د امریکا ولسمشر ډونالډ ټرمپ اعلان کړی چې له ایران سره د جګړې د پای ته رسولو لپاره مهمې خبرې ښايي په راتلونکو دوو ورځو کې په پاکستان کې بیا پیل شي.
ټرمپ له «نیویارک پوسټ» سره په مرکه کې وویل، واشنګټن چمتو دی چې یو ځل بیا پاکستان ته د خبرو لپاره ولاړ شي، او ټینګار یې وکړ چې د پرمختګ نښې لیدل کېږي.
هغه د پاکستان د پوځ د مشر عاصم منیر، رول وستایه او ویې ویل چې نوموړي د خبرو د تنظیم او پرمخ بیولو لپاره «فوقالعاده هڅې» کړې دي.
د ایران د حکومت ویاندې فاطمه مهاجراني ویلي، چې پر دغه هېواد د امریکا او اسراییل د وروستیو بریدونو له امله اوښتي زیانونه، د لومړنیو ارزونو له مخې، شاوخوا ۲۷۰ میلیارده ډالره اټکل شوي دي.
مهاجراني له روسي خبري اژانس سره په خبرو کې ویلي، چې د جګړې د تاوان موضوع د ایران د مذاکراتي ټیم له مهمو لومړیتوبونو څخه ده او دا مسئله د اسلاماباد په خبرو کې هم تعقیب شوې ده.
هغې پرته له دې چې دقیق جزیات وړاندې کړي، وویل: «زیانونه عموماً په څو برخو کې ارزول کېږي، خو تر دې مهاله د امریکا او اسراییل د بریدونو له امله د ایران تاوان شاوخوا ۲۷۰ میلیارده ډالره اټکل شوی دی.»
د ایټالیا لومړۍ وزیرې جورجیا ملوني اعلان کړی چې هېواد یې له اسراییل سره د دفاعي همکارۍ تړون موقتي ځنډولی دی.
ملوني د ورونا ښار په یوه غونډه کې خبریالانو ته وویل، چې حکومت یې پرېکړه کړې چې د اسراییل سره د ۲۰۰۳ کال دفاعي تړون نور په اوتومات ډول تمدید نه کړي.
نوموړې زیاته کړه چې دا اقدام د «اوسني وضعیت» په پام کې نیولو سره ترسره شوی دی.
دغه تړون چې هر پنځه کاله وروسته په اوتومات ډول نوی کېده، د دواړو هېوادونو ترمنځ یې د پوځي تجهیزاتو تبادله او تخنیکي همکارۍ تنظیمولې.
همدا رنګه، تېره اوونۍ د اسراییل دفاعي ځواکونو د لبنان پلازمېنې بیروت ته نږدې د ایټالوي سوله ساتو پر کاروان د خبرداري ډزې وکړې؛که څه هم په پېښه کې چا ته زیان ونه رسېد، خو روم دا اقدام «په بشپړه توګه د منلو وړ نه» وباله.
له بلې خوا، د ایټالیا د بهرنیو چارو وزیر انتونیو تاجاني د یادې پېښې وروسته څو ځله د اسراییل سفیر ورغوښتی او د وضاحت غوښتنه یې کړې ده.
د امریکا د ولسمشر مرستیال جی ډي ونس ویلي، واشنګټن د منځني ختیځ د کړکېچ د پای ته رسولو لپاره په روانو خبرو کې خپلې اساسي غوښتنې ایران ته په واضح ډول وړاندې کړې دي.
نوموړي له فاکس نیوز سره په خبرو کې ټینګار وکړ چې که څه هم خبرې له ستونزو خالي نه وې، خو د پام وړ پرمختګ هم شوی دی.
هغه زیاته کړه چې اوس د ایران پرېکړه مهمه ده، او تمه کېږي چې تهران به د کړکېچ د کمولو لپاره عملي ګام پورته کړي.
د اسرائیل د بهرنیو چارو وزیر گیدئون سعار د چک جمهوریت د بهرنیو چارو له وزیر سره په ګډه خبري ناسته کې ویلي چې ایران د هغه څه مشري کوي چې نوموړي د شر محور بللی دی.
هغه زیاته کړه: «د نړۍ تر ټولو افراطي حکومت هڅه کوي چې تر ټولو خطرناکه وسله، یعنې اټومي وسله ترلاسه کړي.»
سعار وویل چې ایران د اسرائیل پر شاوخوا د خپلو نیابتي ډلو یوه کړۍ جوړه کړې، چې پکې حزبالله په لبنان کې، حماس په غزه کې او حوثیان په یمن کې شامل دي.
هغه همداراز ویلي چې کلونه کلونه نړیوالې ټولنې ایران ته اجازه ورکړې چې خپلې وړتیاوې لوړې کړي، په داسې حال کې چې د اټومي وسلو د ترلاسه کولو د مخنیوي هڅې روانې وې.
