په جمهوري حکومت کې د کورنيو چارو وزارت امنيتي مرستيال خوشال سادات ویلي چې پاکستان د طالبانو په څېر بله جنګي مهره نشي موندلی.
هغه د طالبانو حکومت او پاکستان ترمنځ اختلاف ډرامه بللې.
سادات زیاته کړې، پر افغان خاوره د پاکستان د بیا حملې په صورت کې ښایي هند طالبانو ته د الوتکو او ټانګ ضد وسلې ورکړي، چې د جګړې معادله کې تغيير راولي.
هغه ویلي، ښایي ژر به بلوڅ پر خپلې خاورې او ټي ټي پي به پر پښتنو سیمو ولکه ټینګه کړي.
راپورونه وايي چې د لاس انجلس اور د دغه ایالت په ختیځو څنډو کې له ۱۷ څخه تر ۳۵ سلنې پورې کنټرول شوی دی.
دا اور په پالیسازد او ایتون کې سیمو کې مهار شوی دی.
د راپورونو له مخې، په دغه اور لګېدنه کې تر اوسه ۲۴ کسان وژل شوي دي.
بل لورته راپورونه وايي، چې د لاس انجلس په بېلابېلو ښارونو کې د یادې اور لګېدنې له کبله څه باندې ۹۰۰ زره هکتاره ځمکه هم سوځېدلې.
د جنوبي کوریا پخوانی ولسمشر یون سوک یول د دغه هېواد د څېړنیزو ځواکونو له لوري ونیول شو.
سره له دې، چې د هغه د نیولو لپاره ډېرې هڅې وشوې، خو ناکامې شوې وې.
د تېر کال په ډسمبر میاشت کې په جنوبي کوریا کې د لنډ مهالي حکومت له اعلان وروسته د یون سوک د نیولو امر وشو.
د طالبانو حکومت ویاند ذبیح الله مجاهد ویلي، چمتو دي چې د خپلو شرطونو پر اساس، له امریکا سره د بندیانو تبادله ترسره کړي.
مجاهد ویلي، دوی تمه لري چې د دغې معاملې په صورت کې به له ګوانتنامو څخه افغان زندانیان هم ازاد شي.
د طالبانو حکومت تر دې وړاندې هم منلې وه، چې په دې اړه یې له امریکا سره خبرې روانې دي؛ خو ویلي یې وو، چې لا یې هم کومه پایله نه ده ورکړې.
امریکا وايي، په ګوانتنامو کې د افغان بندي محمد رحیم الافغاني او له طالبانو سره د درې امریکايي وګړو د تبادلې په اړه یې له طالبانو سره خبرې پیل کړې.
ټاکل شوې چې په راتلونکو څو ساعتونو کې په غزه کې اوربند ټینګ شي.
که څه هم دا لامعلومه نه ده، چې اوربند به سل سلنه وشي او که نه؛ خو تېره شپه ناوخته رسنیو راپورونه ورکړي وو، چې د غزې له یو شمېر سیمو څخه اسرائیلي پوځیان شاتګ ته چمتووالی نیسي.
تېره ورځ د یاد اوربند لپاره په دوحه کې ناسته شوې وه، چې تېره شپه یې ناوخته جزیات له حماس او اسرائیل سره هم شریک شوي.
د ایران د بهرنیو چارو وزیر عباس عراقچي وایي ټاکل شوې چې ددې هیواد ولسمشر مسعود پزشکیان په دوه اړخیزو غونډو او یوشمیر ستراتیژیکو سندونو د لاسلیک په موخه تاجکستان او روسیې ته سفر وکړي.
ښاغلي عراقچي ویلي چې د ولسمشر په توګه د ښاغلي پزشکیان دا لومړی سفر دی چې مسکو ته یې ترسره کوي.
دغه سفر به د روانې جمعې په ورځ ترسره شي.
تحریک طالبان پاکستان ډلې د بنو په ډومېل سیمه کې د پاکستاني پوځیانو پر پوستو بریدونه کړي، چې دوه پوځیان یې وژلي.
سیمهییزې سرچینې وایي، دا برید د پوستو له سل مترۍ شوی، چې پکې درې وسله وال هم وژل شوي.
بل لورته د ډي اي خان سیمه کې هم د پاکستاني پوځیانو پر پوستو برید شوی، چې په کې یو پولیس وژل شوی.
په همدې حال کې د خیبر ایجنسي په ورسک کې هم یو پولیس وژل شوی دی.
د سوډان پلازمېنې خرطوم پر شاوخوا سیمو راکټي بریدونه شوي چې ۱۲۰ کسان وژل شوي او لسګونه نور ټپیان دي.
راپورونه وایي، دا لومړۍ شمېرې دي او ښایي د تلفاتو کچه نوره هم لوړه شي.
سوډان کې د دولتي ځواکونو او وسله والو ترمنځ نښتې روانې دي، چې اوس مهال یې سخت زور اخیستی دی.
دمګړی سیمې ته مرستندویه ډلې رسېدلې او د مړو او ټپیانو په خوندي کولو بوختې دي.
د طالبانو حکومت د کورنیو چارو سرپرست وزیر سراج الدین حقاني په کابل کې د سعوي عربستان به سفیر فیصل طلق البقمي سره لیدلي دي.
د طالبانو حکومت د کورنیو چارو وزارت ویاند عبدالمتین قانع په خپله ایکسپاڼه لیکلي چې، په دغې لیدنه کې سراج الدین حقاني د دواړو هېوادونو ترمنځ د ژورو اسلامي او تاریخي اړیکو پر اهمیت خبرې کړې دي.
قانع زیاته کړې، چې په دې لیدنه کې البقمي د طالبانو له حکومت سره د اړیکو د لا پراختیا ژمنه کړې او د دواړو هېوادونو ترمنځ د «ګډو اسلامي او کلتوري ارزښتونو» پر بنسټ د همکارۍ پر دوام یې تاکید کړی دی.
طالبانو د خوست ولایت شېخ زاید پوهنتون ۱۷ استادان منفک کړي دي.
رسنیو کې لاس په لاس شوي مکتوب کې لیدل کېږي چې ټول د شرعیاتو پوهنځي استادان دي.
سره له دې چې دا مکتوب د یاد پوهنتون ادارې ته رسېدلی؛ خو تر اوسه په رسمي ډول د طالبانو حکومت په دې اړه څه نه دي ویلي.
یو شمېر سرچینې بیا وایي چې د دغه پوهنتون ځینې نور استاد بیا له کادري بستونو لرې شوي دي.