د اورشلیم‌پست د راپور له مخې، د روسیې استخباراتي ادارې ایران ته د اسراییلو د انرژۍ د ۵۵ مهمو بنسټیزو تاسیساتو دقیق معلومات ورکړي دي.

د راپور له مخې، روسیه ویلي چې حتی د برق شبکې څو محدود خو کلیدي برخو هدف کول کولی شي د اسراییلو د انرژۍ سیستم په بشپړ ډول او اوږدمهاله توګه ګډوډ کړي، ځکه چې اسراییل د انرژۍ په برخه کې په زیاتره اروپايي هیوادونو کې واردات لري او شبکه یې جلا او ځان بسیاینې ده.

اهداف په درې کچو وېشل شوي:
د برق د تولید حیاتي تاسیسات چې تخریب یې د ملي انرژۍ سیستم فلج کولی شي.
د ښارونو او صنعتي مرکزونو مهم تاسیسات.
د سیمه‌ییز بریښنا پوستونه.

بل لورته د اوکراین ولسمشر ولادیمیر زلنسکي ویلي چې روسیه مخکې له دې چې د سپاه ځواک ایران په عربستان کې د پرینس سلطان په مرکز برید وکړي، د مصنوعي سپوږمکۍ عکسونو له لارې معلومات ایران ته ورکړي دي.

الجزیرې د یوې امریکایي رسنۍ د معلوماتو پر اساس راپور ورکړی چې د امریکا ولسمشر ډونالډ ټرمپ ښايي د ایران سره د یوې هوکړې د رامنځته کېدو د رښتینو نښو په لیدو سره، هغه پوځي عملیات وځنډوي چې ټاکل شوې د سې‌شنبې په ورځ د ایران د بنسټیزو تاسیساتو پر ضد پیل شي.

د راپور له مخې، ټرمپ په یوې خبري غونډه کې ایران ته خبرداری ورکړی چې تر سې‌شنبې پورې باید یوې هوکړې ته ورسېږي، که نه له جدي پایلو سره به مخ شي.

هغه زیاته کړې چې په یوه شپه کې ټول هېواد ویجاړېدای شي، او دا شپه ښايي د سې‌شنبې شپه وي.

پولیټیکو امریکایي رسنۍ وایي، د امریکا د دفاع وزارت د ایران پر ضد د احتمالي پوځي اهدافو لېست پراخوي، څو د انرژۍ هغه تاسیسات هم پکې شامل کړي چې دوه‌ګونی ماهیت لري، یعنې هم ملکي او هم پوځي کارونې لري.

راپور زیاتوي، ځینې دفاعي چارواکي باور لري چې دا ډول طبقه‌بندي کولی شي پر بنسټیزو تاسیساتو برید له حقوقي پلوه د مشروع هدف په توګه توجیه کړي، خو په دفاع وزارت کې دننه د پوځي او ملکي اهدافو ترمنځ د کرښې او د دې استدلال د اعتبار په اړه د نظر اختلاف شته.

سپینې ماڼۍ ویلي چې د پوځي انتخابونو برابرول د دفاع وزارت دنده ده، خو وروستۍ پرېکړه به د ولسمشر له خوا وشي.

ولسمشر ټرمپ خبرداری ورکړی چې که کومه هوکړه ونه شي، ایران به د ډبرو زمانې ته ستون کړي.

حقوقي کارپوهان ټینګار کوي چې د نړیوالو قوانینو له مخې، پر دوه‌ګوني اهدافو برید یوازې هغه وخت جواز لري چې د تناسب اصل مراعات شي او د ملکي وګړو زیان تر ممکنه حده کم وساتل شي.

د راپور له مخې، په دې وروستیو کې د دفاع وزارت هغه برخې چې د ملکي تلفاتو د کمولو څارنه کوي، کمزورې شوې دي، چې دې موضوع اندېښنې راپارولي دي.

