بندیزونو په نوملړ کې شامل وو، خو دا ځل د هغوی د هویت او رسمي اسنادو په برخه کې نوي بدلونونه راوستل شوي دي.

کمېټې تېر کال هم د طالبانو حکومت د لسګونو نورو چارواکو نوملړ تازه کړی و، چې پکې ګڼ لوړپوړي غړي شامل وو.

دغه بندیزونه د ملګرو ملتونو د پرېکړه‌لیک له مخې لګول شوي، چې له مخې یې یاد کسان یوازې د امنیت شورا په رسمي اجازه نورو هېوادونو ته سفر کولی شي.

سره له دې چې طالبانو حکومت څو ځله د بندیزونو د لرې کېدو غوښتنه کړې، خو نړیوالې اندېښنې لکه امنیتي وضعیت، د ښځو پر وړاندې محدودیتونه او د ټول‌ګډونه حکومت نشتوالی د دې لامل شوي چې دغه بندیزونه لا هم پر خپل ځای پاتې شي.

د امریکا د ولسمشر مرستیال جی‌ډي ونس د فاکس نیوز سره په مرکه کې ویلي چې په اسلام‌اباد کې د ایران له پلاوي سره ۲۱ ساعته خبرې ترسره شوې دي.

هغه ویلي چې واشنګټن خپلې سرې کرښې او د انعطاف وړ برخې په روښانه ډول بیان کړې دي او اوس «توپ د ایران په میدان کې دی».

ونس د ځینو پرمختګونو یادونه کړې، خو زیاته کړې چې دواړه لوري کومې وروستۍ هوکړې ته ونه رسېدل او امریکا د وروستي او غوره وړاندیز سره د خبرو مېز پرېښود.

هغه ټینګار کړی چې اصلي سره کرښه دا ده چې ایران باید هېڅکله اټومي وسلو ته لاسرسی ونه لري او دا موضوع باید د تایید وړ وي.

د هغه په وینا، امریکا غواړي چې د لوړ غلظت غني شوی یورانیم له ایران څخه بشپړ وایستل شي او د امریکا تر کنټرول لاندې راوستل شي، او همداراز داسې میکانیزم جوړ شي چې تهران د غني‌سازۍ وړتیا ونه لري.

ونس ویلي چې ایران په ځینو مواردو کې د امریکا دریځ ته نږدې شوی، خو تر اړتیا پورې نه دی وړاندې شوی.

نوموړي همداراز د هرمز تنګي بشپړه پرانیسته د امریکا له اساسي غوښتنو څخه بللې او زیاته کړې چې که دا شرط پوره نه شي، د خبرو بهیر به بدل شي.

هغه د پاکستان له لوري د دغو خبرو د کوربتوب مننه کړې او ویلي چې که شرطونه ومنل شي، د یوه لوی تړون د ترلاسه کولو امکان شته.

د امریکا ولسمشر ډونالډ ټرمپ په سپینه ماڼۍ کې ویلي چې ایران به هېڅکله اټومي وسلې ترلاسه نه کړي، او که دا شرط ونه مني، نو هېڅ ډول تړون به هم ونه شي.

هغه د هرمز تنګي په اړه ویلي چې امریکا به اجازه ورنه کړي چې یو هېواد نړۍ ته ګواښ وکړي یا ترې باج واخلي، او زیاته کړې چې ایران همدا کار کوي او امریکا به یې مخه ونیسي.

ټرمپ زیاته کړې چې د دوشنبې په سهار «سمو کسانو» له تهران څخه ورسره اړیکه نیولې او غواړي چې یوې موافقې ته ورسېږي.

هغه دغه راز ویلي چې ایران د تړون د ترلاسه کولو لېوالتیا لري.

ټرمي د جی‌ډي ونس او د امریکا د مذاکراتي ټیم ملاتړ هم کړی او ویلي چې ونس، سټیو او جرد خپل کار ډېر ښه ترسره کړی دی.

د امریکا ولسمشر یو ځل بیا ټینګار کړی چې امریکا به هېڅ داسې تړون ونه مني چې ایران ته د اټومي وسلو د ترلاسه کولو اجازه ورکړي.

هغه په پای کې ویلي چې د ایران د جنوبي بندرونو سمندري محاصره پیل شوې ده.

د بریتانیا لومړي وزیر کی‌یر استارمر ویلي چې ټول هغه مشران چې ورسره یې خبرې کړې، په دې سلا شوي چې د هرمز تنګی باید د کښتۍ چلونې لپاره له محدودیت، فیس یا د ایران له لوري د باج اخیستنې پرته پرانیستی پاتې شي.

استارمر زیاته کړې چې دیپلوماسي د منځني ختیځ د جګړې د پای ته رسولو یوازینۍ لار ده او ټینګار یې کړی چې بریتانیا به د فشار له امله جګړې ته داخل نه شي.

هغه ویلي چې نړیواله ټولنه باید د تاوتریخوالي د زیاتېدو مخه ونیسي او د خبرو اترو له لارې د کړکېچ حل ته دوام ورکړي.

د امریکا ولسمشر ډونالډ ټرمپ د ایران د جنوبي بندرونو او سواحلو د سمندري محاصرې له پیل سره سم خبرداری ورکړی چې د ایران هر ډول برید کوونکې چټکې کښتۍ که د امریکا محاصرې ته نږدې شي، سمدستي به له منځه یووړل شي.

ټرمپ د امریکا دغه عملیات چټک او بې‌رحمانه بللي او ویلي چې امریکا به په سمندر کې د مخدره توکو د قاچاق پر ضد کارېدونکی هماغه وژونکی سیستم وکاروي.

هغه همداراز ادعا کړې چې د ایران سمندري ځواک په بشپړه توګه له منځه تللی او ویلي یې دي: «د ایران سمندري ځواک اوس د سمندر په تل کې دی؛ ۱۵۸ کښتۍ.»

ټرمپ زیاته کړې چې امریکا یوازې یو محدود شمېر هغه کښتۍ نه دي په نښه کړي چې ایران یې تهاجمي چټکې کښتۍ بولي، ځکه چې دوی یې لوی ګواښ نه ګڼي.