د امریکا ولسمشر ډونالډ ټرمپ د هند او پاکستان ترمنځ د اوربند پرېکړه ستایلې او ویلي یې دي چې غواړي د دواړو هېوادونو ترمنځ د کشمیر د اوږدې شخړې د حل لپاره همکار شي.
نوموړي ویلي، که څه هم لا یې په دې اړه له اسلاماباد او نوې ډیلي سره خبرې نه دي کړي؛ خو هیله لري چې له دواړو هېوادونو سره سوداګریزې اړیکې هم پراخې کړي.
ټرمپ دا څرګندونې په داسې حال کې کړي چې تازه د هند او پاکستان ترمنځ کړکېچ پای ته رسېدلی او له یو بل سره یې اوربند کړی.
د طالبانو حکومت د بهرنیو چارو وزارت د عامه اړیکو رییس ضیاء احمد تکل وايي، د چین ځانګړي استازي یوشیاو یونګ، امیرخان متقي ته بلنه ورکړې، چې روانه میلادي میاشت چین ته سفر وکړي.
دغه بلنه د دواړو لورو ترمنځ د لیدنې پر مهال مطرح شوې چې پکې د دوهاړخیزو اړیکو پر پراختیا خبرې شوې دي.
د ضیاء احمد تکل په وینا، متقي او یوشیاو یونګ د سیاسي اړیکو د لا پیاوړتیا، اقتصادي همکاریو او سیمهییز تعامل په اړه مفصلې خبرې وکړې.
متقي له چین څخه د افغانستان په برخه کې د همکارۍ او ملاتړ مننه وکړه او ویې ویل چې چین د یوه مهم سیمهییز شریک په توګه رول لوبولی دی.
د چین ځانګړي استازي ټینګار وکړ چې بیجینګ به د افغانستان نړیوال ملاتړ ته دوام ورکړي او د دې هېواد په اقتصادي پراختیا کې به فعاله ونډه واخلي.
د اردن یوې ورځپاڼې “المرصد” راپور ورکړی چې یو اردني وروسته تر هغې خپله مېرمن طلاق کړې، چې هغه یې د لبنان د مشهور سندرغاړي راغب علامه د هرکلي په مراسمو کې ولیدله.
دغه کنسرت تازه په اردن کې ترسره شوی و، او ګڼ شمېر ښځې د دغه هنرمند هرکلي ته تللې وې.
یوې بلې ورځپاڼې “السوسنه” بیا راپور ورکړی، دا ښځه پرته له دې چې خپل مېړه خبر کړي یا اجازه ترې واخلي، د ملکه عالیه هوایي ډګر ته تللې وه ترڅو د راغب علامه هرکلی وکړي.
نوموړې خپل مېړه ته ویلي وو چې غواړي د خپلې کورنۍ لیدو ته ولاړه شي، خو اصلاً د هنرمند لیدو ته تللې وه.
د راپور له مخې، د ښځې مېړه هغه په یو ویډیو کې لیدلې وه چې د راغب علامه د هرکلي پر مهال خپره شوې او په ټولنیزو رسنیو کې لاس په لاس کېدله.
نن د عمان په مسقط کې امریکا او ایران د اټومي پروګرام په اړه ځنډول شوې خبرې پیلوي.
رویټرز خبري اژانس د ایران د بهرنیو چارو وزیر سید عباس عراقچي له قوله لیکلي چې د اټومي پروګرام په اړه له امریکا سره د غیر مستقیمو خبرو اترو څلورم پړاو به نن عمان کې ترسره کیږي.
ایران وایي، له امریکا سره یې خبرې ښې روانې دي.
امریکایي ولسمشر ډونالډ ټرمپ په وار، وار ایران ته خبرداری ورکړی که تهران موافقه ونه کړي نو ددې هیواد هستوي تاسیسات به بمبارد کړي.
پدې خبرو اترو کې د منځني ختیځ لپاره د امریکا د ولسمشر ځانګړی استازی سټیو ویټکاف هم د خبرو اترو پدې پړاو کې د ګډون لپاره د عمان پلازمینې ته ولاړ شي.
دغه خبرې اترې چې باید د مۍ په ۳مه روم کې ترسره شوای د یو شمیر دلایلو له امله ځنډلي وو
د هند او پاکستان ترمنځ د ترینګلتیا تر کمېدو وروسته، د پاکستان د هوايي ډګرونو ادارې اعلان کړی چې د شنبې په ماښام یې فضایي حریم یو ځل بیا په بشپړ ډول د ټولو الوتنو لپاره پرانیست.