د امریکا د فضايي ادارې ناسا ویلي، چې د ارتمېس ۲ ماموریت ستورمزلو د سپوږمۍ شاوخوا بریالۍ څرخېدنه بشپړه کړې ده.

د راپورونو له مخې، د دې ماموریت هدف سپوږمۍ ته نږدې څرخېدل او علمي څېړنې وې، نه دا چې پر سطحه یې ښکته شي.

ارتمېس ۲ د خپل سفر پر مهال د اپولو ۱۳ ۵۰ کلن ریکارډ مات کړ او د ځمکې تر ټولو لېرې انساني سفر یې ترسره کړ.

دا ماموریت شاوخوا ۴۰۶,۷۷۱ کیلومتره واټن ته ورسېد، چې د پخواني ریکارډ څخه نږدې ۶,۶۰۰ کیلومتره زیات دی.

د سفر پر مهال ستورمزلو د لمر بشپړ تندر (کسوف) له نږدې وکوت او همدارنګه یې عطارد، زهره، مریخ او زحل سیارې مشاهده کړې.

هغوی د سپوږمۍ پټه خوا هم ولیده او د اپولو ۱۲ او اپولو ۱۴ د ناستې ځایونه یې هم تشخیص کړل.

دا ماموریت د راتلونکو فضايي سفرونو لپاره مهم ګام بلل کېږي، چې هدف یې په نږدې کلونو کې د سپوږمۍ جنوبي قطب ته د انسان لېږل دي.

د ایرنا د راپور له مخې، ایران د جګړې د پای ته رسولو لپاره د امریکا وړاندیز په رسمي ډول رد کړی او خپل بدیل دریځ یې د پاکستان له لارې وړاندې کړی دی.

د راپور پر بنسټ، د ایران ځواب چې په ۱۰ مادو کې ترتیب شوی، اوربند نه مني او پر دې ټینګار کوي چې جګړه باید د ایران د شرایطو او ملاحظاتو په رڼا کې په بشپړه توګه پای ته ورسېږي.

سرچینې وايي، تهران په خپل وړاندیز کې د سیمې د ټولو شخړو پای، د هرمز تنګي د خوندي تګ راتګ لپاره ځانګړی میکانېزم، د جګړې له امله د زیانمنو سیمو بیا رغونه او د نړیوالو بندیزونو لرې کول اساسي شرطونه ګرځولي دي.

د سپینې ماڼۍ یو چارواکي د اسکای نیوز عربي ځانګې ته ویلي چې ډونالډ ټرمپ د منځګړو له لوري د ایران سره د ۴۵ ورځني اوربند وړاندیز نه دی منلی.

تر دې وړاندې هم د سپینې ماڼۍ یوه لوړپوړي چارواکي یوې بلې امریکايي رسنۍ ته ویلي وو چې د ۴۵ ورځني اوربند طرحه یوازې د هغو انتخابونو له ډلې یوه ده چې د روانو خبرو اترو پر مهال تر بحث لاندې ده.

د سرچینو په وینا، د ایران او امریکا ترمنځ لا هم د کړکېچ د کمولو لپاره بېلابېل انتخابونه ارزول کېږي؛ خو تر اوسه کومه وروستۍ هوکړه نه ده شوې.

د جمعیت علماء اسلام ګوند مشر مولانا فضل الرحمان په پېښور کې د یوې خبري غونډې پر مهال د پاکستان پر اوسني حکومت او پوځي جوړښت سختې نیوکې کړې دي.

نوموړي ویلي چې اوسني واکمنان د ولس استازي نه دي، بلکې د “اسټیبلشمنټ” له لوري رامنځته شوي او د امریکا تر اغېز لاندې پرېکړې کوي.

هغه تور پورې کړی چې حکومت د هېواد د ملي ګټو پر ځای د بهرنیو غوښتنو ته لومړیتوب ورکوي.

فضل الرحمان دا هم ویلي چې څو ځله یې د پارلمان د پټو غونډو غوښتنه کړې، څو استازي د مهمو پالیسیو په اړه معلومات ترلاسه کړي، خو حکومت یې غوښتنه نه ده منلې.

