پخواني ولسمشر محمد اشرف غني د افغان فوټسال لوبډلې له لوري د اسیا جام ګټلو په اړه مبارکي ویلې.
ښاغلي غني ویلي، چې ټولو لوبغاړو ته د بریا هیله لري.
د نوموړي په خبره، د هېوادوالو له لوري د دغو ځوانانو تود هرکلي دا ثابته کړه، چې د هېواد راتلونکی روښانه دی.
محمد اشرف غني هیله څرګنده کړې، چې ځوانان به راتلونکو لوبو کې هم لوړه روحیه ولري.
الجزیرې په یو راپور کې ویلي چې د امریکا او قطر په هڅو د اوربند د موافقې تر لاسلیکېدو وروسته هم اسرايیل یوازې لږه اندازه مرسته پرېږدي چې غزې ته داخل شي.
د غزې د اداري چارواکو د معلوماتو له مخې، د اکتوبر له ۱۰مې تر ۳۱مې پورې څه باندې درې زره سوداګریزې او بشري مرستې لېږدونکې لارۍ سیمې ته رسېدلې دي.
دوی وایي چې دا شمېر د ورځې په اوسط ډول شاوخوا ۱۴۵ لاریو ته رسېږي، حال دا چې د تړون له مخې باید هره ورځ ۶۰۰ لارۍ داخل شي، چې موجوده اندازه یې یوازې ۲۴ سلنه جوړوي.
د مکسیکو چارواکي وایي چې د سونورا ایالت په «هېرمو سیلو» ښار کې د شنبې په ورځ په یوه پلورنځي کې د اورلګېدنې له امله لږ تر لږه ۲۰ کسان وژل شوي او یو شمېر نور ټپیان شوي دي.
د مکسیکو ولسمشرې کلودیا شېنباوم د قربانیانو له کورنیو سره خواخوږي څرګنده کړې او ویلي یې دي چې د کورنیو چارو وزیر ته یې د مرستې ټیمونو د استولو امر کړی دی.
سیمهییزې رسنۍ راپور ورکوي چې د وژل شویو شمېر ښايي له ۲۰ څخه زیات وي.
د امریکا پخواني ولسمشر باراک اوباما د انتخاباتي غونډو پر مهال د دوو دموکرات نوماندانو ملاتړ اعلان کړ او رایه ورکوونکو ته یې وویل چې د ولسمشر ډونالډ ټرمپ د ادارې «بېقانوني، بېپروايي او نامسؤلیتوب» په وړاندې ودرېږي.
اوباما، چې لا هم د دموکراتانو په منځ کې محبوب دی، په ویرجینیا او نیوجرسي کې په دوو غونډو کې د ټرمپ پر پالیسو سخت انتقاد وکړ.
نوموړي ویلي چې د هېواد سیاست «تورتم» ته تللی، او هره ورځ د سپینې ماڼۍ له لوري «نوې بېقانوني او بېپروايي» روانه ده.
هغه د ټرمپ تعرفوي پالیسۍ، د ملي ګارد د ځواکونو استول او د کانګرس د جمهوريپالو چوپتیا غندلې.
د سوریې لپاره د امریکا ځانګړي استازي، ټام باراک، اعلان کړی چې د سوریې ولسمشر احمد شرع به د نوومبر په لسمه نېټه واشنګټن ته سفر وکړي.
د سپینې ماڼۍ یو چارواکي د سفر همدغه مهالویش تایید کړی دی.
د سوریې یو باخبره سرچینه وایي چې تمه کېږي دغه سفر به د راتلونکو دوو اونیو په ترڅ کې ترسره شي.
دا به لومړی ځل وي چې د سوریې یو ولسمشر د امریکا پلازمینې واشنګټن ته رسمي سفر کوي.
د افغانستان او چین ترمنځ د روان کال په لومړیو نهو میاشتو کې سوداګري ۷۴۵ میلیونه ډالرو ته رسېدلې، خو د دغې سوداګرۍ ډېره برخه وارداتو پورې تړلې ده.
د طالبانو حکومت د صنعت او سوداګرۍ وزارت ویاند اخندزاده عبدالاسلام جواد ویلي، د افغانستان صادرات چین ته تر ۱۸ میلیونه ډالره پورې رسېدلي، چې پکې تور جلغوزي، وچي زردالو او قیمتي ډبرې شاملې دي.
