د پاکستان د پوځ لوی درستیز عاصم منیر چې ایران ته تللی، نن یې د ایران د پارلمان له رئیس محمدباقر قالیباف سره لیدنه کړې.
له دې مخکې، د ایران یوه لوړپوړي چارواکي د رویټرز خبري اژانس ته ویلي وو چې د عاصم منیر تهران ته سفر ښايي له امریکا سره په ځینو برخو کې د اختلافاتو په کمېدو کې مرسته وکړي.
د پاکستان د بهرنیو چارو وزارت ویاند، طاهر اندرابي ویلي، چې هېواد یې د افغانستان له لوري د امنیتي او سیاسي ژمنو د عملي کېدو لپاره لا هم د باوري تضمینونو په تمه دی.
هغه زیاته کړه چې د پاکستان یو لوړپوړی پلاوی، چې د چین په اورومچي ښار کې یې د افغان طالبانو له استازو سره مهمې خبرې کړې وې، خپل سفر پای ته رسولی او بېرته اسلاماباد ته ستون شوی دی.
د نوموړي په وینا، دغه خبرې د دواړو لورو ترمنځ د اعتماد جوړونې او سیمهییز ثبات لپاره مهمې بلل کېږي، خو پاکستان ټینګار کوي چې یوازې ژمنې بسنه نه کوي، بلکې عملي او تاییدېدونکي ګامونه ضروري دي.
د چین د بهرنیو چارو وزیر وانګ يي، له ایران سره په تازه ډیپلوماټیک تماس کې د هرمز تنګي پر حساس وضعیت اندېښنه ښودلې او د سمندري تګ راتګ د عادي کېدو غوښتنه یې کړې ده.
چین ټینګار کړی چې د ایران ملي حاکمیت ته باید درناوی وشي، خو د نړیوالې سوداګرۍ لپاره د هرمز تنګي پرانیستل او خوندي پاتې کېدل هم حیاتي ارزښت لري.
وانګ يي دا وضعیت «بحراني پړاو» بللی او ویلي یې دي چې لا هم د سولې لپاره فرصت موجود دی.
چین همدارنګه چمتووالی ښودلی چې د منځګړیتوب او د سیمې د اړیکو د ښه کولو لپاره خپل رول ته دوام ورکړي.
د پاکستان د بهرنیو چارو وزارت ویلي چې تر اوسه د امریکا او ایران ترمنځ د خبرو د راتلونکي پړاو لپاره کومه ټاکلې نېټه نه ده اعلان شوې.
دغه وزارت همدارنګه ویلي چې لبنان لا هم د ایران د جګړې د اوربند یوه برخه ګڼل کېږي، او په لبنان کې سوله د سولې د خبرو د بریا لپاره مهمه ده.
چارواکو ټینګار کړی چې د سیمې ثبات او ارامي کولی شي د سیاسي خبرو بهیر ته زمینه برابره کړي، خو تر دې دمه د نوو مذاکراتو د پیل په اړه کوم وروستی تصمیم نه دی نیول شوی.
د طالبانو حکومت د ریاستالوزرا اقتصادي مرستیال ملا عبدالغني برادر په فاریاب ولایت کې د یوه جومات او روغتیايي مرکز د جوړېدو د بنسټاېښودنې په مراسمو کې ویلي چې اوسنی نظام د تېرو څو پېړیو په پرتله بېساری دی.
هغه د پنجشنبې په ورځ د وري په ۲۷مه یوې غونډې ته د وینا پر مهال له خلکو وغوښتل چې د نظام ارزښت وپېژني او شکر وباسي.
د هغه په خبره، که خلک د اوسني وضعیت قدرداني ونه کړي، ممکن دا حالت له لاسه ووځي او بدلون رامنځته شي.
ملابرادر زیاته کړې چې په ولایتونو کې پراختیايي کارونه د دوی له مهمو لومړیتوبونو څخه دي او په فاریاب کې به هم نورې پروژې عملي شي.
په همدې مراسمو کې په فاریاب کې د یوه افغان سوداګر له لوري د شاوخوا یو میلیون ډالرو په لګښت، په څلور جریبه ځمکه د جومات او روغتیايي مرکز د جوړېدو چارې پیل شوې.
د طالبانو حکومت ویلي چې دغه پروژه به د دوو کلونو په موده کې بشپړه شي.
د اسراییلو لومړی وزیر بنیامین نتنیاهو او د امریکا ولسمشر ډونالډ ټرمپ د هغو سیاسي مشرانو له ډلې څخه دي چې د ۲۰۲۶ کال لپاره د ټایم مجلې د نړۍ د ۱۰۰ اغېزناکو کسانو په کلني نوملړ کې شامل شوي دي.
په دې نوملړ کې د امریکا د بهرنیو چارو وزیر مارکو روبیو، د امریکا د پوځ لوی درستیز دن کین، سټیو ویتکاف، او د نیویارک ښاروال زهران ممداني هم شامل دي.
د ټایم مجله هر کال دا نوملړ خپروي او پکې هغه کسان شاملوي چې په نړۍ کې په سیاسي، اقتصادي، ټولنیزو او کلتوري برخو کې پراخ اغېز لري.