د هغه په وینا، دا چاره ښيي چې حکومت خپل مشروعیت له لاسه ورکړی دی.

هغه پر دې هم اندېښنه ښودلې چې د پاکستان ختیځې او لوېدیځې پولې تړل شوې دي، چې له امله یې د سوداګرۍ بهیر اغېزمن شوی.

هغه له افغانستان سره د سوداګرۍ د فرصتونو یادونه کړې او ویلي چې د پولو تړل د پاکستان اقتصاد ته زیان رسوي.

نوموړي اعلان کړی چې د اپرېل په ۱۲مه به له مردان څخه د حکومت پر ضد یو پراخ تحرک پیل کړي او زیاته کړې چې د هېواد د وضعیت د بدلون لپاره ولسي لاریونونه یوازینۍ لاره پاتې ده.

د ایران د بهرنیو چارو وزیر عباس عراقچي د فرانسوي سیال سره په ټیلیفوني خبرو کې د امریکا د وروستیو ګواښونو په اړه سخت غبرګون ښودلی دی.

عراقچي ویلي، هغه ګواښونه چې د امریکا له لوري د ایران پر زیربناوو د بریدونو په تړاو مطرح شوي، د جګړې د جرم او نسل‌وژنې عادي کول دي.

نوموړي ټینګار کړی، که دا ګواښونه عملي شي، نو ایران به قاطع او سخت ځواب ورکړي.

وړاندې د امریکا ولسمشر ډونالډ ټرمپ ویلي و، که ایران تر دوشنبې هوکړه ونکړي پر پلونو او زیربناوو د بریدونو سربیره به یې پر یورانیو د تسلط هڅه هم وکړو.

د ایران د بهرنیو چارو وزارت ویاند اسماعیل بقایی، د امریکا د ۱۵ مادېیز وړاندیز د جګړې د پای لپاره غیرعادي او غیرمنطقي وبلل.

نوموړي وویل، تهران خپلې غوښتنې بشپړې کړي، خو د اعلان مناسب وخت به خپله ټاکي.

بقایی ټینګار وکړ چې ایران د هیڅ فشار او ضرب‌الاجل پرواګیر نه دی او د دې پلان ژر ځواب ورکول باید د تسلیمۍ په معنا ونه ګڼل شي.

هغه څرګنده کړه چې د منځګړیو له لارې خبرې د ضعف نښه نه ده او ایران چمتو دی هر وخت خپل موقف روښانه اعلان کړي.

د اوزبیکستان د بهرنیو چارو وزارت مرستیال بابر عثمانوف د طالبانو حکومت د بهرنیو چارو وزیر امیرخان متقي سره لیدنه کړې ده.

دا لیدنه د افغانستان او منځنۍ آسیا د مشورتي خبرو اترو د لومړۍ ناستې په څنډه کې ترسره شوې، چې دواړو لورو پکې د دوه اړخیزو اړیکو د پیاوړتیا، شته فرصتونو او د سیمې پر روان وضعیت خبرې او د نظر تبادله کړې ده.

په دې کتنه کې، امیرخان متقي د اوزبیکستان له پلاوي مننه کړې او ټینګار یې کړی چې د مشورتي ناستې پر مهال د وړاندې شوو نظریاتو او وړاندیزونو پر بنسټ باید راتلونکي ګامونه په ګډه همغږي شي.

هغه د دواړو هېوادونو ترمنځ د اړیکو پرمختګ مثبت بللی او د لا زیاتې همکارۍ غوښتنه یې کړې ده.

بل لور ته، بابر عثمانوف د دې سیمه‌ییز نوښت ملاتړ کړی او د کابل او تاشکند ترمنځ د وروستیو پرمختګونو یادونه کړې او ټینګار یې کړی چې دواړه هېوادونه باید خپلې اړیکې نورې هم پراخې کړي.