نوموړي زیاته کړې، له چین څخه د افغانستان واردات بیا ۷۲۷ میلیونه ډالره دي، چې زیاتره برخه یې د پنبې ټوکران، لمریز پلېټونه او برېښنايي وسایل جوړوي.
د وزارت په وینا، حکومت هڅه کوي د صادراتو کچه لوړه او د سوداګرۍ تله د افغانستان په ګټه درنه کړي.
د ترکیې د بهرنیو چارو وزیر هاکان فیدان د حماس د سیاسي دفتر له غړو سره لیدلي دي.
د ترکیې د بهرنیو چارو وزارت په خپله ایکسپاڼه لیکلي، چې دغه ناسته د ترکیې په استانبول کې شوې ده.
دغه ناستې ته داسې مهال اشاره شوې چې قطر او امریکا د اسراییلو او حماس ترمنځ منځګړیتوب کړی او لنډمهالی اوربند رامنځته شوی؛ خو سره له دې اسراییلو په ځینو سیمو بریدونو ته دوام ورکړی دی.
د فرانسې حکومت اعلان کړی چې یو ۲۰ کلن افغان ځوان د لیون په ښار کې د داعش خراسان ډلې سره د اړیکو او مالي ملاتړ په تور نیول شوی دی.
د فرانسې د ترهګرۍ ضد ملي څارنوالۍ دفتر په یوه بیانیه کې ویلي چې نیول شوی کس د دې ډلې له مفکورې سره ژور تړاو لري او د جهادي ایډیالوژۍ ملاتړ یې کاوه.
د څارنوالۍ په وینا، دغه افغان د داعش خراسان ډلې ته پیسې لېږلې او د دې ډلې د تبلیغاتي موادو په ژباړه او خپرولو کې یې مرسته کړې ده.
چارواکي زیاتوي، چې نوموړی کس څو کاله وړاندې فرانسې ته تللی و او له دې وړاندې هم د ترهګرۍ د ستاینې په تور تر څېړنې لاندې راغلی و.
د طالبانو حکومت د کورنیو چارو وزارت مرستیال محمد نبي عمري وايي چې په ګڼو سیمو کې د ځنګلونو غیرقانوني وهل دوام لري او دا کار د ځنګلونو د بشپړ ورکېدو لامل کېږي.
هغه ټینګار کړی چې ځنګلونه ملي شتمني ده او ټول باید د ساتنې لپاره ګډ مسوولیت ولري.
عمري ویلي چې د شنو قطعو ترڅنګ به ځوانان د دندې لپاره وګمارل شي چې هم به کاري فرصتونه جوړ کړي او هم به د ځنګلونو ساتنه پیاوړې کړي.
د طالبانو د کرنې وزیر عطاءالله عمري هم پر خلکو غږ کړی چې د پلرونو پرېښودلې شنې سیمې دې د راتلونکي نسل لپاره وساتي.
دا څرګندونې داسې مهال دي چې د یو شمېر ولایتونو اوسېدونکي د نامعلومو کسانو له لوري د ځنګلونو د وهلو او قاچاقېدو په اړه شکایت کوي.
د طالبانو حکومت د ارشاد، حج او اوقافو وزارت ویلي چې د تېر کال (۱۴۴۶ هـ ق) حاجیانو ته د اضافي پیسو د بېرته ورکړې لړۍ د بشپړېدو په درشل کې ده.
وزارت ویلي، دغه پیسې چې د حاجیانو په مصارفو کې زیاتې شوي، تر اوسه ۲۲،۸۸۳ حاجیانو ته ټولټال ۹۰ میلیونه او ۶۷ زره افغانۍ ورکړل شوې دي، چې د ټولو حاجیانو شاوخوا ۷۹ سلنه برخه جوړوي.
له یاد وزارت څخه په خپره شوې اعلامیه کې ویل شوي چې، هر حاجي ته ۳،۹۳۶ افغانۍ ورکول کېږي.
وزارت پر هغو حاجیانو غږ کړی چې که لا یې هم پیسې نه وي ترلاسه کړې، ژر دې د مرکز یا ولایتونو د ارشاد، حج او اوقافو ریاستونو ته مراجعه وکړي.