د سپینې ماڼۍ یو چارواکي تایید کړې چې د ایکس ټولنیزې شبکې مالک، ایلان ماسک د ډونالډ ټرمپ له ادارې څخه رسماً وتلی دی.

سرچینې رسنیو ته ویلي، د ماسک د ځانګړي دولتي کارکوونکي دندې موده پای ته رسېدلې او د هغه د وتلو رسمي بهیر له همدې شېبې پیل شوی.

آسوشیېټډ پرېس تر دې وړاندې راپور ورکړی و چې ماسک د ټرمپ حکومت د تولیداتو د لوړې کچې ادارې مشر پاتې شوی و؛ خو اوس له دې مقامه استعفا ورکړې.

ماسک په یوه لنډ بیان کې ویلي: «له ولسمشر ټرمپ څخه مننه کوم چې دا فرصت یې راکړ؛ خو اوس زما ټاکل شوې دوره پای ته رسېدلې.»

رویټرز خبري اژانس ویلي، ایران چمتو دی چې د یو کال لپاره یورانیم غني کول ودروي؛ خو په دې شرط چې امریکا یې کنګل شوې شتمنۍ خوشې کړي او د ملکي کارونې لپاره د یورانیم غني کولو حق په رسمیت وپېژني.

رویټرز د ایراني سرچینو له قوله راپور ورکړی، چې دا اقدام به د یو سیاسي توافق برخه وي.

د رویټرز په وینا، ایران ټینګار کوي چې خپل اټومي پروګرام نه بندوي، بلکې د سوله‌ییزو موخو لپاره یې محدودوي.

بل لورته د ایران ولسمشر مسعود پزشکیان له عمان ټلوېزیون سره په مرکه کې وویل، دغه هېواد د سوله‌ییزو موخو لپاره د یورانیمو له غني کېدو نه تېرېږي.

نوموړی د سوله‌ییزې اټومي انرژۍ د کارونې په برخه کې د ایران پر حق ټینګار کوي او وایي: «که هغوی غواړي ډاډ ترلاسه کړي، هر ډول همکاریو ته چمتو یو.»

رویټرز خبري اژانس وایي، د امریکا دفاع وزیر پېټ هېګسټ به د «شانګري-لا ډیالوګ» امنیتي غونډه کې د لومړي ځل لپاره برخه واخلي، څو اسیايي متحدینو ته دا ډاډ ورکړي چې امریکا د چین په پرتله یو باوري شریک پاتې کېږي.

رویټرز زیاتوي چې دا غونډه په سینګاپور کې کېږي، چیرې چې د امریکا د ګډو ځواکونو لوی درستیز هم ګډون کوي.

د رویټرز په وینا، هېګسټ هڅه کوي د واشنګټن دودیز رول بیا ټینګ کړي، په ځانګړي ډول وروسته له هغې چې د ټرمپ په دوره کې متحدینو د امریکا ژمنتیا تر پوښتنې لاندې راوستې وه.

رویټرز زیاته کړې، چې چین ښايي له دې ناستې پاتې شي او امریکا د خپل دریځ د پیاوړتیا فرصت برابروي.

دا هڅه په داسې حال کې کېږي چې چین د غونډې له ګډون احتمالي انکار کړی.

د خوست ځایي سرچینې وايي، د دغه ولایت په ټڼیو ولسوالۍ کې د دوو کورنیو ترمنځ نښته شوې، چې له امله یې د دوو ښځو په ګډون ۵ تنه وژل شوي او یوه ښځه ټپي شوې ده.

پېښه د ټڼیو ولسوالۍ د للمۍ په سیمه کې شوې، او وژل شوي کسان د یوې کورنۍ پلار، مېرمن، زوی او لور دي، بل لور ته یو تنکی ځوان هم وژل شوی دی.

د پېښې لامل نه دی څرګند شوی، او د طالبانو حکومت هم تر اوسه په دې اړه څه نه دي ویلي.

د طالبانو تر کنترول لاندې ملي ټلویزیون د متحده عربي اماراتو د بهرنیو چارو وزارت د اعلامیې ناسمه ژباړه او د خبر تحریف وړاندې کړی.

ملي ټلویزیون لیکلي:« متحده عربي اماراتو په رسمي ډول دوبۍ کې د اسلامي امارت د سرقونسل عبدالرحمان فدا باورلیک ومانه.»