د اسرائیل د بهرنیو چارو وزیر ټینګار کړی چې دوی له هغو هڅو ملاتړ کوي چې هدف یې د ایران د اټومي وسلو د ترلاسه کولو مخنیوی دی، او ویلي چې دا کار د دیپلوماتیکو لارو له لارې هم تعقیبېږي.
د طالبانو حکومت ویاند ذبیحالله مجاهد د ملګرو ملتونو امنیت شورا له لوري د بندیزونو د نوملړ د تازه کېدو په اړه غبرګون ښودلی او ویلي یې دي چې دا ډول بندیزونه له پیله بېګټې دي.
مجاهد ټینګار کړی چې د بندیزونو لګول نه یوازې اغېزناک نه دي، بلکې د ده په وینا دا یو ډول ظلم دی چې د افغانانو پر ژوند منفي اغېز کوي.
هغه زیاته کړې چې کله د یوه ارګان مشران تر بندیزونو لاندې وي، نو د هماغه ارګان چارې اغېزمنېږي او په پایله کې عام خلک هم زیان ویني.
نوموړي ویلي چې دوی غواړي د تفاهم او تعامل لپاره زمینه برابره شي او نړیوال بنسټونه باید د افغانستان او نړۍ ترمنځ د اړیکو د پیاوړتیا لپاره کار وکړي، نه دا چې د سیاسي فشار وسیله وګرځي.
د امریکا د انرژۍ وزیر کریس رایټ خبرداری ورکړی، چې د هرمز تنګي د تګ راتګ محدودیتونه به د نفتو بیې په راتلونکو اونیو کې اوج ته ورسوي.
نوموړي ویلي، تر هغو چې سمندري تګ راتګ عادي نه شي، د انرژۍ بازار به د فشار لاندې پاتې وي.
همداراز، ولسمشر ډونالډ ټرمپ ټینګار کړی چې د نفتو او پټرولو لوړې بیې ښايي میاشتې دوام وکړي، خو په ورته وخت کې د وینزویلا د تولید زیاتوالی د بازار په توازن کې یو مهم فکتور بلل کېږي.
د هند حکومت د افغانستان د ماشومانو د معافیت پروګرام د پیاوړتیا لپاره د نري رنځ (TB) پر وړاندې ۱۳ ټنه BCG واکسینونه او اړوند وچ طبي مواد د عامې روغتیا وزارت ته وسپارل.
د هند د بهرنیو چارو وزارت ویاند رندهیر جیسوال ویلي، دا مرسته د افغانستان له خلکو سره د دوامدارې بشري همکارۍ یوه برخه ده او موخه یې د ماشومانو د ژوند ژغورل او د ساري ناروغیو مخنیوی دی.
د روسیې د بهرنیو چارو وزیر سرګي لاوروف چین ته د خپل دوه ورځني رسمي سفر په ترڅ کې پکن ته رسېدلی، څو د چین له چارواکو سره د دوه اړخیزو اړیکو او نړیوالو مسایلو په اړه مهمې خبرې وکړي.
د چین د بهرنیو چارو له وزیر وانگ یی سره د لاوروف د لیدنې اصلي تمرکز د دواړو هېوادونو ترمنځ د سیاسي او اقتصادي همکارۍ پراخول، د نړیوالو کړکېچونو پر وړاندې ګډ دریځ او د سیمهییزو بدلونونو ارزونه بلل شوې ده.
سرچینې وايي، دواړه لوري هڅه کوي د اوسنيو نړیوالو فشارونو په وړاندې خپلې اړیکې لا پیاوړې کړي او د راتلونکو دیپلوماتیکو اړیکو لپاره نوې لارې چارې وڅېړي.
په راپورونو کې همداراز ویل شوي چې د لوړې کچې راتلونکو سفرونو او تماسونو په اړه خبرې، په ځانګړي ډول د ولادیمیر پوتین د احتمالي سفر موضوع، د دې لیدنو له مهمو اجنډاوو څخه ده.
د چین ولسمشر شيجینپینګ د خلیج او منځني ختیځ د هېوادونو د ملي حاکمیت پر درناوي ټینګار کړی او اعلان یې کړی چې هېواد به یې د سیمې د سولې په هڅو کې فعاله ونډه واخلي.
نوموړي دا څرګندونې د ابوظبۍ له ولیعهد شیخ خالد بن محمد آل نهیان سره په لیدنه کې وکړې.
د چین ولسمشر خبرداری ورکړ چې د خلیج د هېوادونو امنیت او ځمکنۍ بشپړتیا باید جدي وساتل شي او ویې ویل، نړیوال نظم چې د ملګري ملتونو پر بنسټ ولاړ دی، باید خوندي پاتې شي.