د قران کریم د تلاوت او حفظ په نړیواله سیالۍ کې چې د ۳۳ هېوادونو د تکړه قاریانو په ګډون په مصر کې ترسره شوه، له افغانستان څخه قاري سید راشد کاظمي د قرآن کریم د تلاوت په برخه کې د دویم مقام په ګټلو بریالی شو.
دغه سیالۍ د مصر د لومړي وزیر او د بورسعید ښار د والي په مدیریت ترسره شوه.
دغې سیالۍ ته د اسلامی نړۍ د مشهورو دیني او علمي شخصیتونو په ډله کې د مصر د مفتي اعظم، د حج او اوقافو وزیر، پوهانو، د قرآن کریم استادانو او سترو نړیوالو قاریانو ګډون کړی وو.
د طالبانو حکومت مرستیال ویاند حمدالله فطرت تاجکستان کې د افغانستان په اړه د اروپایي ټولنې او منځنۍ اسیا هېوادونو د ناستې په تړاو ویلي، چې د افغانستان د اقتصادي پرمختګ لپاره هڅې دوام لري.
نوموړي د سیمې پر هېوادونو غږ کړی چې په دې برخه کې د طالبانو حکومت سره همکاري وکړي.
فطرت ویلي، چې د طالبانو حکومت د نړۍ له هېوادونو سره د مثبت تعامل غوښتونکی دی.
د یادونې ده چې تاجکستان پرون چهارشنبه د افغانستان په اړه د منځنۍ اسیا د هېوادونو او اروپايي ټولنې د ځانګړو استازو د شپږمې غونډې کوربه و.
د امریکا دفاع وزیر پیټ هېګسيټ ویلي، چې غزې ته د امریکایي پوځیانو د لېږلو په اړه خبرې ډېر وخت نیسي.
نوموړي ویلي چې اوس مهال غزې تړانګې ته د امریکايي پوځیانو لېږل له امکان څخه ډېره لیرې خبره ده.
نوموړي زیاته کړې، چې امریکا د غزې په اړه د خپلو اقداماتو لپاره پر ټولو ممکنه لارو چارو غور کوي او تر اوسه یې کومه مشخصه پریکړه نه ده اعلان کړې.
د طالبانو حکومت د ډیټابیس د اسنادو له مخې چې د هکرانو یوې ډلې افشا کړي، د طالبانو حکومت مشر شیخ هبت الله اخندزاده دولتي څانګو ته امر کړی چې د ده له اجازې پرته دې څوک بهر ته د زده کړو لپاره نه استوي.
شیخ هبتالله دغه فرمان د روان کال د چنګاښ په ۱۶ مه صادر کړی.
د دې مکتوب په یوه کاپي کې چې د طالبانو د عامه چارو وزارت ته استول شوی، شیخ هبت الله له طالبانو غوښتي چې: «ستاسو په استازیتوب که څوک بهر ته د زده کړو، ظرفیت لوړونې، سیمینارونو او یا نورو زده کړو لپاره لیږل کېږي، د هغوی بشپړ معلومات د کورنیو چارو وزارت له لارې موږ ته ولېږئ او زموږ له منظورۍ وروسته به یې په اړه اقدام وشي.»
په خیبر پښتونخوا کې د ټيټيپي ډلې دوه پاکستاني پولیس وژلي.
د خیبر پښتونخوا په داود شاه تحصیل سیمه کې تېره شپه وسله والو پر یوه چیک پواینټ برید کړی چې په پایله کې یې دوه پولیس وژل شوي او شپږ تنه نور ټپیان شوي دي.
د پاکستان حکومت تر اوسه په دې اړه څه نه دي ویلي.
د طالب لیکس په نوم د هکرانو یوې ډلې د طالبانو حکومت ۲۱ اداري ویبسایټونه هک کړي او معلومات یې ټولنیزو رسنیو کې نشر کړي دي.
د یادو معلوماتو له مخې، د رسمي داخلي او خارجي بندیانو شمیر هم په ډاګه شوی.