خو د متحده عربي اماراتو د بهرنیو چارو وزارت اعلامیه لیکلي:« دوبۍ کې د دې وزارت د دفتر مشر شیخ مکتوم بن بطي آل مکتوم په یوه رسمي ناسته کې د افغانستان د اسلامي جمهوریت د سفیر ښاغلي عبدالرحمن فدا باورلیک ترلاسه کړی دی.»

هند سر له سبا څخه په هغو څلورو ایالتونو کې پراخ ملکي دفاعي تمرینونه کوي چې له پاکستان سره پر پوله پراته دي.

د هندي رسنیو په وینا، دا تمرینونه به په کشمیر، پنجاب، ګجرات او هریانه ایالتونو کې ترسره شي.

په هریانه کې دا تمرین د “شیلډ عملیات” تر عنوان لاندې د مې پر ۲۹مه د ماښام له ۵ بجو څخه په ټولو ۲۲ ولسوالیو کې پیلېږي.

هند دا تمرینونه داسې مهال کوي، چې دواړو هېوادونو ترمنځ له جګړې وروسته لاهم اړیکې کړکېچنې دي.

پاکستان لاهم وېره لري، چې هند ورباندې بیا بریدونه ونکړي.

راپورونه وایي، د متحده عربي اماراتو په شارجې ښار کې امنیتي ځواکونو په هغه استوګنځي چاپه وهلې، چې پکې جعلي زمزم اوبه جوړېدې.

راپورونه زیاتوي، چې تورن کس به عادي اوبه په بوتلونو کې اچولې او د زمزم په نوم به يې بازار ته وړاندې کولې.

چارواکو له خلکو غوښتنه کړې چې بې جوازه محصولات ونه پېري.

په ورته وخت کې د سعودي چارواکو ټينګار کړی چې د حج لپاره د جواز لرل ضروري دي.

بې اجازې حج کوونکي به وشړل شي او لس کلن بنديز به پرې ولګېږي.

د فرانسې ولسمشر اېمانویل مکرون لېوالتیا ښودلې، چې د فلسطین دولت په رسمیت وپېژني؛ خو ډېپلوماټان او شنونکي خبرداری ورکوي چې دا ګام به اسراییل غوسه کړي او د لویدیځو هېوادونو ترمنځ به اختلافات ژور کړي.

رویټرز راپور ورکړی چې که فرانسه دا پرېکړه عملي کړي، دا به لومړنی لویدیځ هېواد وي چې د فلسطین دولت په رسمیت پېژني.

مکرون ویلي، یوازې سیاسي حللاره دایمي سولې ته لاره هوارولی شي، او پلان لري چې له سعودي عربستان سره په ګډه د غزې په اړه نړیواله غونډه جوړه کړي.

د ملي امنیت پخواني رییس، رحمت‌الله نبیل، د لیژه بند د سقوط په غبرګون کې ویلي، چې دا یوازې د یو بند سقوط نه، بلکې د هغو نظامونو سقوط ته اشاره ده چې پر جهل، فساد او استبداد ولاړ وي.

ښاغلي نبیل پر خپله ایکس‌پاڼه لیکلي:«پروژې چې پر علم، تخصص او نظارت نه؛ بلکې پر شعار، ریا او دعا جوړې شي، نتیجه یې پرته له فروپاشۍ بل څه نه‌وي.»

هغه د لیژه بند د سقوط پېښه د هغو نظامونو سمبول بللی چې بنیادونه یې کمزوري وي.

نوموړی وایي:«د ملایي/طالباني استبداد بند به د خلکو د آګاهۍ له بارانه سره ونړېږي، او د خلکو د آزادۍ لار به پرانیستل شي.»

د یادونې ده چې په خوست کې جوړ شوی لیژه بند له پرانیستې شپږ ورځې وروسته سیلاب ویوړ.

د اوکراین ولسمشر، ولادیمیر زیلینسکي نن د جرمني پلازمېنې برلین ته رسېدلی.

راپورونه وایي، چې زیلینسکي به په دې سفر کې د جرمني له نوي صدراعظم، فریدریش مرتس، سره د دواړو هېوادونو د همکاریو او د اوکراین پر روانې جګړې بحث وکړي.

مرتس له زیلینسکي سره ژمنه کړې چې د خپلې صدارت دورې پر مهال به د اوکراین په ملاتړ کې لا زیات عملي اقدامات وکړي.

دا لیدنه داسې مهال ترسره کېږي چې لوېدیځ کې د اوکراین جګړې ته پاملرنه کمه شوې او امریکا هم له کیف سره په مرستو کې احتیاط غوره کړی.