د پاکستان لومړي وزیر شهباز شریف د سعودي عرب سفیر نواف بن سعید المالکي سره د وروستۍ لیدنې پر مهال ویلي، چې پاکستان د پاهلګام پېښې سره تړلي د هند تورونه ردوي او دا ډول بېاساسه ادعاوې د منلو وړ نه دي.
نوموړي زیاته کړې، چې پاکستان د ترهګرۍ پر ضد جګړه کې سترې قربانۍ ورکړې او د سولې لپاره یې نه یوازې د خپل هیواد، بلکې د ټولې نړۍ د امنیت لپاره هڅې کړې دي.
هغه یو ځل بیا غوښتنه کړې، چې د پاهلګام پېښې په تړاو دې ناپېیلې نړیوالې پلټنې وشي.
د افغانستان لپاره د روسیې ځانګړي استازي ضمیر کابلوف اعلان کړی چې مسکو به طالبانو ته د داعش خراسان څانګې پر ضد د مبارزې لپاره مرسته ورکړي.
نوموړي دا ډله د روسیې او طالبانو ګډ دښمن بللی او ویلي چې د روسیې اړوند ادارې به د دې هدف لپاره لازمه همکاري وکړي.
کابلوف همداراز څرګنده کړې چې د طالبانو د رسمیت پېژندنې پرېکړه لا نهده شوې؛ خو د دواړو هېوادونو اړیکې دوام لري.
نوموړي ویلي، چې د روسیې سترې محکمې له خوا له تور نوملړ څخه د طالبانو د نوم لېرې کېدل، د پراخو همکاریو دروازې پرانیزي.
کابلوف د لویدیځ له هېوادونو، په ځانګړي ډول امریکا سره د همکارۍ چمتووالی هم ښودلی او ویلي چې امریکا باید د افغانستان کنګل شوې شتمنۍ خوشې کړي.
د پاکستان حکومت غواړي، چې نږدې راتلونکي له هند څخه د اندس د اوبو تړون ځنډولو په اړه وضاحت وغواړي.
د پاکستان د بهرنیو چارو، اوبو سرچینو او قانون جوړونې وزارتونو چارواکو په دې اړه لومړنی چمتووالی نیولی او ژر به هند ته یو رسمي دیپلوماتیک خبر ورکړي.
د سرچینو د معلوماتو له مخې، پاکستان غواړي، چې دا مسئله په نړیواله کچه هم راپورته او پر سیمې د دغو اوبو د بندیدو اغېز په اړه بحثونه راپورته کړي.
د امریکا د ولسمشر مرستیال جیډي ونس ویلي، امریکا هیله لري چې پاکستان به له هند سره د خپلې خاورې مېشتو وسلهوالو د پیژندلو او مخنیوي لپاره همکاري وکړي او هند هم باید له کشمیر وروسته د رامنځته شوي برید په غبرګون کې له تاوتریخوالي ډډه وکړي.
نوموړي دغه څرګندونې وروسته له هغې وکړې چې د هند تر ولکې لاندې کشمیر کې له مرګوني برید وروسته د هند او پاکستان تر منځ تاوتریخوالی راپورته شوی.
په دغه برید کې ۲۶ کسان وژل شوي، او هند یې پړه پر پاکستان اچولې.
بل لورته اسلامآباد دا تورونه رد کړي او د ناپېیلو څېړنو غوښتنه یې کړې.
د ملګرو ملتونو لپاره د پاکستان دايمي استازي عاصم افتخار په نیویارک کې د ملګرو ملتونو له سرمنشي انتونیو ګوتریش سره کتلي او د هند تر ولکې لاندې کشمیر کې د وروستي برید وروسته د پاکستان او هند ترمنځ زیاتېدونکي تاوتریخوالي په اړه یې خبرې کړې دي.
دواړو چارواکو د جنوبي اسیا د امنیتي وضعیت، د تاوتریخوالو د کمولو، او د ثبات د راوستلو لپاره د روانو ډیپلوماټیکو هڅو په اړه مفصل بحث کړی دی.
سفیر افتخار د سیمې د سولې او ثبات لپاره د پاکستان ژمنتیا څرګنده کړې او ټینګار یې کړی چې اسلاماباد د خبرو اترو او ډیپلوماټیک حل لارو ملاتړ کوي.
د پاکستان د بهرنیو چارو وزارت د هند له لوري د ویزو ناڅاپي لغوه کولو له امله د رامنځته شویو انساني ستونزو پر وړاندې ژوره اندېښنه څرګنده کړې ده.
