د جورج ډبلیو بوش څېړنیز بنسټ د نړیوالو چارو مسؤله ناتالي ګونلا-پلاتس او ارشد غړې جسیکا لوډویګ په یوه مقاله کې لیکلي چې طالبان له افراطیت، فساد او زور زیاتي سره یو نړیوال ګواښ جوړ کړی دی.

دوی ویلي، هغو افغانانو چې د امریکا او نړیوالې ټولنې سره یې د سولې او پرمختګ لپاره همکاري کړې، اوس د طالبانو د انتقامي اقداماتو له خطر سره مخ دي.

په مقاله کې خبرداری ورکړل شوی چې که دغه افغانان بېرته واستول شي؛ نو د ازادۍ له لاسه ورکولو یا د مرګ له ګواښ سره به مخ شي.

لیکوالانو همداراز د امریکا د ځینو با نفوذه څېرو د بې‌پروایۍ په زیاتېدو اندېښنه ښودلې او ویلي یې دي چې دوی د طالبانو تر واک لاندې د افغانانو له ورځني کړاوه سترګې پټوي.

د طالبانو د اصلاحي کمیسیون له لوري د دې ډلې د فعال رحیم سکندر تر نیول کیدو او جبري اعتراف وروسته د طالبانو ګڼو پلویانو د خپل حکومت دغه چاره غندلې او د خپلو ملګرو پر وړاندې یې بې اصافي بللې.

طالب پلوي ټولنیز فعال مسلم کندزي لیکلي، چې په دومره قربانیو له راغلي نظام سره داسې کوچني کارونه هیڅ خوند نه کوي او داسې چارې ټول نظام تر سوال لاندې راولي.

د فاتح کندز په نوم بل طالب فعال لیکلي:« مولوي سعيدالله صاحب!
په یوه عادي اشتباه د خپل فکر ملګري نېول، بندي کول او بیا جبراً اقرار په عامه ميډيا کې له نظام سره نه ښایي. هر څوک چې يې له قدرت څخه ناسمه استفاده مه کوه، که چيرې مجرم وي؛ نو جزا بايد محکمه ورکړي نه ته.»

په همدې حال کې بیا شریف خلیلي رحیم سکندر ته په خطاب کې ويلي:« یو وخت مې درته ویلي وو، چې د پاکستان خلاف څوک خبره نشي کولای.»

ورته مهال بیا سهیل نور ویلي، چې د رحیم سکندر ټیلیفون له طالبانو سره دی او هغوی هم ورنه په خپله خوښه پوسټونه کوي.

خبریال بلال سروري بیا وایي، چې پرون «جنرال» مبین پر پاکستان د نقد له کبله نیول شوی او نن بیا سکندر د دې له کبله نیول شوی، چې ویلي و، له هېواده بهر د جهاد د منع کېدو اعلان باید ونشي.

ځايي سرچینې وايي، چې د ننګرهار ولایت په دره‌نور ولسوالۍ کې د طالبانو په یو رنجر موټر موټر د سړک غاړې ماین چاودنه کړې، چې په پایله کې درې طالبان وژل شوي او یو بل ټپي شوی دی.

دا پېښه تېره ورځ د غبرګولي په ۱۵مه رامنځته شوې.

تر اوسه هېڅ کومې ډلې د دې برید مسئولیت نه دی منلی.

د طالبانو حکومت هم تر اوسه په دې اړه څه نه دي ویلي.

د بشري حقونو له ۸۰ ډېرو بنسټونو په یوه ګډ لیک کې له ایرانه د افغان وګړو د اعدامونو د درولو غوښتنه کړې ده.

په لیک کې ویل شوي، چې یوازې د ۲۰۲۴ کال له پیله تر اوسه لږ تر لږه ۸۰ افغانان په ایران کې اعدام شوي، چې دا شمېر د تېرو کلونو په پرتله درې چنده زیات دی.

د ایران د بشري حقونو سازمان مشر ویلي، افغانان د اعدام “ارزانه قربانیان” دي او دا بهیر باید ژر بند شي.

د لیک امضاکوونکو له نړیوالې ټولنې، مدني ټولنو او خلکو غوښتنه کړې چې د دغو اعدامونو پر وړاندې غږ پورته کړي.

د ذولحجې نهمه د عرفې له ورځې سره برابره ده.

د ټولې اسلامۍ نړۍ څخه ورغلي حاجیان د عرفې غونډۍ ته روان دي.

