ډان ورځپاڼه وایي، د پاکستان په پنجاب ایالت کې یو کس چې د دوو ماشومانو پر وژنه تورن و، د پولیسو له ولکې د تېښتې پر مهال د اوبو په کانال کې ډوب شوی او مړ شوی دی.

ډان ورځپاڼې د پولیسو له قوله ویلي، چې څو ورځې مخکې په «کاسوکي» سیمه کې دوه ماشومان نادرکه شوي وو او مړي یې وروسته د یوه کور په اوسپنیز صندوق کې وموندل شول.

ډان زیاتوي چې د پېښې په تړاو پنځه کسان مشکوک پېژندل شوي، چې دوه نیول شوي دي.

د راپور له مخې، یو شکمن کس چې د جرمونو د کنټرول څانګې سره بندي و، د ماشومانو پر وژنې اعتراف کړی او ویلي یې دي چې هغوی یې په لرګي وهلي.

نوموړی د لرګي د موندلو لپاره د پولیسو له‌خوا د پېښې ځای ته بیول کېده، چې تښتېدلی او د اوبو کانال ته یې ځان غورځولی او مړ شوی دی.

ایراني امنیتي چارواکي وايي، د تهران په ځانګړو عملیاتو کې د داعش ډلې ۱۳ غړي نیول شوي دي.

د فراجا د ترهګرۍ ضد څانګې ویاند سردار سېد منتظر المهدي ویلي، نیول شویو کسانو غوښتل چې په یو لړ وروستیو مراسمو کې بمي او وسله‌وال بریدونه ترسره کړي.

د چارواکو په وینا، په نیول شویو کسانو کې ځانمرګي، وسله‌وال او نور تخریبي افراد شامل دي، چې له وسلو او مهماتو سره یو ځای نیول شوي دي.

داعش ډلې تر اوسه په دې اړه څه نه دي ویلي.

د پاکستان لومړی وزیر شهباز شریف نن د یوه لوړپوړي پلاوي په مشرۍ د دوه ورځني سفر په موخه سعودي عربستان ته روانېږي.

د پاکستان د بهرنیو چارو وزارت په وینا، دا سفر به د دوه اړخیزو اړیکو، سوداګرۍ، پانګونې او د اسلامي هېوادونو پر ګډو موضوعاتو متمرکز وي.

ټاکل شوې چې شریف به د سعودي ولیعهد محمد بن سلمان سره هم وګوري او د نوي ډیلي او اسلام‌اباد ترمنځ د تاوتریخوالي د کمولو په برخه کې د ریاض د هڅو مننه وکړي.

چارواکي وايي، تمه ده دا لیدنه د سعودي د ۲۰۳۰ لید د پروژو په چوکاټ کې د دواړو هېوادونو ترمنځ نوې همکارۍ راوپاروي.

د امریکا ولسمشر ډونالډ ټرمپ د یوه نوي اجرایي فرمان له مخې د افغانستان او ۱۱ نورو هېوادونو د اتباعو پر امریکا ته سفر بندیز ولګاوه.

په بندیز لګول شويو هېوادونو کې افغانستان، ایران، چاد، د کانګو جمهوریت، استوایي ګینه، اریتریا، هایتي، میانمار، لیبیا، سومالیا، سوډان او یمن شامل دي.

بل لورته سپینې ماڼۍ بیا ویلي، چې د افغانانو لپاره ځانګړې مهاجرتي ویزې له دغه فرمان څخه مستثنا شوې دي.

سپینې ماڼۍ دغه راز ویلي، چې دغه فرمان د غبرګولي له ۱۹مې اجرا کېږي.

پخواني حکومت کې د ولسمشرۍ ماڼۍ حقوقي سلاکار ډاکټر عبدالعلي محمدي وایي، احمدشاه بابا د ملي وحدت سمبول ګڼي.

نوموړي د ویښتیا میډیا په ایکس سپیس کې ویلي، د نادر افشار له مرګ وروسته هغه افغانستان په ښه ډول مدیریت کړ.

نوموړی وایي، د احمدشاه بابا واکمني کې افغان په یو نوي هویت وپېژندل شو او د یوې نوې جغرافیې څښتن شو؛ خو زیاتوي، چې د افغان هویت پوختګي ته ونه رسېد او جغرافیه هم ثابته نه وه.