دغه وزارت ویلي، ګڼ شمېر ناروغان د واګه له پولې بېرته راستانه شوي؛ خو درملنهیې نیمګړې پاتې شوې او روغتیایي حالتیې نازک دی.
یاد وزارت زیاتوي، چې راپورونه ښيي چې ځینې کورنۍ بېلې شوې، ماشومان له خپلو مور او پلار څخه جلا شوي او یو شمېر پاکستانیان لا هم د اتاري په پوله کې بند پاتې دي.
دې وزارت دغه راز ویلي، که هند اجازه ورکړي، پاکستان چمتو دی خپل وګړي بېرته راولي، او واګه پوله به د بېرته راستنېدونکو لپاره پرانیستې پاتې شي.
د امریکا ولسمشر ډونالډټرمپ په خپله اداره کې د یوه بیساري بدلون په ترڅ کې د سپینې ماڼۍ د ملي امنیت سلاکار مایک والټز له دندې لیرې کړ او پر ځای یې د بهرنیو چارو وزیر مارکو روبیو ټاکلی دی.
ټرمپ ویلي، والټز به ملګرو ملتونو ته د امریکا د سفیر په توګه معرفي کړي.
دا پرېکړه وروسته له هغې وشوه چې والټز د امنیتي معلوماتو د افشا کېدو په یوه رسوایۍ کې ښکېل شو.
د ملي امنیت د سلاکار مرستیال الکس وونګ هم له دندې لیرې شوی دی.
د جمعیت علمای اسلام ګوند مشر مولانا فضلالرحمن ویلي، پاکستان تر اوسه له طالبانو سره په ډیپلوماټیکو اړیکو کې بریا نه ده ترلاسه کړې.
هغه تورخم کې د بار وړونکو لاریو د بندېدو یادونه کړې او ویلي یې دي، دا وضعیت د دواړو خواوو خلکو شتمنۍ له منځه وړي.
نوموړی زیاتوي، تر هغه چې په پاکستان کې سیاسي او اقتصادي فکر له پوځي سیاست څخه نه وي جلا شوی، ناسمې پالیسۍ به دوام ولري.
د ګلبدین حکمتیار زوی حبیبالرحمن حکمتیار وایي، داسې ښکاري چې د طالبانو مشر د ایران د سپاه پاسداران تجربې ته په کتو، په افغانستان کې ورته ځواک ته په کتو یو وفادار، ځواکمن او موازي امنیتي جوړښت رامنځته کوي.
نوموړي ویلي، د امنیتي ځواکونو کمول په ځانګړې توګه په کندهار کې، د اختلافاتو نښه نه ده، بلکې د طالبانو د مشر له خوا د خپلواکو او وفادارو ځواکونو د پیاوړتیا لپاره یوه طرحه ده.
د هغه په باور، د استخباراتو، دفاع او کورنیو چارو وزارتونه به په تدریجي ډول خپل اهمیت له لاسه ورکړي، او د شیخ هیبت الله ځواک به د ټولو امنیتي چارو واګي په لاس کې ولري.
نوموړي زیاته کړه، دا کسان چې د تنقیص په نامه ایستل شوي، زیاتره یې په جګړه کې فعال رول نه درلود او امکان نه لري چې د طالبانو لپاره جدي ننګونه جوړه کړي.
هغه دغه راز ویلي، چې دا نوې طرحه ښيي، طالبانو د ایران له تجربې درس اخیستی او ورته سیسټم یې په افغانستان کې تطبیقوي.
د جمهوري حکومت د چارو ادارې لوی رییس فضل محمود فضلي ویلي، که له جنوبي افریقا د نژادي اپارتاید پر ضد بریالۍ مبارزې الهام اخلو، باید په افغانستان کې د جنسیتي اپارتاید پر ضد هم ولسي، منظمې او اوږدمهالې مبارزې ته چمتو شو.
ښاغلي فضلي پر خپله ایکسپاڼه لیکلي، چې اوسني پروژهیي اقدامات مؤثر نه دي او یوازې سوداګریز اعلانونه دي.
نوموړی وایي:«که غواړو له جنوبي افریقا د نژادي اپارتاید پر وړاندې د مبارزې څخه الهام واخلو او خپل هیواد کې د جنسیتي اپارتاید پر وړاندې مبارزه وکړو، نو باید لومړی پروژو ته “نه” ووایو؛ بیا ولسي، اوږدمهاله، منظمې او پوره ژمنتیا سره مبارزې ته چمتووالی او حوصله ولرو.»