د طالبانو حکومت د بهرنیو چارو وزارت ویلي چې د افغانستان د لومړي ستورمزلي عبدالاحد مومند جسد به د هغه د کورنۍ پر غوښتنه سبا (دوشنبه د چنګاښ ۱۵مه) له جرمني څخه کابل ته راولېږدول شي.
وزارت په خپره شوې خبرپاڼه کې ویلي چې په همدې ورځ به د عبدالاحد مومند د جنازې لمونځ د کابل په عیدګاه جومات کې ادا شي.
د خبرپاڼې له مخې، په دې جنازه کې به د حکومتي چارواکو ترڅنګ د هغه د کورنۍ غړي، خپلوان، همکاران او ګڼ شمېر ښاریان هم ګډون وکړي.
وروسته له جنازې به د نوموړي مړی د کابل په تپه مرنجان هدیره کې خاورو ته وسپارل شي.
عبدالاحد مومند څو ورځې وړاندې په جرمني کې د ناروغۍ له امله وفات شوی و.
نوموړی د افغانستان لومړنی ستورمزلی و چې په فضا کې یې پښتو ژبه وویله او قرآن کریم یې هم له ځان سره فضا ته یووړ.