محمدي وایي، که د احمدشاه بابا لښکر به هند ته لاړ؛ نو جغرافیه به لویه شوه؛ خو که را وبه ګرځېد؛ نو د افغانستان جغرافیه پېښور ته رالنډه شوه.

هغه، چې د احمدشاه بابا د ۲۵۳ تلین په مناسبت خبرې کولې ویلي، احمدشاه ابدالي د اوسني افغانستان څو برابره زیاته جغرافیه باندې واکمني کوله او د هغه زیات او کمه پنځه ویشت کاله واکمني مونږ ته لوی درس دی.

محمدي زیاتوي، چې که نن افغانان د احمدشاه بابا پر پله تلل غواړي؛ نو پکار ده، چې خپلې مشترکې نقطې پیاوړې کړې، مدبرانه حرکت وکړي او د یوې لارې ملګري شي.

ژباړه: سیلۍ ودان

د مې په پنځمه، هغه ورځ چې هالنډیان خپله ازادي نمانځي؛ یوه ازادي چې د وینې، او کلونو قربانۍ په بدل کې ترلاسه شوې.
د افغانستان سفارت په هالنډ کې په یوې غیر مترقبه پرېکړه کې 
د افغانستان د اسلامي جمهوریت نوم او ملي بیرغ  له ویب‌پاڼې او ټولنیزو رسنیو لرې کړ، درې رنګه ملي بیرغ یې ښکته کړ، او په خاموشۍ سره یط د طالبانو ملاتړ وکړ.

هالنډۍ ورځپاڼې لیکلي د افغان سفارت له لورې دا ګام اخیستل په کومه عادي ورځ نه ده ترسره شوی؛ بلکې زمونږ د آزادۍ په ورځ اخیستل شوې.

ورځپاڼې د سفارت له لورې دا ډول اقدام هغو افغانانو ته سپکاوی بللی چې د طالبانوخلاف او ضد دي او همدا راز دا ګام د هر هالنډي لپاره توهین دی چې پرآزادۍ، ډیموکراسۍ او بشري حقونو باور لري.

سفارت د پوښتنې په توګه پوښتلې چې د دې حالت مسول څوک دی؟

محمد آصف رحیمي، چې یو وخت د افغانستان د جمهوریت سفیر و، خو اوس طالبانو په ډیپلومات بدل شوی، د داسې ډلې استازی دی چې زرګونه افغانان د طالبانو له ناسمو او بشري ضد پالیسو په تېښته کې دي او د ښځو او ماشومانو په ګډون لوی قشر له خپلو حقوقو بې برخې دي.

په اکتوبر ۲۰۲۳ کې، سفارت په ډاګه وویل چې د طالبانو د بهرنیو چارو وزارت سره همکاري کوي، څو قونسلګر خدمات وړاندې کړي.

رحیمي دا سیاسي همکاري ونه بلله، خو موږ پوهېږو چې دا یو ډول تېروتنه ده.

که ته د یوه رژیم په استازیتوب اسناد ورکوي، داسې رژیم چې نجونې له ښوونځیو منع کوي، ښځې بندیانوي، خبریالان او عام خلک شکنجه کوي او وژني؛ نو دا له ظلم سره مرسته کوې.

دا یوازې قونسلي  کار نه دی، بلکېودا پوره همکاري ده.

یوه بله بېلګه:
په نومبر ۲۰۲۳ کې، یو عکس خپور شو چې د هالنډ د روغتیا وزیر ارنست کویپرز پکې د طالبانو د درملو له پخواني مشر، عبدالباري عمر، سره ولاړ دی.
دا سړی څنګه هالنډ ته راغلی؟ ډېره احتمال دا ده چې وېزه یې د رحیمي په مرسته ترلاسه کړې وي.

موږ باید له ځانه وپوښتو:
موږ څه کوو؟ طالبان عادي کوو؟
په رښتیا غواړو چې له داسې یوه ډلې سره دیپلوماتیکې اړیکې جوړې کړو چې زموږ د سرتېرو په مرګونو کې لاس لري او هره ورځ د بشري حقونو خلاف اقدامات کوي؟

طالبانو نجونې له زده کړو منع کړې، ښځې یې کورونو کې بندې کړې، عام خلک د ځان لپاره د سپر په توګه کاروي، د سولې پروسه یې د وېرې او ځانمرګو بریدونو له لارې له منځه یووړه.

او مه هېروئ، زموږ هالنډي سرتېري د همدې طالبانو له لاسه ووژل شول او زه پخپله زخمي شوم.