د دې ادارې ویاند ویلي، ټول هوايي ډګرونه د عادي پروازونو لپاره خلاص دي او له مسافرو یې غوښتي چې د خپلو الوتنو د مهالویش لپاره له هوايي شرکتونو سره تماس ونیسي.
د پاکستان نړیوال هوايي شرکت (PIA) هم خپل ځنډېدلي پروازونه له سره پیل کړي.
چارواکي وايي، د امنیتي دلیلونو له امله ځینې الوتنې مخکې ځنډول شوې وې.
د روسیې ولسمشر ولادیمیر پوتین د اکراین د جګړې په اړه ددغه هېواد سره د مستقیمو خبرو اترو وړاندیز کړی.
ښاغلي پوتین چې کرملین ماڼۍ کې خبرې کولې وړاندیز کړی چې دغه خبرې اترې دې د روانې میاشتې په ۱۵مه په استانبول کې ترسره شي.
د روسیې ولسمشر ویلي، دا خبرې اترې باید د تلپاتې سولې د ترلاسه کولو او د جګړې د اصلي لاملونو د له منځه وړلو په موخه ترسره شي.
په ورته وخت کې، د څلورو لویو اروپايي هیوادونو مشرانو خبرداری ورکړی که ولادیمیر پوتین د شنبې په ورځ په اوکراین کې وړاندې شوی غیر مشروط ۳۰ ورځنی اوربند ونه مني؛ نو دوی به پر روسیې فشار زیات کړي.
د سږ کال حج مراسمو ته له افغانستان څخه تلونکې یوې افغانې میرمنې (د حج زیارت کوونکې) د سعودي مدینې منورې ته له رسیدو وروسته یوه ماشومه نجلۍ وزېږوله.
دغه افغانه حاجۍ وایي، چې په لور یې «مدینه» نوم ایښی.
په داسې حال کې چې په سعودي عربستان کې روغتیايي خدمات خورا لوړ او قیمته دي؛ خو حکومت اعلان کړی چې ټولو حاجیانو ته به وړیا روغتیایي خدمات وړاندې کوي.
د فرانسې، بریتانیا، آلمان او پولنډ مشرانو خبرداری ورکړی که د روسیې ولسمشر ولادیمیر پوتین د اوکراین لپاره وړاندیز شوی ۳۰ ورځنی غیر مشروط اوربند ونه مني، نړیوال فشارونه به پرې زیات شي.
دوی دا اوربند د امریکا د ولسمشر ډونالډ ټرمپ له ملاتړه برخمن بللی.
په ورته وخت کې د کرملین ویاند، دیمتري پسکوف، سيانان ته ویلي، چې مسکو باید دا وړاندیز وڅېړي.
نوموړي تر دې وړاندې هم ویلي وو چې روسیه د اوکراین سره د سولې خبرو ته «بې له کوم شرط» چمتو ده، او کییف یې خبرو کې په خنډ جوړولو تورن کړ.
اروپايي مشران وايي، اوربند باید پرته له کوم شرط پیل شي.
د هندي رسنیو د راپورونو له مخې، اووه تنه نامعلومه وسلهوال چې د پاکستان له خاورې د هند خاورې ته د هندي پوځیانو په یونیفورم کې داخل شوي وو، له درې هندي سرتېرو یې سرونه غوڅ کړي دي.
هندي رسنۍ زیاتوي چې دغه برید کوونکي د هند پوځیانو په رسمي یونیفورم سمبال وو، او اټکل کېږي چې دا یونیفورمونه د پاکستان پوځ برابر کړي وي.
د دغه پېښې مسؤلیت تر اوسه کومې ډلې نهدی منلی؛ خو دا پېښه د دواړو هېوادونو ترمنځ د تاوتریخوالي د زیاتېدو په لړ کې یوه بله نښه بلل کېږي.
د چین حکومت د پاکستان د ځمکنۍ بشپړتیا بشپړ ملاتړ اعلان کړ.
چین ویلي، چې له پاکستان سره د ځمکنۍ بشپړتیا په ساتلو کې څنګ په څنګ ولاړ یوو.
دوی دا څرګندنې وروسته تر هغې کوي، چې پاکستان له اوربند وروسته یو وار بیا پر هند بریدونه پیل کړل.
د یادونې ده، چې دا بریدونه نږدې دوه ساته وړاندې پیل شوي دي.