دا ورځ د حج له مهمو ارکانو څخه ګڼل کېږي، چې حاجیان پکې د ماسپښین تر لمانځه وروسته د عرفات په غونډې کې راټولیږي.

د بشریت ستر ناجي او د اسلام وروستی پیغمبر حضرت محمد «ص» په ۷مه میلادي پېړۍ کې د حجة الوداع خطبه هم له همدې ځای څخه بیان کړې وه.

د امریکا د کانګرس څه باندې سلو غړو په یوه لیک کې د دغه هېواد له کورنیو او بهرنیو چارو وزیرانو غوښتي چې د افغان کډوالو له اېستلو ډډه وکړي.

رویټرز راپور ورکړی، چې دغه ډیموکراټ غړي د ټرمپ له ادارې غواړي، چې نه یوازې د ایستلو ګواښ پای ته ورسوي، بلکې د افغانانو د خوندیتوب حالت هم وغځوي.

دوی خبرداری ورکړی چې د افغان کډوالو ایستل به هغوی له سخت اقتصادي او بشري وضعیت سره مخ کړي.

دا په داسې حال کې ده، چې تازه ټرمپ د افغانستان په شمول د ۱۲ هېوادونو پر وګړو دغه هېواد ته په ورتګ بندیز لګولی.

د ملګرو ملتونو د خوړو او کرنې سازمان وایي، چې په خوست کې ځنګلونه د له منځه تللو له جدي ګواښ سره مخ دي.

دغه سازمان د نړۍوال چاپېریال ورځې په مناسبت ویلي، د ځنګلونو د ساتنې او د سیمه‌يیز معیشت د پیاوړتیا په موخه یې پر ۲۳۲ هکټاره ځمکه نږدې ۴۸ زره د مېوو نیالګي کېنولي دي.

همداراز، د ځنګلونو د بیا را ژوندي کولو لپاره یې پر ۲۱۱۱ هکټاره ځمکه ۲۶۰ زره د جلغوزیو او غوزانو نیالګي هم کرلي دي.

د طالبانو حکومت د بهرنیو چارو وزارت مالي او اداري مرستیال محمد نعیم په افغانستان کې د ایران د سفارت له سرپرست علي رضا بېګدلي سره د افغان کډوالو د ستونزو او د دوه‌اړخیزو اړیکو د پراختیا په اړه خبرې کړې دي.

د طالبانو د بهرنیو چارو وزارت په وینا، محمد نعیم له افغان کډوالو سره د ایران د کوربه‌توب او له «اسلامي امارت» څخه د ملاتړ مننه کړې او د دغو همکاریو د دوام غوښتنه یې کړې.

بیګدلي ژمنه کړې چې ایران به له افغانستان سره خپلو هر اړخیزو همکاریو ته دوام ورکړي.

چین له پاکستانه غوښتي چې د طالبانو له حکومت سره ډیپلوماټیکې اړیکې پراخې کړي.

د پاکستان د بهرنیو چارو وزیر اسحاق ډار وایي، دا غوښتنه د افغانستان، پاکستان او چین په درې اړخیزه غونډه کې شوې.

نوموړي زیاته کړې چې له غونډې وروسته یې له چین غوښتي چې د چین-پاکستان اقتصادي دهلیز افغانستان ته هم وغځوي، او لګښت دې هم د همدغه پروژې له لارې برابر شي.

د هغه په وینا، د چین بهرنیو چارو وزیر دا وړاندیز منلی دی.

د طالبانو حکومت د بهرنیو چارو سرپرست وزیر امیرخان متقي، د یوناما له مشرې روزا اوتونبایوا سره لیدلي او د راستنېدونکو اړتیاو، د بهر میشتو افغانانو د ستونزو، خصوصي سکتور د پیاوړتیا او پانګونې د جذب په اړه یې خبرې کړې دي.

متقي له یوناما غوښتي، چې په خپلو راپورونو کې د افغانستان واقعي وضعیتونه منعکس کړي، څو نړیوالو ته د هیواد ثبات روښانه شي.

هغه همداراز غوښتنه کړې چې اروپا کې مېشتو افغانانو ته د قونسلي خدماتو د وړاندې کولو لپاره «اسلامي امارت» ته لاسرسی برابر شي.

اوتونبایوا ویلي، چې د امنیت شورا په راتلونکې غونډه کې به د طالبانو حکومت پېغامونه او د افغانستان فرصتونه له نړیوالو سره شریک کړي او ژمنه یې کړې چې د راستنېدونکو او د کاري زمینو د برابرولو لپاره به هڅې جاري وساتي.