په هالنډ کې زرګونه افغانان ژوند کوي، خپل هېواد یې له لاسه ورکړی، خو لا هم یو طالب‌پلوه شخصیت، د دوی په نوم، د افغانستان سفیر پاتې دی.

دا داسې ده لکه چې د مې پنځمه، د ازادۍ په ورځ، یو همکار ته د بیرغ پورته کولو اجازه ورکړو.

د اسلامي جمهوریت بیرغ، د یوه نیمګړي خو ازاد افغانستان نښه وه.
یو هېواد چې د ډېرو خنډونو باوجود یې د پرمختګ هڅه کوله!

د ملګرو ملتونو د امنیت شورا د طالبانو د بندیزونو کمېټې (۱۹۸۸ کمېټه) مشري د پاکستان دایمي استازي منیر اکرم ته وسپارل شوه.

دا کمېټه د طالبانو حکومت پر ضد نړیوال بندیزونه څاري او پلي کوي.

هندۍ رسنۍ وایي، دا ګام به په افغانستان کې د پاکستان ستراتېژيک رول پیاوړی کړي.

کارپوهان باور لري چې پاکستان کولای شي له دې لارې د طالبانو سره دیپلوماټیکې او اقتصادي اړیکې اسانه کړي.

چین هم هڅه کوي چې د پاکستان او د طالبانو د حکومت اړیکې لا ښې کړي او د سیمې امنیتي ثبات کې رول ولوبوي.

د طالبانو حکومت سترې محکمې اعلان کړی، چې د قربانۍ د اختر په مناسبت یې ۱,۵۵۹ تنه بندیان له زندانونو خوشې کړي او د ۹۵۰ نورو بندیانو د بند موده یې راکمه کړې ده.

د سترې محکمې د معلوماتو له مخې، دغه بندیان د هېواد له اتو ولایتونو کابل، ننګرهار، لغمان، پنجشیر، پروان، کاپیسا، خوست او نیمروز له زندانونو څخه آزاد شوي دي.

په خپره شوې خبرپاڼه کې ویل شوي چې خوشې شوي کسان هغه بندیان دي چې «اصلاح شوي وو، ظاهري او باطني چلند یې د اسلامي سنتو سره سمون درلود، دیني او نورې اړین زده‌کړې یې ترلاسه کړې وې» او د بښنې وړ پېژندل شوي دي.

د سترې محکمې د رییس له‌خوا صادر شوي حکم له مخې، دغه بندیان د ځانګړو او باصلاحیته کمیټو له لوري تر ارزونې وروسته خوشې شوي دي.

د اسرائیلو یو لوړپوړي چارواکي «آی۲۴» شبکې ته ویلي، تر هغو چې د ایران او امریکا تر منځ اټومي خبرې روانې وي، اسرائیل به پر ایران برید ونه‌کړي.

بل‌خوا، د آکسیوس خبري شبکې د سرچینو په وینا، تمه ده چې د دواړو لورو تر منځ د خبرو شپږم پړاو ژر پیل شي.

تر دې وړاندې داسې راپورونه خپاره شوي وو، چې ګواکې پر ایران د اسرائیل د برید احتمال په لوړه کچه دی.

د خلیج فارس د همکارۍ شورا په کویټ کې د خپلو وزیرانو په ۱۶۴مه غونډه کې د طالبانو له حکومت غوښتي، چې د افغان ښځو د زده کړو او کار حقونه تضمین کړي.

شورا په یوه ګډه اعلامیه کې ټینګار کړی، چې د افغانستان خاوره باید نه د ترهګرو ډلو او نه هم د مخدره موادو د قاچاق لپاره وکارول شي.

د سعودي عربستان، قطر، اماراتو، بحرین، عمان او کویټ د بهرنیو چارو وزیرانو په دې ناسته کې ګډون درلود.

اعلامیه کې پر افغانستان کې د امنیت او ثبات د بېرته راوستلو، د اقلیتونو د خوندیتوب او له ترهګرۍ سره د افغان ولس د مبارزې ملاتړ شوی دی.

شورا د خپلو غړو هېوادونو له‌خوا له افغانستان سره د بشري مرستو د دوام هرکلی کړی او پر نړیوالو یې هم غږ کړی، چې بشري، اقتصادي او پرمختیایي مرستې دوامدارې وساتي.