د ناټو سرمنشي مارک روته ویلي چې دا ائتلاف د اوکراین د جګړې د دوام لپاره نوې مالي طرحه چمتو کړې او غواړي د دفاعي مرستو لړۍ لا منسجمه او پراخه کړي.
هغه د برلین له غونډې وروسته ویلي، چې ناټو اوس هڅه کوي د اوکراین اړتیاوې په یو منظم چوکاټ کې راټولې کړي، څو د مرستو برابرول ګړندي او اغېزمن شي.
د نوموړي په وینا، تر اوسه یوازې یو څو هېوادونه د مرستو دروند بار پر غاړه لري، خو په دې برخه کې د نورو هېوادونو د ونډې زیاتېدو نښې هم لیدل کېږي.
روته ټینګار وکړ چې هدف دا دی چې اوکراین په جګړه کې یوازې پاتې نه شي او د وسلو، تجهیزاتو او مالي سرچینو کمښت ورپېښ نه شي.
د امریکا ولسمشر ډونالډ ټرمپ ویلي چې د اسراییل او لبنان ترمنځ خبرې به د پنجشنبې په ورځ ترسره شي.
نوموړي په خپلې ټولنیزې شبکې کې لیکلي چې د دغو خبرو موخه د دواړو هېوادونو ترمنځ د تاوتریخوالي کمول دي.
هغه زیاته کړې چې د دواړو هېوادونو مشرانو نږدې ۳۴ کاله کېږي چې مستقیمې خبرې نه دي کړې.
اسراییل، لبنان او امریکا د اپرېل په ۲۵مه، په واشنګټن کې د لومړي پړاو خبرو وروسته، په یوه ګډه اعلامیه کې وویل چې دا خبرې کولی شي د لبنان د بیا رغونې او اقتصادي وضعیت د ښه کېدو لپاره زمینه برابره کړي.
په اعلامیه کې دا هم ویل شوي چې اسراییل د حزبالله د بې وسلې کېدو او د هغوی د بنسټونو د له منځه وړلو ملاتړ کوي.
د امریکا د بهرنیو چارو وزیر مارکو روبیو دا خبرې یوه تاریخي موقع بللې او ویلي یې دي چې هدف دا دی چې په تېرو دوو تر درېیو لسیزو کې د حزبالله نفوذ پای ته ورسول شي.
دا خبرې په داسې حال کې کېږي چې اسراییل او لبنان له لسیزو دښمنۍ وروسته اوس مخامخ خبرو ته ناست دي.
د راپورونو له مخې، د دواړو هیوادونو ترمنځ شخړه له ۱۹۴۸ کال راهیسې روانه ده، او حزبالله هم ویلي چې دوی به هېڅ ډول هوکړه ونه مني.
د امریکا ولسمشر ډونالډ ټرمپ ویلي چې غواړي له ایران سره جګړه ژر پای ته ورسېږي.
د روسیې دولتي خبري اژانس ټاس راپور ورکړی چې نوموړي دا خبرې د هالېنډ له پاچا او ملیکې سره په یوه شخصي مېلمستیا کې کړې دي.
نوموړي زیاته کړې چې د هغه په باور، ایران یوازې د فشار په زیاتېدو سره بېرته خبرو ته راګرځېدای شي.
د یادونې ده چې امریکا او اسراییل د فبرورۍ په ۲۸مه پر ایران پراخ عملیات پیل کړل، او وروسته امریکا د اپرېل په ۷مه له ایران سره د دوو اوونیو لپاره اوربند اعلان کړ.
همدارنګه، ایران او امریکا د اپرېل په ۱۱مه په اسلاماباد کې خبرې وکړې، خو د اختلافاتو له امله کومې وروستۍ هوکړې ته ونه رسېدل.
تر اوسه د خبرو د بل پړاو نېټه نه ده ټاکل شوې، خو امریکايي چارواکي وايي امکان شته چې دا خبرې په نږدې ورځو کې بیا پیل شي.
د ایران د بهرنیو چارو وزیر سید عباس عراقچي او د چین د بهرنیو چارو وزیر وانگیي ترمنځ په ټیلیفوني خبرو کې د سیمې پر امنیتي وضعیت خبرې شوې دي، چې پکې ایران د امریکا د وروستیو تحرکاتو په اړه اندېښنه ښودلې ده.
د راپورونو له مخې، عراقچي ویلي چې د امریکا پوځي حضور په فارس خلیج او هرمز تنګي کې کولای شي سیمه لا پسې حساسه او پېچلې کړي او د ثبات لپاره جدي ګواښ رامنځته کړي.
په ورته وخت کې، وانګیي د ایران د خلکو د دریځ ستاینه کړې او ټینګار یې کړی چې چین د خبرو اترو او ډیپلوماسۍ له لارې د شخړو د حل ملاتړ کوي.
هغه دا هم ویلي چې بیجینګ چمتو دی د تاوتریخوالي د کمېدو او خبرو د پرمختګ لپاره مرسته وکړي.