معلوماتو کې ویل شوي، چې دا مهال د طالبانو حکومت سره په بند خونو کې ۱۸۸۷۵ تنه بندیان دي؛ چې نشر شوي معلومات د ۱۴۳۷ بندیانو د رازونو افشاګري ښایي.
د دې بندیانو له ډلې ۱۳۷۴ افغانې ښځې چې په بیلابیلو سیاسي قضیو کې تورنې شوي طالبانو له ځانه سره په بندخونو کې ساتلي.
همدا رنګه له دې مجموعې ۶۳ تنه بهرنیان هم په بندیانو کې شتون لري چې شپږ پکې ښځې او نور یې نارینه دي.
د طالبانو حکومت تر اوسه په دې اړه څه نه دي ویلي.
د مایکروسافټ بنسټ ایښودونکی بیل ګیټس وایي، چې هغه د خپلې ۱۰۰ میلیارد ډالرو شتمنۍ څخه ډېره شتمني خیریه بنسټونو ته ورکړې، چې په کې د ناروغیو سره مبارزه او د غربت کمول شامل دي.
بیل ګیټس ویلي، چې هغه لاهم ډیره شتمني لري او پلان لري چې په راتلونکي کې د خپلې شتمنۍ ډیره برخه خیریه کارونو ته ورکړي.
هغه دا هم ویلي، چې له دې خیریه کارونو سره به يې اولادونه په راتلونکي کې بېوزله نه وي او ښه ژوند به ولري.
بیل ګیټس له بي بي سي سره په مرکه کې څرګنده کړې، چې د خیرات روحیه او د ټولنیز مسؤلیت احساس د ماشومتوب څخه په هغه کې جوړ شوی و.
د سپینې ماڼۍ ویاندې کارولین لیویت د غزې د نېولو او بیارغونې په اړه د امریکا د ولسمشر ډونالډ ټرمپ د سه شنبې په ورځ څرګندونې عادي وبللې او ویې ویل چې د امریکا ولسمشر غزې ته د پوځي ځواکونو د لېږلو په اړه پرېکړه نه ده کړې.
لیویت ویلي، چې ولسمشر ټرمپ تر اوسه غزې ته د ځمکنیو ځواکونو د استولو ژمنه نه ده کړې.
لیویت همدا راز ټرمپ په نړۍ کې تر ټولو ښه مذاکره کوونکی بللی او زیاته کړې یې ده چې له لسیزو راهیسې ورته خلکو د دې ستونزې د حل لارې چارې وړاندې کړې، خو ولسمشر ته دا خبره ډېره څرګنده ده چې امریکا باید د بیارغونې په هڅو کې برخه واخلي چې په سیمه کې د ټولو خلکو لپاره ثبات تامین شي.
د ملګرو ملتونو سرمنشي انتونیو ګوترېش وايي، د غزې د کړکېچ د هواري په لټه کې باید دغه کړکېچ نور هم زیات نه کړو.
ښاغلي ګوتریش په خپله ایکسپاڼه د نړیوالو قوانینو په رعایت ټینګار کړی.
هغه ویلي، چې د هر ډول توکمیز چلند مخه باید ونیول شي.
دا په داسې حال کې ده چې د امریکا ولسمشر ډونالډ ټرمپ د اسرائیلو له لومړي وزیر بنیامین نتنیاهو سره په کتنه کې ویلي، چې د غزې اوسیدونکي به نورو سیمو ته انتقال کړي او دا سیمه به ونیسي.
د اسلامي همکاریو سازمان د غزې په تړانګه کې د فلسطینیانو د بېځایه کولو په اړه د امریکا د ولسمشر ډونالډ ټرمپ څرګندونې غندلې.
د اسلامي همکاریو سازمان په یوه اعلامیه کې ویلي، چې د فلسطین د نیولو او هلته د خلکو د بېځایه کولو څرګندونې له نړۍوالو قوانینو ښکاره سرغړونه ده.
یاد سازمان غزه کې د اوربند د ټینګښت، د اسراییلي ځواکونو د وتلو او د فلسطین د خلکو پر ضد د اسراییل د ټولو جنایتونو پر وړاندې د ځواب ویلو لپاره د همغږو هڅو غوښتنه کړې ده.